Rekonfort bann ki annan en leker brize
1 Zanmen oparavan dan listwar imen in deza annan en tel bezwen pour donn rekonfor koumsa. An swivan legzanp Kris Zezi, nou Lerwa, nou osi nou travay pour “pans sa bann ki annan leker brize.”—Iza. 61:1.
2 Lapros: Pour ki nou mesaz i rekonfort dimoun, nou prezantasyon i devret byen ankourazan. Ler nou pa tro diskit lo bann move keksoz dan lemonn e lo bann fo lansennyman, laverite baze lo Labib ek bann promes Bondye pour en lavi ere ki rekonfortan i tant pour pli domin nou konversasyon. Sa pa vedir ki Armagedon pa merit ganny diskite. Nou travay i pou proklanm “lannen faver delapar Zeova ek zour vanzans nou Bondye,” e pour “averti sa enn mesan pour sorti dan son move semen.” Parkont, lavertisman Armagedon ek son rezilta destriktif pa devret etouf sa tenm bonn nouvel Rwayonm Bondye.—Iza. 61:2; Ezek. 3:18; Mat. 24:14.
3 Portanport: Souvan nou zwenn dimoun ki dekouraze akoz maladi, lanmor en dimoun ki zot kontan, lenzistis, oubyen problenm ekonomik. Konman bann ki imit Kris, nou devret “pran pitye” e senpatiz avek bann ki nou zwenn dan predikasyon. (Lik 7:13; Rom. 12:15) Menm si nou lir enn ou de verse Labib ki relye avek sa problenm, nou devret “pare pour ekoute,” pour ki sa dimoun i kapab eksprim son santiman. (Zak 1:19) Nou dan en pli bon pozisyon pour rekonfort en dimoun apre ki nou’n ekoute.
4 Kan i apropriye pandan konversasyon nou kapab dir, “Mon ti a kontan partaz avek ou detrwa parol ankourazan sorti dan Labib.” Nou devret servi bon zizman pour ki nou pa tant pour anvi koriz tou fo pwennvi ki en dimoun i kapab eksprimen. Nou devret plito rode konman pour ankouraz e rekonfort sa dimoun par servi Labib pour fortifye li. Dan sa ka, ou kapab servi liv Reasoning From the Scriptures paz 117-121 anba soutit “Encouragement.” Oubyen ou kapab donn sa met lakour en kopi sa trak Comfort for the Depressed e revwar sa lenformasyon ankourazan avek li.
5 Rod loportinite pour rekonfort lezot: Eski ou konn en vwazen, koleg travay, kanmarad lekol, oubyen en manm fanmir ki bezwen ganny konsole? Akoz ou pa fer en zefor pour vizit zot kot zot lakour avek bi pour rekonfort zot an servan Labib? Lefet ki ou konnen akoz zot bezwen rekonfor ou kapab prepare pour koz lo zot sitiasyon menm. Dan sa ka serten in ekrir let oubyen zot in telefonnen. Vre lanmour pour nou prosen pou pous nou pour montre ki nou konpran zot e donn zot sa rekonfor ki zot bezwen an servan Labib.—Lik 10:25-37.
6 Wi, nou’n ganny en travay pour rekonfort bann ki dan dey, pour fer bann ki sagren zwaye, e pour donn lespwar pour en meyer lavenir. Sa i sa rekonfor ki dimoun partou dan lemonn i bezwen. Koz avek lazwa lo sa kantite keksoz ki Bondye in promet pou anmenn rekonfor ek lespwar pour bann dimoun senser. Fotespere ki nou toultan mazin sa bezwen pour pans sa bann ki annan leker brize.