Lanmour ek lapresyasyon pour Zeova pou ed ou batize

1-2. Dapre Akt 8:27-31, 35-38, kwa ki ti ed sa zofisye pour batize?

ESKI ou anvi batize e vin en disip Kris? Lanmour ek lapresyasyon pour Zeova in ed bokou dimoun pour fer sa swa. Annou vwar legzanp en zofisye ki ti travay pour larenn Etyopi.

² Dek ki sa zofisye Etyopyen ti’n aprann sa ki Parol Bondye i dir lo batenm, i ti batize. (Lir Akt 8:27-31, 35-38.) Kwa ki ti ed li batize? I kler ki i ti apresye Parol Bondye, vi ki i ti pe lir serten verse dan liv Izai, ler i ti pe vwayaze dan son saret. Ler Filip ti koz avek li, sa zonm ti devlop lapresyasyon pour sa ki Zezi ti’n fer pour li. Me akoz sa zofisye ti’n al Zerizalenm? Parski i ti’n fini konmans devlop en lanmour pour Zeova. Ki mannyer nou konn sa? I ti’n fek sorti ador Zeova Zerizalenm. Aparaman, sa zonm ti’n kit son larelizyon e i ti’n zwenn sa sel nasyon ki ti deza pe servi sa vre bondye. I ti sa menm lanmour pour Zeova ki ti ed li fer sa desizyon vreman enportan, savedir batize e vin en disip Kris.​—Mat. 28:19.

3. Kwa ki kapab anpes en dimoun batize? (Vwar bwat “Ki kalite dimoun ou vreman ete?”)

³ Lanmour pour Zeova i kapab ed ou pour batize. Me lanmour i kapab osi anpes ou batize. Ki mannyer? Annou vwar serten legzanp. I kapab ki ou telman kontan ou fanmir ek zanmi ki pa Temwen Zeova e ou enkyet ki si ou batize, zot pou ay ou. (Mat. 10:37) Oubyen i kapab ki ou kontan bann keksoz ki Zeova i deteste e petet ou vwar li difisil pour aret fer sa bann keksoz. (Ps. 97:10) Oubyen i kapab ki ler ou ti pe grandi, ou ti swiv bann koutim fo relizyon. Petet ou ankor kontan sa bann souvenir ki annan pour fer avek sa bann koutim. Ou kapab vwar li difisil pour aret swiv sa bann koutim ki pa fer plezir Zeova. (1 Kor. 10:20, 21) Alor, ou bezwen deside, “Kwa oubyen lekel ki ou pli kontan?”

SA KI OU DEVRET KONTAN PLIS

4. Ki sa rezon enportan ki fer en dimoun batize?

⁴ Ou annan bokou bon keksoz pour kontan e apresye. Par egzanp, menm avan ki ou ti konmans etidye Labib avek Temwen Zeova, i kapab ki ou ti’n devlop en gran lapresyasyon pour Labib. Petet osi ou ti’n konmans kontan Zezi. La ki ou’n konn Temwen Zeova, petet ou pou kontan pas letan avek zot. Me kontan sa bann bon keksoz, pa pou neseserman fer ou anvi dedye ou lavi avek Zeova e batize. Lanmour pour Zeova i sa keksoz pli enportan ki pou ed ou batize. Ler ou kontan Zeova plis ki tou lezot keksoz, ou pa pou les nanryen oubyen personn anpes ou servi li. Ou lanmour pour Zeova pou ed ou batize e i pou osi ed ou pour reste fidel avek li apre ki ou’n batize.

5. Ki kestyon nou pou reponn?

⁵ Zezi ti dir ki nou devret kontan Zeova avek tou nou leker, tou nou nanm, tou nou lespri e avek tou nou lafors. (Mark 12:30) Ki mannyer ou kapab aprann pour vreman kontan e respekte Zeova? Si nou mazin lo ki mannyer Zeova in kontan nou, sa pou ed nou kontan li avek tou nou leker. (1 Zan 4:19) Enn fwa ki ou’n devlop lanmour pour Zeova, ki lezot santiman ou pou annan e ki ou pou fer?b

6. Dapre Romen 1:20, ki en fason ou kapab aprann konsernan Zeova?

⁶ Aprann konsernan Zeova atraver kreasyon. (Lir Romen 1:20; Rev. 4:11) Reflesir lo bann plant ek zannimo ki Zeova in kree e ki mannyer sa i montre ki Zeova i vreman saz. Reflesir lo lafason merveye ki ou’n ganny kree. (Ps. 139:14) Osi, reflesir lo lafason ki Zeova in kree nou soley e fer li vreman pwisan. An plis, soley i zis enn parmi sa plizyer bilyon zetwal ki egziste.c (Iza. 40:26) Anmezir ki ou mazin lo kreasyon Zeova, ou pou annan plis respe pour li. Par kont, ou pa kapab dir ki ou annan en bon lanmitye avek Zeova zis akoz ou konnen ki i saz e pwisan. Me pour devlop plis lanmour pour Zeova e vin son zanmi ou bezwen konn plis lo li.

