En led pour bann fanmir

1. Ki mannyer Saba ki bann fanmir Izraelit ti fer tou le semenn ti anmenn byenfe pour zot?

¹ Saba ti en provizyon ki Zeova ti fer ki ti anmenn byenfe pour bann fanmir. Sa zour, bann Izraelit pa ti pe fer okenn travay ki zot ti abitye fer tou le zour e zot ti annan letan pour reflesir lo bann bon keksoz ki Zeova ti’n fer pour zot e lo zot relasyon avek li. Bann paran ti kapab sezi sa loportinite pour enkilke Lalwa dan leker zot zanfan. (Det. 6:6, 7) Saba ti donn pep Zeova letan sak semenn pour konsantre plis lo zot relasyon avek li.

2. Ki Saba i ansenny nou lo Zeova?

² Byensir, Zeova nepli ekspekte ki bann fanmir i fer Saba. Me kantmenm sa, sa lalwa i ansenny nou en keksoz lo nou Bondye. I’n toultan vreman enterese avek byennet son pep lo plan spirityel. (Iza. 48:17, 18) Ozordi, Zeova i demontre sa menm lentere senser dan nou, par sa laranzman Ladorasyon an fanmir.

3. Ki bi Ladorasyon an fanmir?

³ Ki bi Ladorasyon an fanmir? Zanvye 2009, Letid Labib Kongregasyon ti konmans ganny fer menm zour ki Lekol Minister Teokratik ek Renyon Servis. En rezon ki sa azisteman ti ganny fer se pour donn bann fanmir sa loportinite pour dedye en zour spesifik sak semenn pour fer ladorasyon an fanmir, pour zot ranforsi zot relasyon avek Zeova. Sak fanmir ti ganny ankouraze pour fer zot letid fanmir sa zour ki nou ti abitye fer letid liv si i apropriye pour zot, e pran letan sa zour pour koz lo Labib e etidye dapre bezwen lafanmir.

4. Eski Ladorasyon an fanmir i devret ganny fer zis pour enn erdtan? Eksplike.

⁴ Pour nou asiste Letid Liv Kongregasyon, nou ti bezwen pran letan pour sanze, vwayaze e fer lezot keksoz ankor. Pour laplipar nou, i kapab ki i ti pran nou bokou plis letan pour fer sa ki ti neseser pour nou kapab asiste sa renyon ki ti al zis pour enn erdtan. Aprezan, vi ki i annan sa azisteman dan nou progranm renyon, nou annan en zour pour ador Zeova an fanmir. Alor, Ladorasyon an fanmir pa neseserman merit ganny fer zis pour enn erdtan. O kontrer, nou devret reflesir lo bezwen ek febles nou fanmir e deside ki kantite letan ki neseser.

5. Eski zot devret pas tou zot letan pour diskit ansanm? Eksplike.

⁵ Eski nou devret servi sa letan zis pour diskit ansanm? Kan bann koup marye ek fanmir ki annan zanfan i diskit lo bann topik dan Labib ansanm, zot ankouraz kanmarad. (Rom. 1:12) Sa i fer lafanmir vin pli pros avek kanmarad. Alor, zour ki zot fer Ladorasyon an fanmir, zot diskisyon i devret prensipalman baze lo Labib. Me, sak manm fanmir i osi kapab pran letan pour etidye endividyelman. Par egzanp, apre ki zot in fini diskit ansanm, lafanmir i kapab reste dan konpanni kanmarad an menm tan ki sak manm fanmir i kontinyen etidye endividyelman. Petet zot kapab fini prepar zot renyon oubyen lir bann magazin. Serten fanmir i deside pour pa alim televizyon ditou sa zour.

6. Ki mannyer sa diskisyon i kapab ganny fer?

⁶ Ki mannyer sa diskisyon i kapab ganny fer? I pa neseser ki i toultan ganny fer dan form kestyon ek larepons. Pour gard Ladorasyon an fanmir vivan e enteresan, bokou fanmir in fer en progranm en pe parey sa renyon ki nou fer dan lasemenn. Zot diviz sa diskisyon an plizyer parti e abord li dan diferan fason. Par egzanp, petet zot lir Labib, prepar en bout zot renyon e egzers bann prezantasyon pour predikasyon ansanm. I annan serten sizesyon lo paz 6.

