Kontinyen “raport bokou Fri”
1 Par servi bann term senbolik, Zezi ti konpar li konman sa vre pye rezen, son Papa konman sa Zardinyen, e bann Kretyen swazir konman bann brans ki raport fri. Ler i ti pe dekrir travay sa Zardinyen, Zezi ti met lanfaz lo lenportans pour reste solidman atase avek sa pye rezen. (Zan 15:1-4) Leson pour nou se ki tou dimoun ki annan en relasyon pros avek Zeova i devret parey en brans ki raport fri lo sa “vre pye rezen,” Zezi Kri. Nou devret kontinyen prodwi annabondans “fri lespri” ek fri Rwayonm.—Gal. 5:22, 23; Mat. 24:14; 28:19, 20.
2 Fri Lespri: Fason ki nou manifeste fri lespri i kapab montre ki kantite nou’n progrese spirityelman. Eski ou pe fer zefor pour devlop fri lespri Bondye par etidye e reflesir lo Parol Bondye regilyerman? (Fili. 1:9-11) Pa ezite demann Bondye son lespri sen, ki kapab prodwi bann kalite dan ou ki glorifye Zeova e ki kapab ed ou pour kontinyen progrese spirityelman.—Lik 11:13; Zan 13:35.
3 Devlop fri lespri pou osi ed nou vin pli devoue dan predikasyon. Par egzanp, lanmour ek lafwa i motiv nou pour fer letan dan nou progranm byen sarze, pour partisip dan predikasyon regilyerman. Bann kalite tel parey lape, pasyans, labonte, ladouser, ek kontrol lo nou prop lekor pou ed nou azir dan en fason apropriye anver bann ki opoz nou. Lazwa i permet nou trouv satisfaksyon dan predikasyon menm ler dimoun pa enterese.
4 Fri Rwayonm: Nou anvi prodwi bann fri Rwayonm osi. Sa i enkli ‘rann glwar Bondye, setadir, toultan loue son non par nou labous.’ (Ebr. 13:15) Nou fer sa ler avek devouman e san arete nou proklanm sa bon nouvel. Eski ou pe fer bokou zefor pour prodwi plis fri Rwayonm par amelyor ou minister?
5 Zezi ti montre ki son bann disip pa ti pou prodwi menm kantite fri. (Mat. 13:23) Alor nou pa devret konpar nou avek lezot me annou donn Zeova nou meyer. (Gal. 6:4) Ler nou onnetman egzamin nou sirkonstans personnel par servi Parol Bondye, sa pou ed nou pour kontinyen glorifye Zeova par “raport bokou fri.”—Zan 15:8.