Ki mannyer nou kapab ed en etidyan Labib pour progrese ziska batenm​—Premye parti

1. Ki 2 Korentyen 3:1-3 i dir ki ed nou konpran ki i en kado spesyal pour ansenny en dimoun Labib e pour vwar li batize? (Vwar portre lo kouvertir.)

KI MANNYER ou santi ler ou vwar en etidyan Labib dan ou kongregasyon batize? Sirman sa i fer ou vreman zwaye. (Mat. 28:19) Si ou sa enn ki’n fer son letid, ou vreman eksite e kontan ler i batize! (1 Tesa. 2:19, 20) Bann ki fek batize i parey “bann let rekomandasyon,” pa zis pour zot ansenyan me osi pour kongregasyon.​—Lir 2 Korentyen 3:1-3.

2. (a) Ki kestyon enportan nou bezwen mazin lo la e akoz? (b) Kisisa en letid Labib? (Vwar not.)

² Nou vreman kontan pour vwar ki pandan sa dernyen kat-r-an, bann proklanmater partou dan lemonn in fer apepre 10,000,000 letid Labibb tou le mwan. Pandan sa bann menm lannen, apepre 280,000 dimoun in batize tou le lannen. Ki mannyer nou kapab ed plis dimoun parmi sa plizyer milyon ki pe etidye pour batize? Zeova i ankor pe donn dimoun loportinite pour vin son Temwen. Sanmenm sa rezon nou fer nou mye pour ed bann etidyan Labib progrese ziska batenm pli vit posib. Letan ki reste i kourt!​—1 Kor. 7:29a; 1 Pyer 4:7.

3. Ki nou pou diskite dan sa lartik konsernan fer bann letid Labib?

³ Vi ki i vreman enportan pour fer disip la konmela, bann biro brans partou dan lemonn ti ganny demande pour rode kwa ki kapab ganny fer pour ed plis etidyan Labib progrese ziska batenm. Dan sa lartik e dan sa enn ki swiv, nou pou vwar ki nou kapab aprann avek bann pionye, misyonner e sirveyan rezyonal ki byen eksperyanse.c (Prov. 11:14; 15:22) Zot eksplike ki bann ansenyan Labib ek zot etidyan i kapab fer pour ki sa letid Labib i ed sa etidyan. Dan sa lartik, nou pou vwar senk keksoz ki tou etidyan i bezwen fer pour li progrese ziska batenm.

FER LETID TOU LE SEMENN

4. Ki nou bezwen realize konsernan bann letid ki ganny fer devan laport sa dimoun?

⁴ Bokou nou bann frer ek ser pe fer letid Labib avek zot etidyan lanmenm devan laport sa etidyan. Menm si sa i en bon fason pour devlop lentere bann dimoun dan Labib, normalman sa bann konversasyon i bref e i kapab ki i pa ganny fer tou le semenn. Pour devlop lentere sa dimoun plis, serten frer ek ser pou demann sa dimoun son nimero telefonn, koumsa zot kapab telefonn sa dimoun oubyen anvoy li en mesaz baze lo Labib avan prosenn retourn vizit. I kapab ki zot kontinyen fer sa pour plizyer mwan san ki sa i vin en letid Labib. Me eski sa i ase pour ed sa etidyan progrese pour dedye son lavi e batize? I tre probab ki non. I bezwen pas plis letan ek lenerzi pour etidye Parol Bondye.

5. Dapre sa ki Zezi ti dir dan Lik 14:27-33, ki nou kapab fer pour ed nou bann etidyan Labib?

⁵ Zezi ti servi en legzanp pour eksplike ki en dimoun i bezwen fer si i anvi vin son disip. I ti koz konsernan en dimoun ki anvi konstri en lakaz ek en lerwa ki anvi al lager. Zezi ti dir ki sa dimoun ki oule konstri sa lakaz i bezwen “premyerman asize e kalkile konbyen i pou kout li” e sa lerwa i bezwen “premyerman asize e rod konsey” pour li konnen si son larme pou kapab al lager. (Lir Lik 14:27-33.) Pareyman, Zezi ti konnen ki en dimoun ki anvi vin son disip i devret reflesir byen lo ki i bezwen fer pour li kapab swiv Zezi. I pour sa rezon ki nou bezwen ankouraz nou bann etidyan Labib pour etidye Labib avek nou tou le semenn. Ki mannyer nou kapab fer sa?

6. Ki nou kapab esey fer pour fer bann letid ki progrese?

⁶ Konmans par ogmant lakantite letan ki ou fer sa letid devan laport. Dan plas, koz lo zis en verse Labib sak fwa ou fer sa vizit, petet ou kapab koz lo de verse Labib. Ler sa met lakour in abitye avek en vizit ki pli long, demann li si i annan en landrwa kot zot kapab asize pour zot kontinyen sa konversasyon. Larepons sa met lakour pou fer ou konnen si i vreman anvi etidye Labib. Pour ed li progres pli vitman, ou kapab menm demann li si i pare pour fer letid de fwa par semenn. Me kantmenm sa, i pa ase zis pour fer letid enn oubyen de fwa par semenn.

PREPARE AVAN SAK LETID LABIB

7. Ki mannyer sa ansenyan i kapab prepar byen avan sak letid Labib?

⁷ Konman sa ansenyan, ou bezwen prepar byen avan sak letid Labib. Ou kapab konmans par lir sa ki zot pou etidye e osi bann verse Labib ki’n ganny site dan sa piblikasyon ki zot pe etidye ladan. Fer sir ki ou konpran bann pwen enportan dan sa letid. Reflesir lo tit sa leson, bann soutit, bann kestyon, bann verse ki bezwen ganny “lir,” bann portre ek okenn video ki kapab ede pour eksplik sa size ki zot pe koz lo la. Apre, avek ou etidyan antet, medit lo ki mannyer ou kapab eksplik sa lenformasyon dan en fason senp e kler pour ki sa etidyan i kapab konpran e aplik li.​—Nee. 8:8; Prov. 15:28a.

