Ansenny lezot pour kontan Zeova
1. Kwa ki atir serten anver Zeova?
1 Eski ou rapel sa premye fwa ki ou ti tann koz lo Zeova? Kwa ki ti atir ou pour vin pros avek li? Bokou dimoun senser pou dir ou ki zot in vin pros avek nou Kreater atraver sa konnesans ki zot in gannyen lo son bann kalite ki pa kapab ganny konpare, espesyalman son konpasyon ek son lanmour.—1 Zan 4:8.
2, 3. Ki mannyer nou kapab servi sa liv Ki Labib i dir pour ed bann etidyan Labib pour ogmant zot lanmour pour Zeova?
2 “Sa i nou Bondye”: Sa liv Ki Labib i dir i atir latansyon lo lanmour Zeova e lenportans pour annan en relasyon personnel avek li. Ki mannyer nou kapab servi sa piblikasyon pour ansenny lezot pour ogmant zot lanmour pour Zeova? Ler nou pe egzamin en nouvo pwen, nou kapab demann bann kestyon ki kapab ed sa dimoun reflesir, par egzanp: “Ki sa laverite i revele lo Zeova?” oubyen “Dan ki fason sa pwen i donn levidans ki Zeova i sa pli bon Papa ki nenport ki dimoun ti pou kontan?” Si nou ansenny dan sa fason, sa i kapab ed sa etidyan devlop en relasyon dirab avek Zeova.
3 Ler nou ed bann etidyan Labib apresye ki i en privilez pour ganny konnesans lo sa sel vre Bondye vivan, zot pou arive rekonnet sa parol ki Izai ti dir, “sa i nou Bondye.” (Iza. 25:9) Ler nou pe eksplik Parol Bondye, nou bezwen met lanfaz lo konman imen pou ganny beni kan Zeova pou akonpli son plan atraver son nouvo gouvernman rwayal anba direksyon Zezi Kri.—Iza. 9:6, 7.
4, 5. Ki savedir kontan Zeova?
4 Levidans lanmour pour Zeova: Nou konnen ki kontan Zeova avek tou nou leker, nanm ek lespri i enplik plis ki senpleman santi ki nou kontan Bondye. Nou bezwen aprann pour annan son fason panse e reste atase avek son panse. (Ps. 97:10) Lanmour pour Bondye i ganny manifeste kan nou obeir tou son bann komannman e kontinyen “anmenn en lavi sen e annan respe pour Bondye,” menm ler nou fer fas avek bann leprev ek lopozisyon.—2 Pyer 3:11; 2 Zan 6.
5 I en plezir pour fer lavolonte Bondye avek lanmour. (Ps. 40:8) Sa etidyan i devret realize ki bann komannman ki Bondye in donn nou i pou benefisye son bann serviter pour touzour. (Det. 10:12, 13) Par viv an armoni avek gidans Zeova, en dimoun i demontre en gran lapresyasyon pour tou Son bann travay merveye. Ed sa etidyan pour konpran ki kan nou mars dan semen lazistis Zeova, sa pou anmenn mwens douler ek latet fermal.
6. Ki benediksyon en dimoun i kapab gannyen akoz i kontan Zeova?
6 Benediksyon pour bann ki kontan Bondye: Zeova i vreman pran swen avek bann ki annan limilite e ki kontan li. I revel avek zot “plan Bondye pli sekre.” (1 Kor. 2:9, 10) Avek en tel konnesans lo plan Bondye, zot annan en bon konprenezon lo lavenir e en vre lespwar. (Zer. 29:11) Bann ki kontan Zeova i resevwar son labonte ekstraordiner. (Egz. 20:6) Zot apresye sa lespwar pour ganny lavi eternel akoz sa gran lanmour ki Zeova i annan pour zot.—Zan 3:16.
7. Lefet ki ou ansenny lezot pour kontan Zeova, ki mannyer ou santi?
7 Pli nou konn plis lo nou Papa ki dan lesyel, pli nou pou annan plis konnesans pour partaz avek lezot. (Mat. 13:52) Pa i en gran privilez pour ansenny lezot, espesyalman nou zanfan pour kontan Zeova! (Det. 6:5-7) Fotespere ki nou, ansanm avek nou etidyan Labib nou kontinyen loue Zeova anmezir ki nou eksperyans ‘labondans son labonte.’—Ps. 145:7.