Pran konman legzanp bann profet—Abakouk
1. Akoz nou kapab konpran profet Abakouk?
1 Anmezir ki bann move keksoz i ogmante dan sa lemonn, nou kapab santi parey Abakouk ki ti demann Zeova: “Akoz ou fer mwan vwar sa ki mal? Akoz ou toler labi?” (Aba. 1:3; 2 Tim. 3:1, 13) Letan nou medit lo legzanp fidel Abakouk osi byen ki son mesaz, sa i kapab ed nou anmezir ki nou esper zour zizman Zeova.—2 Pyer 3:7.
2. Ki mannyer nou kapab montre ki nou pe viv par lafwa ozordi?
2 Viv par lafwa: Olye les problenm dekouraz li, Abakouk ti reste spirityelman eveye e aktif. (Aba. 2:1) Zeova ti asir sa profet ki Son parol ti pou ganny realize zis a tan e ki “gras a lafwa, sa enn ki drwat pou viv.” (Aba. 2:2-4) Ki sa i vedir pour bann Kretyen ki pe viv dan letan lafen? I pli enportan pour konvenki ki lafen pou arive ki konnen kan i pou arive. Lafwa pou motiv nou pour reste vizilan e donn priyorite nou minister.—Ebr. 10:38, 39.
3. Akoz nou devret reste zwaye dan servis Zeova?
3 Rezouir en kantite akoz Zeova: Letan Gog sorti Magog i atak pep Zeova, nou lafwa pou ganny teste. (Ezek. 38:2, 10-12) Konfli i anmenn soufrans menm pour bann ki sorti venker. I kapab napa manze, dimoun i kapab perdi propriyete e standar lavi i kapab bese. Ki mannyer nou pou reakte letan nou pou fer fas avek difikilte? Abakouk ti ekspekte soufrans, alor i ti determinen pour reste zwaye dan servis Zeova. (Aba. 3:16-19) “Lazwa Zeova” pou osi ed nou andir bann difikilte dan lavenir.—Nee. 8:10; Ebr. 12:2.
4. Ki lazwa nou kapab gannyen la konmela e dan lavenir?
4 Bann ki Zeova pou proteze zour son zizman pour kontinyen ganny ansennyen dapre son fason viv. (Aba. 2:14) Bann ki pou resisite pou osi aprann konn Zeova. Depi la konmela, annou servi tou loportinite pour koz lo Zeova ek son bann travay merveye!—Ps. 34:1; 71:17.