Nou bann zouti pour ansennyen
1. Dan ki fason bann predikater i resanble bann artizan?
1 Bann artizan i servi diferan kalite zouti. Serten zouti i ganny servi pour bann travay spesifik tandis ki lezot i ganny servi pli souvan. Bann artizan eksperyanse i touzour annan sa bann zouti de baz dan zot bwat zouti e se sanmenm sa bann ki zot servi pli byen. Labib i ankouraz sak Kretyen pour partisip plennman dan predikasyon e pour vin “en zouvriye ki napa nanryen pour onte.” (2 Tim. 2:15) Ki sa zouti pli enportan dan nou bwat zouti? Se Parol Bondye, sa zouti prensipal ki nou servi pour ‘fer disip.’ (Mat. 28:19, 20) Alor, nou devret fer bokou zefor pour vin pli kalipa pour “anons byen mesaz laverite.” Par kont, i annan lezot kalite zouti dan nou bwat zouti ki tou bann Kretyen i devret aprann servi byen pour ansenny dimoun laverite.—Prov. 22:29.
2. Ki bann zouti de baz pour ansennyen ki disponib?
2 Nou bann zouti de baz pour ansennyen: Apard Labib, ki lezot zouti nou devret servi? Zouti prensipal ki nou servi pour ansenny laverite dan Labib i Ki Labib i vreman dir? Apre ki nou’n konplet letid dan sa liv avek en etidyan, nou servi sa liv “Reste dan lanmour Bondye” pour ansenny li lo ki mannyer pour aplik bann prensip Labib dan lavi toulezour. Alor, nou bezwen konn byen servi sa de piblikasyon. Serten brosir i osi devret ganny enkli dan nou bwat zouti pour ansennyen. Bon nouvel sorti kot Bondye! i enn parmi nou bann zouti prensipal pour konmans letid Labib. Si dan nou teritwar i annan bann dimoun ki pa tro konn lir oubyen ki koz en langaz ki nou napa bokou oubyen napa ditou piblikasyon dan sa langaz, nou kapab servi brosir Listen to God oubyen Ekout Bondye e viv pour touzour. En zouti de baz ki ganny servi pour diriz bann etidyan ver lorganizasyon i sa brosir Lekel ki pe fer lavolonte Zeova ozordi? Bann video ki ede pour fer disip, tel parey Akfer etidye Labib? Kwa ki pase dan Lasal Rwayonm? ek Does God Have a Name?, i bann zouti ki nou devret osi aprann pour servi byen.
3. Ki bann Minister Rwayonm ki nou pou gannyen byento pou ed nou fer?
3 Bann nimero Nou Minister Rwayonm ki nou pou gannyen byento pou ed nou pour pli byen servi bann piblikasyon ki dan nou bwat zouti pour ansennyen. Anmezir ki nou fer nou mye pour servi sa bann zouti dan en fason efikas, sa pou permet nou swiv sa konsey: “Montre perseverans dan tousala. Si ou azir koumsa, ou ava sov ou lekor ek tou bann ki ekout ou.”—1 Tim. 4:16.