7. Ki paran i devret fer pour ki i annan en bon lanbyans sa zour?

⁷ Ki paran i devret fer pour ki i annan en bon lanbyans sa zour? Ou fanmir pou pli byen aprann dan en latmosfer ki kalm, kot i annan lanmour. Parfwa ou kapab etidye deor si i fer botan. Pa ezite pour pran brek kan i neseser. Serten fanmir i pran en pti rafresisman ler zot fini Ladorasyon an fanmir. Paran pa devret dispit avek zot zanfan e disiplin zot pandan Ladorasyon an fanmir, me petet zot pou bezwen met serten letan dekote pour adres serten problenm oubyen move latitid ki zot in remarke dan zot zanfan. Me par kont, petet i pou pli bon diskit bann size delika ki konsern en zanfan, avek sa zanfan li menm, an prive, dan en lot moman dan lasemenn, pour ki i pa santi li anbarase devan lezot zanfan. Ladorasyon an fanmir pa devret en moman annwiyan oubyen tro serye, me i devret reflekte nou Bondye ere ki nou adore.—1 Tim. 1:11.

8, 9. Ki preparasyon bann sef lafanmir i bezwen fer?

⁸ Ki preparasyon bann sef fanmir i kapab fer? Lafanmir pou ganny bokou plis byenfe si sef lafanmir i prepar davans pour sak Ladorasyon an fanmir. I kapab fer sa par deside ki pou diskit lo la e ki mannyer i pou ganny aborde. (Prov. 21:5) I byen pour en msye diskit avek son madanm lo sa size avan. (Prov. 15:22) Zot bann sef lafanmir, akoz tanzantan zot pa demann zot zanfan ki zot ti a kontan diskit lo la? Si zot fer sa, zot pou kapab arive konpran ki zot zanfan i vreman konsernen avek e kwa ki enteres zot.

⁹ Laplipar di tan, bann sef lafanmir pa pou bezwen pas en kantite letan pour prepare pour Ladorasyon an fanmir sak semenn. I tre probab ki lafanmir pou byen kontan pour fer serten keksoz sak semenn, alor sef lafanmir pa pou bezwen konpletman fer en nouvo progranm sak fwa. I kapab vwar li dan son lavantaz si i fer son preparasyon pour sa lot semenn ki swiv, zis apre ki zot termin sak Ladorasyon an fanmir, akoz dan sa moman, bezwen spirityel son fanmir i ankor fre dan son lespri. Serten sef lafanmir i fer en pti progranm e met li dan en landrwa kot lafanmir antye i kapab vwar byen, par egzanp lo frizider. Sa i fer lafanmir antisipe pour sa zour arive, ed zot devlop lantouzyasm e donn zot letan pour prepare si i neseser.

10. Ki bann ki reste tousel i kapab fer pandan Ladorasyon an fanmir?

¹⁰ Me si mon reste mon tousel? Bann ki reste tousel i kapab servi sa zour pour etidye personnelman. En bon progranm letid de baz i devret enkli lir Labib, prepar renyon e lir Latour Veyer ek Awake! Serten proklanmater i konplemant sa progranm par enkli en proze ladan. Parfwa, i kapab ki zot pou anvi envit en lot proklanmater oubyen en fanmir pour vin diskit lo bann topik ankourazan dan Labib.

11, 12. Ki serten byenfe nou gannyen kan nou fer Ladorasyon an fanmir tou le semenn?

¹¹ Ki byenfe nou gannyen ler nou fer Ladorasyon an fanmir tou le semenn? Bann ki partisip dan vre ladorasyon avek tou zot leker i vin pli pros avek Zeova. An plis ki sa, kan bann manm fanmir i partisip dan ladorasyon ansanm, sa i ranforsi sa lyen familyal antre zot. En koup ki’n marye ti ekrir sa lo sa benediksyon ki zot in gannyen: “Nou en koup pionye ki napa zanfan, alor nou vreman esper avek enpasyans sa zour ki nou fer nou Ladorasyon an fanmir. Nou santi ki nou pe vin pli pros avek kanmarad e osi avek nou Papa dan lesyel. Konmela, ler nou leve sa zour ki nou’n progranmen pour etidye ansanm, nou dir avek kanmarad: ‘Devinen ki i annan tanto? I annan Ladorasyon an fanmir!’”

¹² Sa laranzman konsernan ladorasyon an fanmir i osi ed bann fanmir ki vreman annan en kantite pour fer. En manman tousel ki pe elve de garson, e ki an menm tan pe fer pionye ordiner ti ekrir: “Dan lepase, nou pa ti pe arive fer letid fanmir tou le semenn. Nou pa ti zanmen fer li regilyerman e dan en fason konsistan, akoz mon ti fatige. Mon zis pa ti pe arive fer tou keksoz ansanm. Alor, mon pe ekrir zot pour remersye zot en kantite pour sa laranzman Ladorasyon an fanmir ki’n ganny fer. Nou’n reisi fer letid fanmir tou le semenn e nou pe ganny en kantite byenfe.”

