Pran konman legzanp bann profet: Yona
1. Ki bann zoli kalite Yona ti annan?
1 Kwa ki vin dan ou lespri kan ou mazin profet Yona? Serten i kapab mazinen ki i ti en kapon oubyen annan en leker dir. Me anfet, i ti demontre limilite, kouraz ek leta lespri sakrifis. Ki mannyer nou kapab imit legzanp Yona ek son bann zoli kalite?—Zak 5:10.
2. Ki mannyer nou kapab imit limilite Yona?
2 Limilite: O konmansman, Yona ti sove e al dan en lot direksyon olye al kot Zeova ti’n anvoy li. Sa pa sirprenan akoz bann Asiryen ti vreman vyolan e Niniv ti renonmen konman en “lavil ki vers disan.” (Nao. 3:1-3) Kantmenm sa, Zeova ti disiplin Yona ki ti demontre limilite par aksepte son misyon kan i ti ganny en dezyenm sans pour fer li. (Prov. 24:32; Yona 3:1-3) Menm si o konmansman i ti ezite fer lavolonte Zeova, finalman i ti fer li. (Mat. 21:28-31) Eski nou osi nou determinen pour pres sa bon nouvel, menm si nou ganny disiplinen oubyen ganny en teritwar difisil pour pres ladan?
3. Ki laspe dan ou minister ki demann kouraz ek leta lespri sakrifis?
3 Kouraz ek leta lespri sakrifis: Ler Yona ti realize ki son move desizyon ti’n met lavi bann maren an danze, i ti pare pour sakrifye son prop lavi. (Yona 1:3, 4, 12) Plitar, kan i ti pe akonpli son misyon Niniv, i ti al ziska dan milye lavil, petet pour rod en landrwa apropriye pour proklanm sa mesaz zizman Zeova. Sa ti bann aksyon en profet Bondye ki ti annan bokou kouraz me pa enn ki ti en kapon! (Yona 3:3, 4) Ki nou pou dir lo nou ozordi? Pa nou bezwen kouraz sorti kot Bondye pour nou kapab rann temwannyaz plennman kan nou fer fas avek lopozisyon. (Akt 4:29, 31) Nou bezwen annan en leta lespri sakrifis pour nou envesti nou letan ek resours dan nou minister.—Akt 20:24.
4. Akoz nou devret pran letan pour reflesir lo legzanp bann profet Zeova?
4 Sak fwa ou lir en resi lo en profet Zeova, ou pou benefisye si ou esey met ou lekor dan son sityasyon. Demann ou lekor: ‘Ki mannyer mon ti pou reazir? Ki mannyer mon kapab demontre son bann bon kalite dan mon lavi?’ (Ebr. 6:11, 12) Lezot lartik dan Nou Minister Rwayonm pou egzamin serten leson enportan ki nou kapab aprann avek lezot profet fidel Zeova.