Form ou zanfan pour vin en proklanmater
1. Ki Psonm 148:12, 13 i ankouraz bann paran Kretyen pour fer?
1 Zeova i envit bann zenn pour loue li. (Ps. 148:12, 13) Alor, bann paran Kretyen i devret fer plis ki zis ansenny zot zanfan laverite ki dan Labib ek lalwa Bondye lo moralite. Zot devret osi form zot zanfan pour vin bann proklanmater sa bon nouvel. Ki mannyer sa i kapab ganny fer ptitapti?
2. Ki mannyer bon legzanp en paran i kapab annan lefe lo son zanfan?
2 Bon legzanp: Ziz Gideonn ti dir avek son 300 zonm: “Zot devret get mwan pour zot aprann.” (Ziz 7:17) Normalman zanfan i kontan get zot paran e imit sa ki zot fer. En papa i travay aswar, me olye al dormi kan i arive Sanmdi bomaten, i anmenn son bann zanfan dan predikasyon menm si i vreman fatige. Menm si i pa pe dir nanryen, an realite par son aksyon i pe ansenny son bann zanfan ki predikasyon i vreman enportan. (Mat. 6:33) Eski ou bann zanfan i vwar ou pe partisip dan diferan laspe nou ladorasyon, par egzanp fer lapriyer, fer lektir Labib, fer komanter dan renyon e al prese? Byensir, ou pa pou kapab donn en legzanp parfe. Me ou bann zanfan pou pli pare pour reazir anver ou zefor pour ansenny zot pour ador Zeova, si zot vwar ou pe fer li avek devouman.—Det. 6:6, 7; Rom. 2:21, 22.
3. Ki bann lobzektif spirityel bann paran i devret ptitapti ed zot zanfan etablir e atenn?
3 Atenn bann lobzektif ptitapti: Paran pa zanmen aret form zot zanfan pour zot kapab marse, koze, sanze e fer lezot keksoz lo zot menm. Lobzektif bann zanfan i sanze anmezir ki zot laz i sanze. Si sa bann paran i Kretyen, zot pou osi ed zot zanfan pour etablir oubyen atenn bann lobzektif spirityel dapre zot laz oubyen abilite ki zot annan. (1 Kor. 9:26) Eski ou pe ansenny ou zanfan konman pour fer komanter dan zot prop mo e prepar zot ekspoze dan Lekol Minister Teokratik zot menm? (Ps. 35:18) Eski ou pe form zot pour partisip dan diferan laspe nou minister? Eski ou pe ankouraz zot pour etablir sa lobzektif pour batize e antreprann servis a plen tan? Eski ou souvan organiz bann moman kot zot kapab frekant bann proklanmater ki zwaye e devoue ki pou kapab ankouraz zot?—Prov. 13:20.
4. Ki byenfe bann zanfan ki zot paran i konmans form zot depi byen zenn dan predikasyon i gannyen?
4 En psalmis ti dir: “O Bondye, ou’n ansenny mwan depi mon lanfans, e ziska aprezan mon ankor pe koz lo ou bann travay merveye.” (Ps. 71:17) Konmans form ou zanfan depi byen zenn pour li vin en proklanmater. Sa bon fondasyon spirityel ki ou ed zot etablir pou vreman anmenn byenfe pour zot kan zot vin adilt.—Prov. 22:6.