Eski ou’n pare pour fer fas avek en Dezas natirel?

1. Akoz i saz fer en plan pour fer fas avek en dezas?

¹ Sak lannen, milyon dimoun otour lemonn enkli en kantite frer ek ser i ganny afekte par tranbleman-d-ter, tsounami, sezon gro lapli, siklonn, tanpet divan, ek linondasyon. Vi ki bann dezas natirel i ariv san ekspekte e i kapab afekte nenport ki parmi nou, i saz pour fer en plan davans.—Prov. 21:5.

2. Akoz nou devret enform bann ansyen konsernan nou ladres ek nimero telefonn?

² Sa ki kapab ganny fer davans: Parfwa bann lotorite zot kapab averti konsernan en dezas ki pe aprose. I enportan pour port latansyon lo sa bann lavertisman. (Prov. 22:3) Dan en tel sitiasyon bann ansyen pou esey kontakte tou bann dimoun dan kongregasyon pour ed zot fer bann preparasyon neseser. Apre en dezas bann ansyen pou osi fer zefor pour kontakte tou bann ki asosye avek sa kongregasyon pour vwar si zot an sekirite e vwar ki led zot kapab bezwen. En kantite letan i kapab ganny gaspiye si bann ansyen pa gard zot lalis kontak azour. Alors i enportan pour bann proklanmater enform sekreter ek zot sirveyan letid liv konsernan zot ladres ek nimero telefonn.

3. Ki mannyer nou kapab korpere avek bann ansyen si nou reste dan en rezyon ki souvan ganny afekte par dezas?

³ Si kongregasyon i trouve dan en rezyon ki souvan ganny afekte par dezas, bann ansyen i kapab demann bann proklanmater pour donn non ek nimero telefonn fanmiy oubyen zanmi ki pa reste dan zanmirant. E zot devret ganny kontakte dan moman kritik. Sa pou permet bann ansyen pour konnen kote bann ki’n ganny evakye i ete. Bann ansyen i kapab oule fer en plan lo sa ki kongregasyon pou fer dan moman kritik. Sa i enkli fer en senp lalis bann keksoz ki sak dimoun pou bezwen annan, bann laranzman pour evakye, ek plan pour ed sa bann ki annan bezwen spesyal. I enportan pour korpere avek sa bann laranzman ranpli avek lanmour.—Ebr. 13:17.

4. Ki nou devret fer si i ariv en dezas dan nou rezyon?

⁴ Apre en Dezas: Ki ou devret fer si i ariv en dezas dan rezyon kot ou reste? Fer sir ou okip bezwen ou fanmiy lo plan fizik. Si ou kapab, donn led neseser avek lezot ki’n ganny afekte. Fer zefor pour kontakte ou sirveyan letid liv oubyen en lot ansyen osito posib. Sa i devret ganny fer menm si ou an sekirite e pa bezwen led. Si ou bezwen led, annan lasirans ki ou bann frer pou fer tou zefor pour ed ou. (1 Kor. 13:4, 7) Pa bliye ki Zeova i konsyan ou sitiasyon; kont lo li pour siport ou. (Ps. 37:39; 62:8) Vey bann loportinite kot ou kapab donn sipor spirityel ek emosyonnel lezot. (2 Kor. 1:3, 4) Repran ou labitid teokratik osito posib.—Mat. 6:33.

5. Ki mannyer sa posibilite pour annan dezas i afekte bann vre Kretyen?

⁵ Kantmenm bann posibilite pour annan dezas i met lemonn dan en kantite lenkyetid, nou kapab get lavenir avek konfyans. Byento tou bann dezas pou disparet. (Rev. 21:4) An atandan nou kapab pran bann pa rezonnab pour prepar nou pour letan problenm ek difikilte i arive, anmezir ki nou gard nou devouman par pres sa bon nouvel avek lezot.