Kwa ki motiv nou pour prese?
1. Lanmour pour lekel ki motiv nou pour prese?
1 Pres sa bon nouvel lo Rwayonm Bondye i sa travay pli enportan ki nou kapab fer ozordi. Anfet, atraver sa aktivite, nou obeir sa de pli gran komannman, setadir kontan Zeova e osi kontan nou prosen. (Mark 12:29-31) Lanmour i en gran motivasyon ki kapab fer nou devoue dan nou minister.—1 Zan 5:3.
2. Ki mannyer nou demontre lanmour pour Zeova atraver nou travay predikasyon?
2 Lanmour pour Zeova: Lanmour pour nou pli bon Zanmi, Zeova, i pous nou pour defann li. Pour apepre 6,000 an, son non in ganny sali par Satan. (2 Kor. 4:3, 4) Alor, dimoun i krwar ki Bondye i tourmant bann peser dan lanfer dife, ki Bondye i en Trinite ki en mister, e ki i pa enterese avek imen. Bokou in menm arive krwar ki i pa egziste. Pa nou vreman anvi ki dimoun i konn laverite lo nou Papa dan lesyel! Tou sa zefor ki nou fer pour vin en temwen Bondye i donn li bokou lazwa e fer Satan fristre.—Prov. 27:11; Ebr. 13:15, 16.
3. Ki mannyer nou demontre lanmour pour nou prosen atraver nou travay predikasyon?
3 Lanmour pour nou prosen: Sak fwa nou rann temwannyaz avek en dimoun, nou demontre lanmour anver li. Bann dimoun i vreman bezwen antann sa bon nouvel pandan sa bann letan difisil. Bokou i parey bann zabitan lavil Niniv dan letan Yona ki pa ti “konn diferans ant zot lanmen drwat ek zot lanmen gos.” (Yona 4:11) Nou minister i montre dimoun konman pour reisi dan lavi e pour viv ere. (Iza. 48:17-19) I donn zot lespwar. (Rom. 15:4) Si zot ekoute e azir an armoni avek sa ki zot aprann, zot “pou ganny sove.”—Rom. 10:13, 14.
4. Kwa ki Zeova pa pou zanmen oubliye?
4 Bann bon zanfan pa demontre lanmour pour zot paran zis parler. Me zot toultan fer zefor pour demontre lanmour anver zot paran. Pareyman, sa gran lanmour ki nou annan pour Zeova ek nou prosen pou motiv nou pour sezi bann loportinite pour rann temwannyaz dan tou moman e non pa zis letan nou dan predikasyon. Nou pou prese san arete. (Akt 5:42) En tel lanmour pa pou zanmen ganny oubliye par Zeova.—Ebr. 6:10.