Pran konman legzanp bann profet: Mika
1. Ki kestyon profet Mika ti’n kapab mazin lo la, me akoz ki son predikasyon pa ti anven?
1 ‘Kan lafen sa move lemonn koronpi pou finalman arive?’ Profet Mika ti’n kapab mazin lo sa menm kestyon anmezir ki i ti pe anons mesaz zizman Zeova kont Rwayonm Izrael ek Zida. Me, son predikasyon pa ti anven. An 740 A.N.L., pandan ki Mika ti ankor vivan, parol Zeova kont Samari ti ganny akonplir. (Mik. 1:6, 7) Pli tar, an 607 A.N.L., Zerizalenm ti ganny detri. (Mik. 3:12) Ki mannyer nou kapab imit legzanp Mika anmezir ki nou pe esper zour zizman Zeova?
2. Konman e akoz nou demontre pasyans anmezir nou esper zour Zeova?
2 Annan pasyans: Mika ti dir: “Se Zeova ki mon pou kontinyen veye. Mon oule kontinyen esper Bondye ki pou sov mwan.” (Mik. 7:7) Byensir, Mika pa ti zis esper lafen san fer nanryen. I ti reste okipe konman profet Zeova. Anmezir ki nou esper zour Zeova, nou devret “anmenn en lavi sen e annan respe pour Bondye.” (2 Pyer 3:11, 12) Pasyans Zeova i donn sak dimoun ase letan pour repantir. (2 Pyer 3:9) Alor, nou devret pran aker lavertisman sorti kot Bondye pour imit pasyans sa bann profet.—Zak 5:10.
3. Akoz nou devret sipliy Zeova pour donn nou son lespri sen?
3 Depan lo lafors Zeova: Menm si Mika ti annan en travay difisil, i ti rod lafors avek Zeova pour kontinyen. (Mik. 3:8) I pa en kwensidans ki Labib i demann nou pour depan lo Bondye pour ganny lafors. I pare pour donn lafors sa bann ki fatige pour ki zot kapab desarz zot responsabilite teokratik. (Ps. 84:5, 7; Iza. 40:28-31) Eski ou’n deza eksperyans sa dan ou lavi? Eski ou regilyerman sipliy Zeova pour donn ou son lespri sen?—Lik 11:13.
4. Ki bon legzanp nou gannyen ozordi avek Mika?
4 Diran tou son lavi, Mika ti fer li son priyorite pour fer lavolonte Zeova. I ti determinen pour reste fidel malgre i ti antoure avek degradasyon moral. Pareyman, tou le zour nou lentegrite i ganny teste. Alor, annou ranforsi nou determinasyon pour “mars o non nou Bondye Zeova pour en letan endefini.”—Mik. 4:5.