Bann proklanmater devoue i bezwen fer lapriyer ek meditasyon
1. Kwa ki ti ed Zezi pour gard son minister konman son priyorite?
1 Zezi ti’n pas en lannwit pour geri dimoun e sas bann demon. Son lannmen, kan son bann disip ti vwar li, zot ti ankouraz li pour kontinyen fer sa bann mirak an dizan: “Tou dimoun pe rod ou.” Me, Zezi pa ti pou les sa vin en lobstak pour li akoz son priyorite ti pour anons sa bon nouvel. I ti reponn zot: “Annou al dan bann vilaz dan zalantour pour ki mon a kapab pres Levanzil laba osi; se pour sa rezon ki mon’n vini.” Kwa ki ti ed Zezi pour kontinyen konsantre lo son priyorite? I ti’n lev boner pour priye e medite. (Mark 1:32-39) Ki mannyer lapriyer ek meditasyon i kapab ed nou osi pour vin bann proklanmater devoue?
2. Kwa ki nou kapab medit lo la ki pou ed nou pour gard nou devouman dan predikasyon?
2 Medit lo kwa? Zezi ti remarke ki bann dimoun ti “fatige e dekouraze parey bann mouton ki napa berze.” (Mat. 9:36) Nou osi nou kapab reflesir lo ki kantite sa bon nouvel pou ed bann dimoun e ki letan i kourt. (1 Kor. 7:29) Nou osi kapab medit lo bann travay ek bann kalite Zeova, lo sa privilez ki nou annan pour vin enn son Temwen, e osi lo sa bann trezor spirityel ki nou’n aprann dan Parol Bondye ki serten dimoun dan nou teritwar pa konnen.—Ps. 77:11-13; Iza. 43:10-12; Mat. 13:52.
3. Kan ki nou kapab medite?
3 Kan ki nou devret medite? Serten dimoun i lev gran maten kan i ankor trankil pour medite zis parey Zezi ti fer. Lezot i vwar li pli bon pour medit dan aswar avan zot al dormi. (Zen. 24:63) Nou kapab fer letan pour medite menm si nou annan en progranm sarze. Serten i fer li kan zot dan bis. Lezot i medit dan zot letan dezennen akoz zot pa ganny okenn distraksyon. Bokou i remarke ki kan zot medite avan zot al prese, menm si i zis pour en ptigin letan, i ed zot pour pres avek plis devouman e avek lardyes.
4. Akoz nou devret medite?
4 Lapriyer ek meditasyon pou ogmant nou dezir pour servi Zeova, ed nou fer nou ladorasyon vin pli enportan dan nou lavi, e fer nou pli determinen pour kontinyen prese. Kan Zezi, pli gran Minis Bondye ti medite, sa ti anmenn byenfe pour li e sa i kapab leka pour nou osi.