I demann landirans pour prese
1 Pour plis ki 30 an, zapot Pol ti kontan son karyer konman en evanzelizater. Zis parey nenport ki travay ki enportan i annan son bann difikilte, zapot Pol osi ti rankontre serten difikilte dan son minister. (2 Kor. 11:23-29) Toudmenm, sa pa ti dekouraz li pour fer li aret prese. (2 Kor. 4:1) I ti konnen ki i ti pour ganny lafors pour andire avek Zeova pour akonplir son minister. (Fili. 4:13) An rapor avek son legzanp landirans ek fidelite, Pol ti kapab dir: “Imit mwan parey mwan mon imit Kris.”—1 Kor. 11:1.
2 Nou kapab andir bann leprev ozordi: Tou le zour, bokou nou bann frer ek ser i fer fas avek bann manm fanmir, kanmarad travay ek kanmarad lekol ki opoz zot, sikann zot oubyen ki pa enterese avek laverite. (Mat. 10:35; Zan 15:20) Petet sa i kapab vre dan ou ka. De lot kote, ou kapab pe lite avek en problenm lasante oubyen tou le zour ou pe lager pour evit bann distraksyon ek tantasyon ki teste ou lafwa ek landirans. Nou kapab ganny lafors si nou egzamin legzanp bann serviter fidel dan lepase enkli bann Kretyen denozour ki’n arive sirmont bann lobstak ki zot ti pe fer fas avek.—1 Pyer 5:9.
3 Nou kapab ganny lafors pour reste ferm dan nou minister si nou fer sir ki nou’n “met lo [nou] tou bann lekipman batay ki Bondye i donnen.” (Efe. 6:10-13, 15) I osi enportan ki nou priye pour nou kapab andire. Bondye i donn nou son lespri sen pour nou kapab andir bann difikilte. (2 Kor. 6:4-7) Pour reisi dan nou lager spirityel, nou bezwen ekout bann rapel Zeova. (Ps. 119:24, 85-88) Parey en zanfan ki’n ganny en let personnel sorti kot son papa ki byen kontan li, pour lir sa let plizyer fwa, pareyman nou lektir Labib regilye i kapab ranforsi nou relasyon avek Zeova. Nou ganny lasazes pour fer fas avek difikilte atraver letid Labib regilye par les panse Bondye enfliyans nou desizyon e ranforsi nou lentegrite.—Prov. 2:10, 11.
4 Landirans i anmenn benediksyon: Parey i ti leka pour Pol, ler nou andire fidelman kan nou akonplir nou minister, sa i kontribye pour fer leker Zeova kontan e i anmenn benediksyon pour nou e pour lezot. (Prov. 27:11) Annou persevere dan nou minister, kot nou prouve ki nou lafwa i dirab e “ki pli presye ki lor . . . malgre ki i kapab gate [menm si] i ganny teste par dife.”—1 Pyer 1:6, 7.