Prese i gard nou for spirityelman
1. Ki byenfe nou gannyen atraver sa travay predikasyon?
1 Kan nou partisip plennman dan predikasyon nou vin pli for spirityelman e nou ganny plis lazwa. Byensir, premyerman nou partisip dan predikasyon akoz nou anvi fer plezir Zeova. Parkont, kan nou obeir sa lord pour “anons Laparol,” Zeova i devers son benediksyon lo nou e nou osi ganny byenfe dan lezot fason. (2 Tim. 4:2; Iza. 48:17, 18) Alor, ki mannyer prese i kapab fer nou for spirityelman e fer nou ganny plis lazwa?
2. Dan ki fason ki nou predikasyon i fortifye nou?
2 Nou ganny beni e fortifye: Prese i ankouraz nou pour konsantre lo benediksyon ki sa Rwayonm pou anmennen olye konsantre lo bann problenm aktyel. (2 Kor. 4:18) Ler nou eksplik sa ki Labib i ansennyen avek lezot, sa i ranforsi nou lafwa dan bann promes ki Zeova in fer e osi ogmant nou lapresyasyon pour laverite. (Iza. 65:13, 14) An menm tan ki nou ed lezot pour progrese spirityelman e pour “pa fer parti lemonn,” nou ranforsi nou prop determinasyon pour reste separe avek sa lemonn.—Zan 17:14, 16; Rom. 12:2.
3. Ki mannyer predikasyon i ed nou devlop bann kalite Kretyen?
3 Kan nou partisip dan predikasyon, sa i ed nou pour devlop bann kalite Kretyen. Par egzanp, kan nou fer zefor pour “vin tou avek tou dimoun,”sa i ed nou pour devlop plis limilite. (1 Kor. 9:19-23) Anmezir ki nou koz avek bann ki “fatige e dekouraze parey bann mouton ki napa berze,” nou pou aprann vin pli senpatik e pli byen konpran santiman lezot. (Mat. 9:36) Nou devlop landirans ler nou persevere malgre i annan dimoun ki pa enterese e ki opoz nou. Nou ganny plis lazwa kan nou pare pour servi lezot.—Akt 20:35.
4. Ki mannyer ou santi anver predikasyon?
4 Pa i en gran benediksyon pour partisip dan sa travay predikasyon ki loue sa sel Personnaz ki merit nou ladorasyon! Nou minister i fortifye nou. I anmenn en kantite benediksyon pour bann ki fer bokou zefor pour “anons [“plennman sa bon nouvel konsernan,” NW] lagras Bondye.”—Akt 20:24.