7. Pour vreman kontan Zeova, ki ou bezwen asire?

⁷ Ou bezwen asire ki Zeova i vreman kontan ou. Eski ou vwar li difisil pour krwar ki Kreater lesyel ek later i konnen ki ou egziste e i enterese avek ou? Si wi, mazinen ki Zeova “i pa lwen avek sakenn ant nou.” (Akt 17:26-28) I “egzamin tou leker” e i promet ou parey David ti dir Salomon ki “si ou rod li, i pou les ou vwar li.” (1 Kron. 28:9, NWT) Anfet, rezon ki ou etidye Labib i akoz Zeova i dir ki i’n atir ou ver li. (Zer. 31:3, NWT) Pli ou apresye tou sa ki Zeova in fer pour ou, ou lanmour pour li pou vin pli for.

8. Ki mannyer ou montre ki ou vreman kontan Zeova?

⁸ En fason pour montre ki ou vreman kontan Zeova, i ler ou koz avek li dan lapriyer. Pli ou koz avek Zeova lo ou bann problenm e remersye li pour tou sa ki i fer pour ou, ou pou devlop plis lanmour pour li. Sa lanmitye ant ou avek Zeova pou vin pli for ler ou vwar ki mannyer i reponn ou lapriyer. (Ps. 116:1) Sa pou asir ou ki i konpran ou. Me pour ou vin pros avek Zeova ou bezwen konpran akoz i annan serten keksoz ki i kontan e i annan ki i pa kontan. Ou osi bezwen konpran akoz i fer serten keksoz. Ou bezwen konnen ki i ekspekte avek nou. Sel fason pour konn tousala i par etidye son Parol, Labib.

9. Ki mannyer ou montre ki ou apresye Labib?

⁹ Aprann apresye Parol Bondye, Labib. Labib i sa sel liv ki annan laverite lo Zeova ek son plan pour ou. Ou montre ki ou apresye Labib ler ou lir li tou le zour, ler ou prepare pour fer ou letid Labib e ler ou aplik sa ki ou pe aprann. (Ps. 119:97, 99; Zan 17:17) Eski ou annan en progranm lektir Labib personnel? Eski ou swiv sa progranm e ou lir Labib tou le zour?

10. Ki keksoz ki fer Labib vreman spesyal?

¹⁰ En keksoz ki fer Labib vreman spesyal, i ki i annan bann dimoun ki’n ekri sa ki zot in vwar lo bann levennman konsernan Zezi. I sa sel liv ki eksplik egzakteman ki Zezi in fer pour ou. Ler ou aprann sa ki Zezi ti dir e fer, ou pou anvi annan en bon lanmitye avek li.

11. Kwa ki pou ed ou kontan Zeova?

¹¹ Aprann kontan Zezi e ou lanmour pour Zeova pou vin pli for. Akoz? Parski Zezi i reflekte bann kalite son Papa parfetman. (Zan 14:9) Alor, pli ou aprann konn Zezi, pli ou pou konpran e apresye Zeova. Mazin lo konpasyon ki Zezi ti annan pour bann dimoun ki ti ganny meprize par lezot akoz zot ti pov, malad oubyen pli feb. Osi mazin lo sa bann konsey ki i donn ou e ki mannyer ou lavi i amelyore ler ou swiv son bann konsey.​—Mat. 5:1-11; 7:24-27.

12. Ler ou aprann konn Zezi, ki sa pou ed ou fer?

¹² I tre probab ki ou lanmour pour Zezi pou vin pli for, anmezir ki ou reflesir o profon lo sakrifis ki i’n fer pour ou pese ganny pardonnen. (Mat. 20:28) Ler ou konpran ki Zezi ti pare pour mor pour ou, sa pou ed ou repantir e rod pardon Zeova. (Akt 3:19, 20; 1 Zan 1:9) Pli ou kontan Zeova ek Zezi, pli ou pou anvi pas letan avek bann ki kontan zot.

13. Ki Zeova in donn ou?

¹³ Aprann kontan bann ki kontan Zeova. Ou fanmir ek bann zanmi ki ou ti annan avan e ki pa Temwen Zeova, i kapab pa konpran akoz ou anvi vin en Temwen Zeova. Zot menm kapab opoz ou. Zeova pou ed ou e i pou donn ou en fanmir spirityel dan kongregasyon. Si ou reste pros avek sa fanmir spirityel ou pou ganny sa lanmour ek sipor ki ou bezwen. (Mark 10:29, 30; Ebr. 10:24, 25) Avek letan, ou fanmir osi i kapab anvi servi Zeova e obei son bann standar.​—1 Pyer 2:12.

