Lagrenn in mir e pare pour larekolt
1. Ki travay enportan ki pe ganny fer?
1 Apre ki Zezi ti’n rann temwannyaz avek en madanm Samariten, i ti dir avek son bann disip: “Lev lizye e get byen bann plantasyon, bann lagrenn in mir e in pare pour larekolt.” (Zan 4:35, 36) En rekolt spirityel ti pe deza ganny fer e Zezi ti kapab vwar konman sa travay ti pou ete a lavenir dan lemonn antye. Zezi i ankor byen aktif dan sa travay rekolt kot i ete dan lesyel. (Mat. 28:19, 20) Kwa ki endike ki sa travay pe entansifye anmezir ki i ariv lo son pik?
2. Kwa ki endike ki sa rekolt pe ogmante dan lemonn antye?
2 Rekolt pe ganny fer dan lemonn antye: Pandan lannen servis 2009, ti annan en logmantasyon 3.2 poursan proklanmater dan lemonn antye. Dan bann pei kot sa travay i ganny enterdi i’n annan en logmantasyon 14 poursan. Lakantite letid Labib ki ti ganny raporte sak mwan ti plis ki 7,619,000. Sa sif i plis ki lakantite proklanmater ki ti ganny rikorde, e i lanmwatye en milyon plis ki lakantite letid Labib ki ti ganny raporte son lannen avan. Anmezir ki sa travay i ogmante dan plizyer rezyon, i osi annan plis demann pour bann misyonner ki’n ganny formen dan lekol Gilead. Bokou lagrenn pe ganny rekolte dan plizyer pei kot i annan bann teritwar ki dimoun i koz en lot langaz. I evidan ki Zeova pe akseler sa travay pandan dernyen zour sa rekolt. (Iza. 60:22) Eski ou annan en pwennvi pozitif lo “plantasyon” dan ou teritwar?
3. Ki serten i kapab dir konsernan sa travay rekolt dan zot teritwar?
3 Rekolt dan ou teritwar: Serten i kapab dir, “Mon teritwar pa tro prodiktif.” I vre ki i annan teritwar ki pa paret sitan prodiktif konpare avek lezot landrwa, oubyen konpare avek dan lepase. Alor, serten Temwen i kapab panse ki laplipar dimoun in fini aksepte laverite dan sa bann teritwar e aprezan zot pou zwenn zis enn de ki reste. Me eski sa i vreman le ka?
4. Ki latitid nou devret devlope anver nou minister e akoz?
4 Depi konmansman ziska finisyon, sa travay rekolt i enplik bokou zefor. Remarke ki mannyer sa travay i irzan atraver sa ki Zezi ti dir: “I annan en gran rekolt ki’n pare me napa ase zouvriye. Pour sa rezon, sipliy met rekolt pour anvoy zouvriye.” (Mat. 9:37, 38) Met rekolt i Zeova e se li ki dir kan e kote rekolt pou ganny fer. (Zan 6:44; 1 Kor. 3:6-8) Ki nou responsabilite? Labib i donn nou larepons: “Dan bomaten senm ou lagrenn e ziska aswar pa les ou lanmen repoze.” (Ekle. 11:4-6) Wi, i pa ler pour nou repoze la ki sa travay rekolt pe ariv lo son pik!
5. Akoz nou devret kontinyen pres avek devouman dan bann teritwar kot dimoun pa paret enterese?
5 Kontinyen rekolte: Menm si nou’n kouver nou teritwar plizyer fwa e i paret ki bann dimoun pa enterese, nou annan bon rezon pour nou travay avek devouman e gard antet ki sa travay i irzan. (2 Tim. 4:2) Bann gran boulversman ki pe arive dan lemonn i fer dimoun sanz zot latitid e pans pli o serye lo zot lavenir. Anmezir ki bann zenn i grandir, zot kapab santi ki i neseser pour rod sekirite ek lape lespri. Si nou persiste dan predikasyon sa pou kapab annan lefe menm lo lezot dimoun. Wi, petet bann ki pa ti ekoute dan lepase i kapab montre lentere a lavenir. Menm bann ki rezet sa mesaz volonterman i osi merit ganny averti.—Ezek. 2:4, 5; 3:19.
6. Si nou teritwar pa sitan fasil, kwa ki pou ed nou gard nou devouman?
6 Si i difisil pour prese dan nou teritwar, kwa ki pou ed nou gard nou devouman? Petet nou kapab partisip dan lezot form predikasyon, par egzanp pres dan teritwar biznes oubyen donn temwannyaz par telefonn apard ki predikasyon portanport. Oubyen nou kapab servi diferan prezantasyon ki fer ki nou lapros pou diferan. Nou kapab sanz nou progranm e pres apre ler travay, oubyen dan bann lezot moman ki nou konnen ki dimoun pou kot lakour. Petet nou kapab esey aprann en nouvo langaz kot nou pou kapab partaz sa bon nouvel avek lezot group dimoun. Nou kapab fer plis dan nou minister par fer pionye ordiner. Oubyen nou kapab al viv dan en landrwa kot i annan pli ptigin travayer dan sa travay rekolt. Si nou annan en latitid pozitif anver sa rekolt, nou pou fer nou mye pour partisip plennman dan sa travay tre enportan.
7. Ziska kan ki nou bezwen kontinyen fer sa travay rekolt?
7 Bann fermye i annan zis en ptigin letan pour fer rekolt, alor zot pa pran repo oubyen ralanti ziska ki zot travay i fini. Pareyman, nou merit vwar sa travay rekolt spirityel konman en travay irzan. Ziska kan ki nou bezwen kontinyen fer sa travay? Tou dilon bann dernyen zour ziska “lafen.” (Mat. 24:14; 28:20) Parey pli gran Minis Zeova, nou anvi fini sa travay ki i’n konfye nou. (Zan 4:34; 17:4) Alor, annou kontinyen akonplir nou minister avek devouman, lazwa e avek en latitid pozitif ziska lafen. (Mat. 24:13) Sa travay rekolt pa ankor fini!
[Pwen adisyonnel]
Depi konmansman ziska finisyon, sa travay rekolt i enplik bokou zefor