Pran konman legzanp bann profet—Tsefanya
1. Dan ki sirkonstans Tsefanya ti servi konman en profet e ki mannyer i en bon legzanp pour nou ozordi?
1 I ti dan milye setyenm syek A.N.L., ladorasyon Baal ti pe ganny pratike ouvertman dan Zida. Move Lerwa Amonn ti’n fek ganny touye e aprezan zenn Lerwa Yosiya ki ti pe dirize. (2 Kron. 33:21–34:1) Pandan sa letan, Zeova ti anvoy Tsefanya pour anons son zizman. Menm si Tsefanya ti kapab en manm dan lakour rwayal Zida, i pa ti esey minimiz lentansite mesaz zizman Zeova lo bann ki ti dirize Zida. (Tsef. 1:1; 3:1-4) Pareyman, nou fer zefor pour imit kouraz Tsefanya e evite les nou fanmir esey enterfer avek nou ladorasyon pour Zeova. (Mat. 10:34-37) Ki mesaz Tsefanya ti anonse e ki rezilta sa ti anmennen?
2. Ki nou devret fer pour ganny kasyet zour lakoler Zeova?
2 Rod Zeova: Zis Zeova ki kapab sov nou zour son lakoler. Alors, Tsefanya ti sipliy bann dimoun Zida pour rod Zeova, rod ladrwatir e rod limilite avan i tro tar. (Tsef. 2:2, 3) I parey dan nou letan. Parey Tsefanya, nou ankouraz lezot pour rod Zeova me nou osi nou bezwen determinen pour pa zanmen “aret swiv Zeova.” (Tsef. 1:6) Plito, nou rod Zeova par etidye o profon son parol e par priye pour ganny son gidans. Nou rod ladrwatir par viv en lavi moralman prop. Nou rod limilite par devlop soumisyon e pare pour swiv direksyon ki lorganizasyon Zeova i donnen.
3. Akoz nou devret gard en latitid pozitif dan predikasyon?
3 Bon rezilta: Mesaz zizman Tsefanya ti motiv serten dan Zida pour sanze, sirtou avek legzanp zenn Yosiya, ki ti konmans rod Zeova depi i ti en pti garson. Pli tar Yosiya ti fer en gran kanpanny pour retir tou idolatri dan sa pei. (2 Kron. 34:2-5) Ozordi menm si serten lagrenn Rwayonm i tonm o bor semen, parmi bann ros ouswa dan pikan, serten i tonm dan bon later e raport fri. (Mat. 13:18-23) Nou annan konfyans ki Zeova pou kontinyen beni nou zefor anmezir ki nou kontinyen senm lagrenn Rwayonm.—Ps. 126:6.
4. Akoz nou devret ‘kontinyen ekspekte Zeova’?
4 Serten dan Zida ti santi ki Zeova pa ti pou zanmen pran aksyon. Par kont, Zeova ti asir zot tou ki son gran zour ti pros. (Tsef. 1:12, 14) Zis bann ki ti pran refiz dan li ki ti pou ganny sove. (Tsef. 3:12, 17) Annou pran plezir pour servi nou gran Bondye dan linite avek nou konpanyon Kretyen anmezir ki nou ‘kontinyen ekspekte Zeova.’—Tsef. 3:8, 9.