14. Dapre 1 Zan 5:3, ki ou’n vwar konsernan standar Zeova?

¹⁴ Aprann apresye e aplik standar Zeova. Avan ou ti konn Zeova petet ou ti desid pour ou menm kwa ki byen e kwa ki mal, me aprezan ou vwar ki standar Zeova i pli bon. (Ps. 1:1-3; lir 1 Zan 5:3.) Reflesir lo bann konsey ki Labib i donnen pour bann msye, madanm, paran ek zanfan. (Efe. 5:22–6:4) Ler ou’n aplik sa bann konsey, eski ou fanmir in vin pli ere? Eski ou en pli bon dimoun ler ou obei konsey Zeova lo ki kalite zanmi ou devret annan? Eski ou pli ere? (Prov. 13:20; 1 Kor. 15:33) I tre probab ki ou bann larepons i wi.

15. Ki ou kapab fer si ou bezwen led pour aplik bann prensip Labib?

¹⁵ Parfwa, ou kapab vwar li difisil pour konnen ki mannyer pour aplik bann prensip Labib ki ou pe aprann. Sa i rezon akoz Zeova i servi son lorganizasyon pour donn ou bann piblikasyon baze lo Labib, ki kapab ed ou pour konn fer diferans ant sa ki byen ek sa ki mal. (Ebr. 5:13, 14) Ler ou lir e etidye sa bann piblikasyon, ou pou vwar ki i pe koz lo bann keksoz spesifik e pratik. I tre probab ki sa pou atir ou ver lorganizasyon Zeova.

16. Ki mannyer Zeova in organiz son pep?

¹⁶ Aprann kontan e siport lorganizasyon Zeova. Zeova in organiz son pep dan bann kongregasyon e son Garson Zezi i sef sa bann kongregasyon. (Efe. 1:22; 5:23) Zezi in apwent en pti group Kretyen swazir pour diriz e organiz sa travay ki i anvi i ganny fer ozordi. Zezi ti refer avek sa pti group zonm konman “lesklav fidel e pridan” e zot pran seryezman zot responsabilite pour ed ou vin pros avek Zeova e protez ou lanmitye avek li. (Mat. 24:45-47) En fason ki lesklav fidel i ede pran swen avek ou, i ler zot fer sir ki i annan bann zonm kalifye ki ganny apwente pour vin ansyen. Sa bann ansyen i kapab gid e protez ou. (Iza. 32:1, 2; Ebr. 13:17; 1 Pyer 5:2, 3) Bann ansyen i pare pour fer tou sa ki zot kapab pour rekonfort ou e ed ou vin pli pros avek Zeova. Me en keksoz pli enportan ki zot kapab fer pour ou, i ler zot ed ou pour ansenny lezot konsernan Zeova.​—Efe. 4:11-13.

17. Dapre Romen 10:10, 13, 14, akoz nou koz avek lezot konsernan Zeova?

¹⁷ Ed lezot pour kontan Zeova. Zezi ti demann son bann disip pour ansenny lezot konsernan Zeova. (Mat. 28:19, 20) Nou kapab obei sa lord zis akoz nou konnen nou bezwen obei. Me anmezir ki ou lanmour pour Zeova i vin pli for, ou pou santi parey zapot Pyer ek Zan ki ti dir: “Nou pa kapab aret koz lo keksoz ki nou’n vwar e tande.” (Akt 4:20) Nou pou vreman kontan si nou ed en dimoun aprann konn Zeova. Mazinen ki mannyer Filip sa predikater, ti kontan ler i ti ed sa zofisye Etyopyen aprann laverite dan Labib e ler sa zofisye ti batize! Ler ou swiv legzanp Filip e ou obei lord Zezi pour anons sa bon nouvel, ou montre ki ou anvi vin en Temwen Zeova. (Lir Romen 10:10, 13, 14.) I tre probab ki sa letan ou pou demann sa menm kestyon ki sa zofisye Etyopyen ti demande: “Kwa ki anpes mwan batize?”​—Akt 8:36.

18. Ki nou pou diskite dan sa lot lartik?

¹⁸ Ou pou fer sa pli bon desizyon dan ou lavi ler ou deside pour batize. Vi ki i en desizyon vreman serye, ou bezwen mazin byen kwa ki i enplike. Ki ou bezwen konnen lo batenm? Ki ou bezwen fer avan e apre batenm? Nou pou reponn sa bann kestyon dan sa lot lartik.