“Byennere, sa Dimoun ki reste ferm dan Leprev”
1 Tou Kretyen i bezwen fer fas avek leprev. (2 Tim. 3:12) Bann leprev ki nou kapab rankontre i maladi, problenm ekonomik, tantasyon, persekisyon oubyen i kapab vin dan lezot fason ankor. Bann leprev ki Satan i enpoz lo nou in ganny fer dan en fason ki pour fer nou ralanti dan nou servis, negliz nou travay predikasyon, oubyen menm pour aret servi Bondye. (Zob 1:9-11) Ki mannyer nou kapab ere ler nou andir leprev?—2 Pyer 2:9.
2 Prepar ou pour bann Leprev: Zeova in donn nou son Parol laverite, enkli en resi lo lavi Zezi ek son bann lansennyman. Par ekout e fer sa ki Zezi ti dir, nou pe batir en fondasyon solid e pe osi prepar nou pour bann leprev. (Lik 6:47-49) Nou ganny lafors osi atraver lezot provizyon, parey nou bann frer ek ser dan kongregasyon, bann renyon, ek bann piblikasyon baze lo Labib ki lesklav fidel e pridan i fourni. E ler nou byen servi sa kado ki Bondye in donn nou—lapriyer.—Mat. 6:13.
3 Zeova in osi donn nou en lespwar. Kan nou batir en lafwa solid dan promes Zeova, nou lespwar i vin parey en “lank solid e ferm pour nou lam.” (Ebr. 6:19) Dan letan Labib, bann bato pa ti zanmen kit por san en lank, menm dan botan. Si en tanpet ti vini en sel kou, ler zot ti larg sa lank sa ti kapab anpes sa bato kit por e al rann lapel dan ros. Pareyman, si nou pe batir nou lafwa dan promes Bondye depi konmela menm, sa pou fer nou reste stab ler problenm ki parey tanpet i arive. Bann difikilte i kapab arive en sel kou. Menm si sa travay predikasyon ki Pol ek Barnabas ti pe fer Lis, ti ganny byen resevwar okonmansman, sitiasyon ti sanze en sel kou kan bann Zwif ki ti opoz zot ti arive.—Akt 14:8-19.
4 Landirans i anmenn Lazwa: Si nou kontinyen prese menm si nou ganny opoze, sa i donn nou en lape lespri. Nou byen kontan, ler nou ganny konsidere diny pour ganny maltrete akoz Kris. (Akt 5:40, 41) Kan nou andir bann leprev sa i ed nou devlop plis limilite, lobeisans, ek landirans. (Det. 8:16; Ebr. 5:8; Zak 1:2, 3) I ansenny nou pour depan lo Zeova, pour annan konfyans dan son promes, e fer li vin nou landrwa refiz.—Prov. 18:10.
5 Nou konnen ki bann leprev i la zis pour en pe letan. (2 Kor. 4:17, 18) Bann leprev i donn nou loportinite pour demontre ki kantite lanmour nou annan pour Zeova. Nou kapab reponn bann lakizasyon Satan, si nou andir bann leprev. Alors, nou pa pou bes lebra! “Byennere, sa dimoun ki reste ferm dan leprev, parski apre son leprev i pou resevwar kouronn lavi eternel.”—Zak 1:12.