Kontinyen priye pour ganny faver Bondye

Bondye in donn imen en kado. Sa i sa abilite pou koz avek li e dir li sa ki zot santi atraver lapriyer. Profet David ti priye: “Akoz ou ekout nou lapriyer, tou zabitan later ava tourn ver ou.” (Psonm 65:2) Me ki mannyer nou kapab priye pour ki Bondye i ekout nou e beni nou?

AVEK LIMILITE, FER BANN LAPRIYER SENSER

Ou lapriyer personnel i permet ou dir Bondye sa ki i annan dan ou leker. (Psonm 62:8) Bondye Tou Pwisan i kontan bann lapriyer senser.

SERVI NON BONDYE LER OU PRIYE

Menm si Bondye i annan bokou tit, i annan zis en non. “Mwan, mon Zeova. Sa i mon non.” (Izai 42:8, NWT) Non Zeova i aparet apepre 7,000 fwa dan Labib. Plizyer profet ti servi non Bondye ler zot ti priye. Abraam ti dir: “Silvouple Zeova, . . . les mwan kontinyen [koz avek ou].” (Zenez 18:30, NWT) Nou osi nou devret servi non Bondye, Zeova, ler nou priye.

PRIY DAN OU PROP LANGAZ

Nenport ki langaz nou koze, Bondye i konpran nou panse ek santiman. Son Parol i asir nou: “Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.”​—Akt 10:34, 35.

Par kont, nou bezwen fer plis ki priye pour Bondye beni nou. Dan bann lartik ki swiv, nou pou vwar ki nou bezwen fer.