Demontre pasyans dan nou minister
1. Ki mannyer Zeova in demontre pasyans anver imen?
1 Bondye i vreman pasyante avek imen. (Egz. 34:6; Ps. 106:41-45; 2 Pyer 3:9) Nou kapab vwar enn bann pli gran legzanp son pasyans ki ranpli avek bokou lanmour atraver sa travay predikasyon ki pe ganny fer dan lemonn antye. Menm si Zeova in demontre pasyans anver imen pour preski 2,000 an, i kontinyelman atir bann ki annan en leker senser anver li. (Zan 6:44) Ki mannyer nou kapab demontre sa menm pasyans parey Zeova dan nou minister?
2. Ki mannyer nou kapab demontre pasyans kan nou travay dan nou teritwar?
2 Predikasyon portanport: Nou imit pasyans Zeova par ‘kontinyen pres’ dan bann teritwar kot i annan serten dimoun ki pa ankor demontre lentere. (Akt 5:42) Avek pasyans, nou andire kan dimoun i boufonn nou, pa demontre lentere e kan zot opoz nou travay. (Mark 13:12, 13) Nou osi demontre ki nou annan pasyans kan nou persevere dan nou zefor pour aroz lagrenn laverite menm kan i pa fasil pour retrouv bann dimoun ki annan lentere.
3. Akoz i demann pasyans kan nou fer retourn vizit ek letid Labib?
3 Letid Labib: Nou bezwen pasyans pour fer pouse en plant. Nou kapab pran swen avek li, me nou pa kapab fer li pous pli vit. (Zak 5:7) Pareyman, i pran letan pour en dimoun grandi spirityelman. (Mark 4:28) I kapab difisil pour bann dimoun ki nou etidye avek abandonn zot bann fo krwayans relizye oubyen koutim ki pa annakor avek Labib. Nou pa devret esey fer nou etidyan devlop son spirityalite pli vit par met presyon lo li pour fer bann sanzman. Nou pou bezwen demontre pasyans e donn lespri sen Bondye ase letan pour travay lo leker nou etidyan.—1 Kor. 3:6, 7.
4. Ki mannyer pasyans i kapab ed nou pour pres avek nou fanmir ki pa Temwen dan en fason efikas?
4 Fanmir ki pa Temwen: Menm si nou vreman anvi ki nou bann fanmir ki pa Temwen aprann laverite, nou demontre pasyans par esper sa bon moman pour partaz nou lafwa avek zot e fer atansyon ki nou pa donn zot tro bokou lenformasyon. (Ekle. 3:1, 7) Antretan, nou kontinyen demontre en bon legzanp e pare pour eksprim nou lafwa avek ladouser, labonte ek respe. (1 Pyer 3:1, 15, 16) Wi, kan nou demontre pasyans dan nou minister, nou pou vin pli efikas e nou pou fer plezir nou Papa ki dan lesyel!