Nou aprann lo Bondye atraver son bann profet
Dan lepase, Bondye ti servi son profet pour donn imen bann mesaz enportan. Sa bann mesaz i montre nou ki mannyer pour ganny benediksyon Bondye! Annou vwar ki nou kapab aprann avek trwa profet fidel.
ABRAAM
Bondye pa fer lapreferans e i anvi beni tou imen.
Bondye ti promet profet Abraam ki “atraver ou, tou fanmir lo later pou ganny beni.”—Zenez 12:3.
Ki nou aprann? Bondye i kontan nou en kantite e i anvi beni tou fanmir ki enkli zonm, madanm ek zanfan ki obei li.
MOIZ
Bondye i annan konpasyon e i beni bann ki fer zefor pour konn li.
Bondye Tou Pwisan ti donn Moiz pouvwar pour fer mirak. Kantmenm sa, Moiz ti priye: “Fer mwan konn ou bann semen pour ki mon ava konn ou e kontinyen trouv faver dan ou lizye.” (Egzod 33:13, NWT) Bondye ti kontan sa ki Moiz ti’n demann li. I ti beni li e donn li plis konnesans e ed li konpran son bann kalite ek son fason fer keksoz. Par egzanp, Moiz ti aprann ki nou Kreater i annan “pitye ek konpasyon.”—Egzod 34:6, 7.
Ki nou aprann? Bondye i anvi beni nou tou, ki swa zonm, madanm oubyen zanfan, si nou fer zefor pour konn li pli byen. Dan Labib, Bondye i dir nou ki mannyer pour ador li e ki mannyer i anvi beni nou e donn nou son faver.
ZEZI
Avek konpasyon, Zezi ti geri tou sort maladi
Nou kapab ganny benediksyon eternel si nou aprann avek sa ki Zezi ti dir e sa ki i ti ansennyen.
Nou kapab aprann bokou keksoz dan Labib lo lavi Zezi e lo sa ki i ti ansennyen. Bondye ti donn Zezi pouvwar pour fer bokou mirak. Zezi ti geri bann aveg, bann sourd ek bann ki bwete. I ti menm resisit bann mor. Alor, Zezi ti montre ki Bondye pour beni tou imen a lavenir. I ti dir ki mannyer nou tou nou kapab ganny sa bann benediksyon: “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.”—Zan 17:3.
Zezi ti annan konpasyon, i ti dous e i ti bon. Bokou dimoun ti vin kot li. Sa i enkli zonm ek madanm, zenn konman vye ki ti aksepte sa lenvitasyon: “Swiv mon legzanp, parski mon dous e mon annan limilite e zot pou reganny lafors.” (Matye 11:29) Konpare avek lezot dimoun dan son letan, Zezi ti tret bann madanm avek labonte, dinyite ek respe.
Ki nou aprann? Zezi ti annan bokou lanmour pour bann dimoun e i’n kit en bon legzanp lo konman pour tret lezot.
ZEZI I PA BONDYE
Labib i ansennyen ki “anfet pour nou i annan zis en sel Bondye” e ki Bondye in swazir Zezi pour anmenn son mesaz. (1 Korentyen 8:6) Zezi Kri ti fer kler ki Bondye i pli siperyer ki li e ki Bondye in anvoy li lo later.—Zan 11:41, 42; 14:28.a
a Pour aprann plis lo Zezi Kri, vwar seksyon 8 ek 9 dan brosir Real Faith—Your Key to a Happy Life ki disponib lo www.jw.org.