Anba dominasyon Bondye tou son kreasyon ti ini e anpe

Akoz nou bezwen Rwayonm Bondye?

O konmansman listwar imen, i ti annan en sel Dirizan. Sa ti Zeova, nou Kreater. Zeova ti egzers son lotorite avek lanmour. I ti donn imen en zoli landrwa pour reste, setadir Zarden Edenn e I ti osi donn zot manze annabondans. Deplis, i ti donn zot en travay ki ti vreman gou pour fer. (Zenez 1:28, 29; 2:8, 15) Tou dimoun ti pou ini e anpe si zot ti’n reste anba dominasyon Bondye.

Adan pe tyonbo sa fri ki Ev in ofer li ki zot ti ganny demande pou pa manze. — Bann premye imen pa ti aksepte Bondye konman zot Dirizan

Labib i montre ki en lanz ki ti’n rebele ki pli tar ti ganny apele Satan oubyen Dyab, ti kestyonn drwa Bondye pour dirize. I ti dir ki bann imen ti pou pli ere san gidans ek dominasyon Bondye. Malerezman, nou premye paran, Adan ek Ev ti swiv legzanp Satan e zot osi zot ti rebel kont lotorite Bondye.—Zenez 3:1-6; Revelasyon 12:9.

Vi ki Adan ek Ev ti rezet Bondye konman zot Dirizan, zot ti nepli kapab reste dan Paradi e zot ti perdi sa lespwar pour viv pour touzour avek en lasante parfe. (Zenez 3:17-19) Zot desizyon ti osi afekte tou zot zanfan. Labib i dir ki akoz dezobeisans Adan, “pese in antre dan lemonn e pese in anmenn lanmor.” (Romen 5:12) Pese in osi anmenn en lot problenm vreman serye: “Zonm i domin lo son kanmarad pour fer son maler.” (Eklezyast 8:9) Andotmo, ler bann imen i diriz zot lekor, zot pou ganny bokou difikilte.

BANN IMEN I KONMANS DIRIZE LO LATER

Nimrod pe debout dan en zar arogan. Lezot dimoun pe konstri en batiman. — Nimrod ti rebel kont lotorite Zeova

Premye dirizan imen ki Labib i mansyonnen i Nimrod. Nimrod ti rebel kont lotorite Zeova. Depi sa letan, bann zonm ki annan lotorite in abiz zot pouvwar. Apepre 3,000 an pase, Lerwa Salomon ti ekri: “Mon’n vwar . . . [larm] bann ki ganny kraze e napa personn pour ed zot. Pouvwar i dan kote bann ki pe dominen.”—Eklezyast 4:1.

Keksoz i ankor parey ozordi. En lartik ki Nasyon-z-ini ti pibliye an 2009 ti dir ki deplizanpli move gouvernans i “lakoz tou problenm dan nou lasosyete.”

I’N LER POUR PRAN AKSYON!

Lemonn i bezwen bann pli bon dirizan e en pli bon gouvernman. Sanmenm sa ki nou Kreater in promet!

Portre: Rezilta gouvernman imen. 1. En madanm sorti Lazi pe asize lo en semen sal e son zanfan pe plere. 2. En msye aze i malad lopital. 3. Bann solda pe tir fizi dan en landrwa kot i annan lager. 4. Dimoun pe proteste, zot ankoler, pe kriye e tyonbo bann plakar. 5. En madanm ek son fiy pe debout an deor zot lakour, vit lo zot laport in kase. 6. En lavil ranpli avek lafimen ek bann difil elektrik. — Menm sa pli bon gouvernman imen pa’n reisi rezourd bann gro problenm limanite

Bondye in etabli en Rwayonm andotmo en gouvernman ki pou ranplas tou gouvernman imen e “i pou reste pour touzour.” (Danyel 2:44) Sanmenm sa Rwayonm ki plizyer milyon dimoun i priye pour ki i vini. (Matye 6:9, 10) Me Bondye pa pou diriz sa gouvernman li tousel. O kontrer, Bondye in swazir en dimoun ki’n deza viv lo later pou vin sa Dirizan. Lekel sa Dirizan ki Bondye in swazir?