“Swiv legzanp Zezi”
1. Konman nou kapab vin bann minis efikas?
1 Menm si Zezi pa ti ganny ansennyen dan bann gran lekol profeser lalwa, i ti sa pli gran Minis dan listwar imen. Erezman, en resi baze lo minister Zezi in ganny prezerve pour nou benefis. Pour nou kapab vin bann minis efikas nou bezwen “swiv legzanp Zezi.”—1 Pyer 2:21.
2. Kwa ki pou ed nou devlop sa lanmour senser pour lezot parey Zezi?
2 Demontre lanmour pour lezot: Sa lentere senser ki Zezi ti annan pour lezot ti motiv li. (Mark 6:30-34) Bokou dimoun dan nou teritwar pe “soufer” e zot byen bezwen konn laverite. (Rom. 8:22) Ler nou reflesir lo zot kondisyon deplorab e konsernan sa lentere senser ki Zeova i annan dan zot, sa pou pous nou pour persevere dan predikasyon. (2 Pyer 3:9) Deplis, dimoun pou pli pare pour ekout nou mesaz si zot vwar ki nou senserman enterese avek zot.
3. Ki bann lokazyon ki Zezi ti pres avek lezot?
3 Sezi tou lokazyon pour rann temwannyaz: Zezi ti sezi tou lokazyon pour partaz sa bon nouvel avek lezot. (Mat. 4:23; 9:9; Zan 4:7-10) Pareyman nou devret touzour pare pour koz avek lezot lo laverite ler nou pe fer nou bann aktivite tou le zour. Serten frer ek ser i touzour gard en Labib ek piblikasyon baze lo Labib avek zot, pour ki zot a kapab donn en temwannyaz kot travay, kot lekol, kan pe vwayaze oubyen pe al aste konmisyon e lezot ankor.
4. Ki mannyer nou kapab fer nou mesaz santre lo sa Rwayonm kan nou pe prese?
4 Santre nou mesaz lo sa Rwayonm: Kan Zezi ti prese, i ti santre son mesaz lo sa bon nouvel konsernan Rwayonm. (Lik 4:43) Menm si nou prezantasyon pa pe mansyonn deswit oubyen koz direkteman lo sa Rwayonm, nou bezwen gard an tet ki nou devret ed sa met lakour vwar son lenportans. Menm kan nou pe koz lo bann move kondisyon dan sa lemonn ki endike ki nou pe viv dan bann dernyen zour, nou mesaz prensipal se pour ‘anons bonn nouvel konsernan bann keksoz meyer.’—Rom. 10:15.
5. Ki rol Labib i annan pour fer nou minister vin efikas?
5 Depan lo Parol Bondye: Tou dilon son minister, Zezi ti baz son lansennyman lo Lekritir. I pa ti ansenny nanryen par son prop lotorite. (Zan 7:16, 18) I ti nouri son lespri avek parol Bondye e servi sa konman en defans kont latak Satan. (Mat. 4:1-4) Pour nou kapab ansenny lezot avek efikasite nou bezwen lir Labib regilyerman e aplik sa ki nou aprann dan nou lavi. (Rom. 2:21) Kan nou reponn bann kestyon dan predikasyon, nou bezwen sit en verse pour siport sa ki nou dir e kan i apropriye lir li direkteman dan Labib. Nou anvi ki sa met lakour i vwar ki nou pa pe eksprim nou prop lopinyon me sa ki nou dir i pwennvi Bondye ki sorti dan Labib.
6. Ki Zezi ti fer pour tous leker bann ki ti ekout li?
6 Tous leker bann ki nou ansennyen: “Personn pa’n zanmen deza koz parey sa zonm.” (Zan 7:46) Sa i sa ki sa bann zofisye ti dir lo Zezi kan bann sef pret ek Farizyen ti demann zot akoz ki zot pa’n reisi aret Zezi. Olye senpleman rakont bann fe ki’n arive, Zezi ti koz dan en fason ki tous leker bann ki i ti ansennyen. (Lik 24:32) I ti servi bann legzanp dan lavi tou le zour pour fer zot konpran son mesaz. (Mat. 13:34) Zezi pa ti donn bann ki ti pe ekout li tro bokou lenformasyon. (Zan 16:12) I ti atir latansyon lo son Papa olye lo li menm. Parey Zezi nou kapab vin bann bon ansennyan selman par fer ‘byen atansyon avek nou lansennyman.’—1 Tim. 4:16.
7. Akoz Zezi ti persevere dan minister?
7 Persevere malgre lendiferans ek lopozisyon: Kantmenm Zezi ti fer bann mirak, bokou dimoun pa ti ekoute li. (Lik 10:13) Menm serten manm son fanmir ti krwar ki i ti’n “perdi latet.” (Mark 3:21) Me kantmenm sa Zezi ti persevere. I ti mentenir en leta lespri pozitif akoz i ti vreman konvenki ki i ti konn laverite ki kapab liber bann imen. (Zan 8:32) Avek led Zeova, nou osi nou determinen pour pa arete.—2 Kor. 4:1.
8, 9. Konman nou kapab imit Zezi par fer bann sakrifis pour lentere sa bon nouvel?
8 Partisip plennman par fer bann sakrifis neseser: Zezi ti sakrifye bann konfor materyel pour son minister. (Mat. 8:20) I ti prese san arete, parfwa menm tar dan lazournen. (Mark 6:35, 36) Zezi ti konnen ki i ti napa bokou letan pour akonplir son minister. Vi ki “letan i kourt,” nou osi nou bezwen imit Zezi par fer bann sakrifis personel an servan nou letan, lenerzi, ek resours.—1 Kor. 7:29-31.
9 Bann premye Kretyen ti bann minis efikas parski zot ti’n ganny ansennyen par Zezi. (Akt 4:13) Nou osi nou kapab akonpli plennman nou minister si nou imit sa pli gran Minis dan listwar imen.—2 Tim. 4:5.