13. Kwa ki pou montre si ou fanmir pe ganny byenfe atraver sa laranzman?

¹³ Zis parey Saba, Ladorasyon an fanmir i en kado ki nou Papa in donnen pour ed bann fanmir. (Zak 1:17) Lakantite byenfe ki bann fanmir Izraelit ti gannyen spirityelman ti depan lo lafason ki zot ti servi sa laranzman. Pareyman, lafason ki nou servi sa zour pour Ladorasyon an fanmir pou montre ki kantite byenfe nou fanmir pou gannyen. (2 Kor. 9:6; Gal. 6:7, 8; Kol. 3:23, 24) Si ou fanmir i byen servi sa laranzman, parey sa psalmis zot pou kapab dir: “I bon pour mwan apros avek Bondye. Mon’n pran refiz dan Souvren Senyer Zeova.”—Ps. 73:28.

[Ekstre lo paz 5]

Ladorasyon an fanmir pa devret annwiyan oubyen tro serye, me i devret reflekte sa Bondye ere ki nou adore

[Bwat lo paz 6]

ANMASE

Detrwa lide ki kapab ganny enkli dan progranm Ladorasyon an fanmir

Labib:

• Lir en porsyon dan lektir Labib pour lasemenn ansanm. Serten resi Labib in ganny ekrir dan en fason ki en dimoun i kapab fer narater e lezot i kapab lir parol lezot personnaz dan sa resi.

• Fer en dram baze lo en porsyon dan zot lektir Labib.

• Donn sak manm fanmir en sapit Labib pour lir e apre, fer zot ekrir enn oubyen de kestyon ki zot annan lo sa lenformasyon ki zot in lir. Apre sa, fer resers lo sa bann kestyon ansanm.

• Sak semenn fer en pti kart ki annan en verse lo la. Esey rapel sa verse e eksplik li. Fer en koleksyon sa bann kart e pas lo la tou le semenn pour vwar konbyen verse ou kapab rapel.

• Ekout lanrezistreman lektir Labib anmezir ou pe swiv dan ou Labib.

Renyon:

• Prepar en bout zot renyon ansanm.

• Egzers bann kantik Rwayonm ki’n ganny progranmen pour renyon son semenn swivan.

• Si en manm dan lafanmir i annan en ekspoze dan Lekol Minister Teokratik oubyen en demonstrasyon dan Renyon Servis, diskit lo bann fason ki i kapab ganny fer oubyen fer li egzers son ekspoze oubyen demonstrasyon devan lafanmir.

Bezwen lafanmir:

• Egzamin lenformasyon dan liv Young People Ask oubyen liv Ekout sa Gran Ansennyan.

• Fer en legzersis lo konman pour fer fas avek en sityasyon ki kapab leve kot lekol.

• Fer en legzersis kot paran ek zanfan i sanz zot rol. Sa zanfan i fer resers lo en size e apre i rezonn avek son paran lo la.

Predikasyon:

• Fer bann legzersis pour prepar bann prezantasyon pour zot servi dan wikenn.

• Diskit bann lobzektif rezonnab ki lafanmir i kapab etabli pour zot kapab ogmant zot partisipasyon dan predikasyon pandan sezon Memoryal oubyen dan vakans.

• Donn sak manm fanmir detrwa minit pour fer resers lo ki mannyer zot pou reponn detrwa kestyon ki dimoun i kapab demande dan predikasyon e apre fer zot fer en pti demonstrasyon.

Lezot sizesyon:

• Lir bann lartik dan bann nouvo magazin ansanm.

• Fer sak manm fanmir lir en lartik ki enteres li dan nouvo magazin davans e apre, fer li koz lo la.

• Tanzantan envit en proklanmater oubyen en koup pour zwenn ansanm avek zot dan Ladorasyon an fanmir e petet entervyou zot.

• Get enn nou bann film e diskit lo la.

• Diskit ansanm “Young People Ask” oubyen “For Family Review” dan Awake!

• Diskit ansanm “Teach Your Children” oubyen “For Young People” dan Latour Veyer.

• Lir e diskit lo en parti dan Yearbook sa lannen oubyen en lot piblikasyon ki fek ganny lanse dan nou dernyen lasanble distrik.

• Apre ki zot in asiste en lasanble, revwar bann pwen enteresan dan sa lasanble.

• Obzerv en keksoz spesifik ki Zeova in kree, e apre, an fanmir diskite ki sa kreasyon i ansenny nou lo Zeova.

• Travay lo en proze ansanm, par egzanp, en model, map oubyen latab.