Kwem Kestyon
◼ Si en koup i anvi servi Lasal Rwayonm pour fer zot maryaz, lo kwa zot pou bezwen diskite avek bann ansyen?
Kan nou pran an konsiderasyon bann prensip Labib ler nou pe fer laranzman maryaz, sa i onor Zeova. Sa i spesyalman vre kan bann maryaz i ganny fer dan Lasal Rwayonm, parski bann dimoun dan kominote i relye tou sa ki ganny fer kot lasal avek nou lorganizasyon. Alor pour ki “tou keksoz [i ganny fer] byen e avek lord” i apropriye pour bann ansyen diskit lo serten size avek sa koup an rapor avek zot maryaz si zot fer en demann pour servi Lasal Rwayonm pour zot maryaz.—1 Kor. 14:40.
En koup ki anvi servi Lasal Rwayonm pour zot maryaz i devret donn en let avek komite servis en kongregasyon ki zwenn dan sa Lasal. Zot devret donn zot let byen davans e zot devret fer konnen ler ek dat ki zot anvi servi lasal. Zot devret gard antet ki bann ansyen pa pou kapab sanz progranm renyon pour fer maryaz. Deplis, sa de fitir marye i bezwen annan bon repitasyon e pe viv an armoni avek bann prensip Labib ek standar drwat Zeova.
Pour fer sir ki sa maryaz i onor nou Bondye, sa koup i devret diskit laranzman zot maryaz avek komite servis avan menm ki bann laranzman in fini ganny finalize. Menm si bann ansyen pa pou esey enpoz zot pwennvi personnel lo sa koup, si okenn keksoz ki pa akseptab ti’n ganny plàn, azisteman i bezwen ganny fer. Sa koup i devret korpere avek bann ansyen. Zis lanmizik dan Kingdom Melodies oubyen bann kantik dan nou liv kantik ki kapab ganny zwe. Okenn dekorasyon ki pou ganny fer lo Lasal Rwayonm oubyen en diferan laranzman sez i bezwen ganny aprouve. Si i pou annan dimoun ki pou tir portre oubyen filmen, sa pa devret ganny fer dan en fason ki pou fer sa lokazyon perdi son vre valer. Bann ansyen i kapab permet ki i annan en repetisyon ki ganny fer kot Lasal Rwayonm osi lontan ki i pa enterfer avek lezot laranzman kongregasyon. Okenn lenvitasyon pa devret ganny mete lo bord. Parkont, bann ansyen i kapab fer en lanons bref dan Renyon Servis pour enform kongregasyon konsernan sa maryaz ki pou ganny fer dan Lasal Rwayonm.
Menm si i pa en lobligasyon ki tou bann ki pou zwe en rol dan sa maryaz i batize, i pa pou apropriye pour permet sa bann ki zot fason viv pa an armoni avek prensip Labib oubyen ki zot kondwit i kapab sok bann ki prezan sa zour pour zwe en rol ladan. En ansyen i devret donn diskour maryaz, si i posib. Bann ansyen i kalifye konman bann ansennyan Parol Bondye, alor zot pli kalifye pour fer resorti bann prensip dan Labib ki apropriye pour sa lokazyon enportan.—1 Tim. 3:2.
Vi ki sa ansyen ki pou fer diskour i annan serten responsabilite an rapor avek sa maryaz, li osi i devret ganny enformen davans lo bann detay konsernan seremoni sa maryaz. I pou zwenn avek sa koup pour demann zot si zot ti annan en bon kondwit pandan ki zot ti pe frekante; sa koup i devret onnet e fran avek li. Si enn ant sa de fitir marye ti’n deza marye avan, i bezwen fourni levidans legal e dapre Labib ki i lib pour marye. (Mat. 19:9) Sa i enkli montre sa ansyen en kopi final sertifika divors dapre lalwa.
Si sa koup i kominik fransman e i byen korpere avek bann ansyen, sa pou fer ki sa maryaz pou vin en lokazyon kot tou dimoun pou dan lazwa.—Prov. 15:22; Ebr. 13:17.