Nou minister i reflekte nou lanmour pour Bondye
1. Ki lanmour pour Bondye ti pous Zezi pour fer?
1 Lanmour ti pous Zezi pour akonplir son minister. Tou laspe dan minister Zezi i en temwannyaz son lanmour ki i annan pour Zeova. Zezi ti dir: “Lemonn i bezwen konnen ki mon kontan mon Papa, pour sa rezon mon fer tou parey in konmann mwan.” (Zan 14:31) Konman bann ki pe swiv legzanp Zezi, nou osi nou annan sa privilez pour demontre sa lanmour profon ki nou annan pour Bondye dan nou minister.—Mat. 22:37; Efe. 5:1, 2.
2. Ki mannyer lanmour pour Zeova i annan en lefe lo nou minister?
2 “Ki ou non sen i ganny glorifye”: Kan avek devouman nou sezi tou loportinite ki nou gannyen pour koz avek lezot lo Zeova ek laranzman ki i’n met an plas pour son Rwayonm, nou demontre nou lanmour pour Bondye e an realite nou pe kontribye pour son non ganny glorifye. (Ps. 83:18; Ezek. 36:23; Mat. 6:9) Zis parey i ti leka avek minister Zezi, nou minister i en fason ki nou kontinyelman demontre sa dezir senser ki nou annan pour non Zeova ganny glorifye e pour son lavolonte ganny fer.—Mat. 26:39.
3. Dan ki fason nou lanmour pour Zeova i ed nou pour sirmont bann lobstak?
3 Lanmour i pous nou pour sirmont bann lobstak: Lanmour pour Zeova i kas tou baryer. (1 Kor. 13:4, 7) Zezi ti fer fas avek detrwa sityasyon dan son lavi ki ti’n kapab fer li dekouraze pour kontinyen akonplir son minister. Parkont, kan i ti fer fas avek lobstak, lanmour profon ki i ti annan pour Zeova e son dezir pour fer lavolonte Zeova ti ed li pour pa arete. (Mark 3:21; 1 Pyer 2:18-23) Nou osi nou fer fas avek plizyer defi, me nou lanmour pour Zeova i kapab ed nou pour sirmont zot. Si nou kontinyen swiv byen model ki Kris in kite, nou kapab konfidan e pa dekouraze anmezir ki nou akonplir nou minister. Kantmenm nou ganny lopozisyon dan fanmir, lasante pe vin deplizanpli pa bon, laz pe avanse oubyen dimoun an zeneral pa demontre lentere, tousala i kapab annan en lefe lo nou me sa pa anpes nou demontre nou lanmour pour Zeova par kontinyen akonplir nou minister pli byen posib.
4. Ki privilez nou annan pour demontre nou lanmour pour Zeova?
4 Lanmour i pwisan, e i en privilez pour ganny sa loportinite pour demontre nou lanmour senser pour Bondye dan nou minister. (1 Kor. 13:13) Anmezir ki nou apros sa zour kot non Zeova pou ganny glorifye enn fwa pour tou, fotespere ki nou “lanmour i ogmante e vin plis ankor.”—Fili. 1:9; Mat. 22:36-38.