Pran konman legzanp bann profet: Naoum
1. Ki nou aprann atraver liv Naoum?
1 Zis parey Naoum ti predir, bann debri vye lavil Niniv i laprev ki Zeova i revanze kont Son bann lennmi e ki menm son bann adverser pli danzere pa kapab debout kont Li. (Nao. 1:2, 6) Nou kapab tir bokou leson pour nou minister ler nou egzamin byen profesi Naoum.
2. Ki mannyer nou kapab gard nou mesaz pozitif?
2 Donn rekonfor ek lespwar: Premye kou, i paret ki liv Naoum ti zis en deklarasyon zizman lo Niniv, kapital Lasiri kot son bann zabitan ti arogan. (Nao. 1:1; 3:7) Me sa deklarasyon ti en bon nouvel pour pep Zeova. Naoum ki son non ti vedir “Konsolater,” ti reasir bann Zwif ki zot lennmi ti pou ganny detri byento. Deplis, Naoum ti konfirmen ki Zeova i “en landrwa proteksyon dan zour ladetres.” (Nao. 1:7) Anmezir ki nou prese, nou osi nou partaz sa bon nouvel e ankouraz lezot pour rod refiz dan Zeova.—Nao. 1:15.
3. Ki mannyer nou kapab imit Naoum par servi bann legzanp?
3 Servi bann legzanp: Zeova ti enspir Naoum pou konpar destriksyon Niniv avek destriksyon Teb (Thebes) en lavil Ezipsyen ki ti ganny detrir oparavan par Lasiri. (Nao. 3:8-10) Anmezir nou koz avek bann dimoun konsernan lafen sa move lemonn, nou kapab fer sorti bann profesi dan Labib ki montre ki Zeova i akonpli son parol menm dan bann pti detay. Par egzanp, kan bann Babilonnyen ek bann Med ti vin lager kont lavil Niniv an 632 A.N.L., gro lapli ti fer Larivyer Tig deborde e grenn en bout miray sa lavil ki oparavan ti enposib pour penetre. Apre sa, parey Zeova ti’n predir, Niniv pa ti tarde pour ganny kaptire.—Nao. 1:8; 2:6.
4. Ki mannyer nou kapab koz dan en fason kler e fasil pour konpran dan predikasyon?
4 Kler e fasil pour konpran: Naoum ti ekri dan fason deskriptif e vivan. Son bann pwen ki i ti fer resorti ti kler. (Nao. 1:14; 3:1) Pareyman, nou anvi koz dan en fason ki fasil pour konpran. (1 Kor. 14:9) Lo premye vizit, fer kler avek sa met lakour akoz ou la. Sak letid ki ou fer avek sa dimoun, ed li devlop lafwa dan Zeova ek son Parol e ed li pour rekonnet ki mannyer sa bann lenformasyon i aplik pour li personnelman.—Rom. 10:14.
5. Ki lasirans nou gannyen dan profesi Naoum?
5 Konfyans ki Naoum ti annan ki parol Zeova i touzour vin vre i evidan dan sa liv ki port son non. Anmezir ki lafen sa lemonn i aprose, nou trouv rekonfor dan sa parol: “Ladetres pa pou ariv en dezyenm fwa.”—Nao. 1:9.