Prepar byen pour Memoryal
Pa i en gran privilez e en gran lazwa pour bann disip Kris prepar byen pour sa zour swar kot zot pou komemor lanmor Zezi Kri! (Lik 22:19) Ki bann laranzman pratik nou devret fer pour prepar pour Memoryal?
◼ Ler ek Landrwa: Tou dimoun i devret ganny byen enformen konsernan ler ek landrwa egzakt ki Memoryal pou ganny fer. Si plis ki en kongregasyon pou zwenn dan Lasal Rwayonm, i enportan pour ariv aler e sorti dan en fason byen organize akoz letan i limite ant ler ki’n ganny dezinyen pour sa lot rasanbleman. Nou devret fer zefor pour evite ankonbre larantre, trotwar piblik ek parking.
◼ Lenvitasyon: Eski tou proklanmater i annan en serten kantite lenvitasyon? Eski zot familye avek konteni sa lenvitasyon? Eski ou’n egzerse ki mannyer ou pou prezant sa lenvitasyon? Avek ki ou pou donn sa lenvitasyon? I enportan pour fer zefor pour donn tou sa lenvitasyon.
◼ Transpor: Serten dimoun ki enterese e osi serten frer ek ser i kapab bezwen transpor oubyen lezot lasistans. Ki laranzman ki’n ganny fer pour pran swen avek zot?
◼ Lanblenm: Fer sir ki lanblenm pa konmans ganny pase avan soley kouse. Laranzman i devret ganny fer pour servi bann Kretyen swazir ki malad e ki pa kapab prezan sa zour. Dipen ek diven ki apropriye pour sa levennman i devret ganny prevwar e prepare davans.—Vwar Latour Veyer le 1 Mars 2003 paz 10-11 paragraf 14 ek 17.
◼ Lasal Rwayonm: Lasal i devret byen ganny netwaye davans. Bann lasyet, ver, en latab konvenab ek son tapi i devret ganny anmennen kot lasal e met an plas davans. Si en lot landrwa i ganny servi, fer sir ki i annan en bon sistenm son pour ki tou dimoun dan lasistans i kapab tann sa orater. Bann ki pou dan servis lakey ek bann ki pou pas lanblenm i devret ganny swazir e enstrir davans konsernan zot responsabilite, bann prosedir ki korek, e osi konsernan nesesite pour annan en laparans respektab.
Lo sa lokazyon pli enportan, Memoryal lanmor Zezi Kri, nou anvi byen prepare konman en endividi e konman en kongregasyon. Sirman Zeova pour devers son benediksyon lo tou bann ki demontre en gran lapresyasyon pour tou sa ki i’n fer pour limanite atraver sakrifis son Garson byenneme, Zezi Kri.