Nouvo progranm lasanble spesyal

Tenm pour progranm lasanble spesyal pour lannen servis 2008 i “Nou, nou larzil, e Zeova i nou potye,” baze lo Izai 64:8. Konsey baze lo Labib ki pou ganny donnen atraver sa progranm pou ogmant nou lapresyasyon pour lasazes, lazistis, pwisans, ek lanmour Zeova konman sa Gran Potye.

Diskour sirveyan rezyonal, “Nou pe servi konman bann vaz onorab dan minister,” pou montre konman plis dimoun pe resevwar benediksyon annabondans ler zot konn laverite e partaz li avek lezot. Diskour “Meditasyon pou protez ou” pou montre ki mannyer ler nou medit oprofon lo bann prensip drwat Zeova, sa pou protez nou. Orater viziter pou adres lodyans lo sa bann tenm “Pa swiv koutim sa monn” ek “Les sa Gran Potye moul nou.” Bann paran ek zenn pou trouv lankourazman dan sa de diskour, “Bann zenn ki itil pour Zeova” ek “Rol vreman enportan ki paran i zwe pour moul zot zanfan.” I pou en plezir pour ekout e obzerv sa ki nou bann frer ek ser pe akonpli dan zot minister, atraver bann demonstrasyon ek entervyou. Bann ki anvi dedye zot lavi avek Bondye par batenm i devret enform sirveyan prezidan osito posib. Pa bliye anmenn ou kopi Latour Veyer ki pou ganny etidye pandan semenn lasanble spesyal.

Sa ki sa Gran Potye i dir, i pou akonpli. Me i depan lo sakenn de nou pour swazir ki mannyer nou pou reazir anver lafason ki i moul nou. Bann ki avek lasazes i soumet avek standar Zeova e les zot ganny rafinen, parey larzil ki en potye i servi pour travay avek, pou ganny moule, rafinen, e transformen pour vin bann vaz ki itil. Ler nou korpere avek Zeova, nou glorifye son drwa pour dirize e nou resevwar en kantite benediksyon.