100 an depi ki nou pe anons sa Rwayonm!

1. Ki pep Zeova ti’n ganny ankouraze pour fer preski 100 an pase?

¹ “Gete, nou Lerwa pe dirize! Zot, zot sa bann ki i pe servi pour anons sa mesaz. Alor anonse, anonse, anonse, konsernan sa Lerwa ek son rwayonm.” Pep Zeova ti ganny ankouraze pour anons mesaz Rwayonm partou dan lemonn antye par sa parol ki Frer Rutherford ti dir preski 100 an pase. Sanmenm sa ki nou’n fer! Parey bann premye Kretyen, nou’n pres sa bon nouvel Rwayonm “avek tou dimoun dan lemonn antye.” (Kol. 1:23) Ler nou get sa ki’n ganny akonpli dan sa dernyen 100 an, kwa ki nou’n fer pour anons Rwayonm Bondye? Ki mannyer nou kapab kontinyen anonse sa mesaz anmezir ki nou pe apros 100 an depi ki sa Rwayonm in ganny etablir?

2. Ki mannyer nou piblikasyon in promot Rwayonm Bondye?

² Mazin lepase: Pour plizyer dizenn lannen, nou piblikasyon in promot Rwayonm Bondye. Depi 1939 nou magazin prensipal in ganny sa tit: Latour Veyer pe anons Rwayonm Zeova. Sa magazin i souvan diskit lo sa Rwayonm e sa ki i pou akonpli. Magazin Awake! i osi met lanfaz lo Rwayonm Bondye konman sa sel lespwar pour limanite. Pa i apropriye ki sa de magazin i aprezan bann magazin ki ganny tradwir e distribye plis dan lemonn antye!​—Rev. 14:6.

3. Ki serten metod nou’n servi pour anons sa Rwayonm?

³ Pep Zeova in servi plizyer metod pour anons sa Rwayonm. Dan lepase, nou’n servi bann portvwa lo loto, transmisyon lo radyo ek granmofonn. Sa bann metod ti ed nou pour anons sa bon nouvel partou dan lemonn antye avek bokou dimoun ler i ti napa bokou proklanmater. (Ps. 19:4) Tou dernyenman, nou met bann lenformasyon lo jw.org pour anons sa Rwayonm avek plizyer milyon dimoun enkli bann ki reste dan bann landrwa kot nou travay i enterdi.

4. Ki bann nouvo metod spesyal nou’n servi pour anons sa mesaz Rwayonm?

⁴ Pep Zeova in osi partisip dan bann nouvo metod spesyal pour anons sa mesaz Rwayonm. Par egzanp, dan bann lannen 1990 an montan, nou’n fer zefor pour ogmant nou travay portanport avek temwannyaz dan bann zarden piblik, lo parking e dan landrwa biznes. Resaman, nou’n organiz temwannyaz spesyal an piblik dan bann gran lavil dan lemonn antye. An plis ki sa, bokou kongregasyon pe partisip dan temwannyaz dan landrwa piblik dan zot teritwar par servi prezantwar ek latab ki ganny mete dan bann landrwa kot bokou dimoun i pase. Byensir, portanport i reste konman sa metod prensipal nou predikasyon.​—Akt 20:20.

5. Ki bann loportinite sa nouvo lannen servis i ofer nou?

⁵ Get lavenir: Avek sa nouvo lannen servis ki konmanse Septanm, bokou pou konmans servis pionye ordiner. Eski ou kapab fer parey? Si non, eski ou kapab fer pionye asistan detanzaot? Ki swa ou kapab fer pionye oubyen non, Zeova pou sirman beni ou pour nenport sakrifis ki ou fer pour anons sa Rwayonm plennman.​—Mal. 3:10.

6. Akoz mwan Oktob 2014 pou spesyal?

⁶ Mwan Oktob 2014 pou fer 100 an depi ki sa Rwayonm in ganny etablir. I apropriye ki Latour Veyer edisyon piblik pour sa mwan i konsantre lo Rwayonm Bondye. Petet ou kapab fer zefor pour ofer sa magazin avek otan dimoun posib. Anmezir nou get lavenir, i nou swe ki sakenn parmi nou i kontinyen ‘anons bon nouvel lo Rwayonm Bondye’ avek tou dimoun ki pou ekoute.​—Akt 8:12.