8. Ki nou aprann avek sa ki Pol ti dir dan Kolosyen 1:9, 10 konsernan priy pour nou bann etidyan?

⁸ Ler ou pe prepare, priy Zeova konsernan sa etidyan e konsernan sa ki pou ed sa etidyan progrese. Demann Zeova pour ed ou ansenny sa ki Labib i dir dan en fason ki pou tous leker sa etidyan. (Lir Kolosyen 1:9, 10.) Demann ou lekor si i annan okenn keksoz ki sa etidyan pou vwar li difisil pour konpran oubyen difisil pour aksepte. Gard antet ki ou lobzektif i pour ed li progrese ziska batenm.

9. Ki mannyer sa ansenyan i kapab ed son etidyan pour prepar son letid? Eksplike.

⁹ Nou ti pou kontan si pandan en letid Labib regilye, en etidyan i devlop rekonesans pour tou sa ki Zeova ek Zezi in fer e ki sa i fer li anvi aprann plis. (Mat. 5:3, 6) Pour sa etidyan kapab ganny bokou byenfe avek son letid, i bezwen konsantre lo sa ki i pe aprann. Pour ed li fer sa, sa ansenyan i bezwen fer li konpran ki i enportan pour li prepare avan sak letid. Ler sa etidyan pe prepare, i bezwen lir sa leson e reflesir lo ki mannyer i kapab aplik sa ki i’n lir. Ki mannyer sa ansenyan i kapab ed li? Sa ansenyan i kapab prepar en leson ansanm avek sa etidyan pour montre li ki mannyer pour prepare.d I kapab montre li ki mannyer pour trouv larepons bann kestyon e ki mannyer pour souliny bann mo pour ed li mazin larepons. Apre, demann li pour reponn dan son prop mo. Ler i fer sa, sa ansenyan pou kapab konnen si i’n konpran byen sa ki i pe etidye. Par kont, i annan en lot keksoz sa ansenyan i kapab ankouraz sa etidyan pour fer.

MONTRE LI KI MANNYER POUR KOMINIK AVEK ZEOVA TOULEZOUR

10. Akoz i enportan pour lir Labib toulezour e ki sa etidyan Labib i bezwen fer pour li tir maksimonm profi avek son lektir?

¹⁰ Apard ki fer letid avek son ansenyan tou le semenn, i ti pou byen si sa etidyan i fer serten keksoz li tousel toulezour. I enportan pour li ekout e koz avek Zeova. I kapab ekout Bondye par lir Labib toulezour. (Zoz. 1:8; Ps. 1:1-3) Montre li ki mannyer pour servi sa “Progranm pour lektir Labib” ki lo jw.org.e Byensir, pour ed li tir maksimonm profi avek son lektir Labib, ankouraz li pour medit lo sa ki Labib i ansennyen konsernan Zeova e lo ki mannyer i kapab aplik sa ki i pe aprann.​—Akt 17:11; Zak 1:25.

11. Ki mannyer en etidyan i kapab aprann pour fer lapriyer senser e akoz i enportan pour li priy Zeova regilyerman?

¹¹ Ankouraz ou etidyan pour koz avek Zeova dan lapriyer toulezour. Fer en lapriyer senser o konmansman e a lafen sak letid e mansyonn ou etidyan dan sa lapriyer. Ler i tann ou lapriyer, i pou aprann ki mannyer pour fer lapriyer senser e ki i devret priy Zeova dan non Zezi. (Mat. 6:9; Zan 15:16) Zis mazinen ki mannyer ou etidyan pou vin pli pros avek Zeova ler i lir Labib toulezour, setadir ekout Zeova e fer lapriyer, setadir koz avek Zeova. (Zak 4:8) Si i fer sa toulezour, sa pou ed li pour progrese ziska i dedye son lavi avek Zeova e batize.

ED LI POUR DEVLOP EN LANMITYE PROS AVEK ZEOVA

12. Ki mannyer en ansenyan i kapab ed son etidyan pour devlop en lanmitye avek Zeova?

¹² Sa ki en etidyan i aprann pandan son letid Labib i devret tous son leker. Akoz? Parski son leker i enplik son bann dezir ek santiman. Si sa ki i pe aprann i tous son leker, sa pou motiv li pour aplik sa ki i pe aprann. Zezi ti ansenny dimoun bokou keksoz e zot ti kontan sa ki zot ti aprann avek li. Me dimoun ti swiv li parski i ti tous zot leker. (Lik 24:15, 27, 32) Ou etidyan i bezwen krwar ki Zeova i vreman egziste e ki i kapab annan en lanmitye pros avek li. I devret realize ki Zeova i kapab vin son Papa, son Bondye e son Zanmi. (Ps. 25:4, 5) Pandan ki ou pe fer letid, fer sa etidyan vwar bann zoli kalite ki nou Bondye i annan. (Egz. 34:5, 6; 1 Pyer 5:6, 7) Ou kapab fer menm parey pour nenport topik ki ou koz lo la avek ou etidyan. Ed sa etidye pour apresye bann zoli kalite ki Zeova i annan, tel parey lanmour, labonte ek konpasyon. Zezi ti dir ki sa “premye komannman e sa enn pli enportan” i pour “kontan Zeova ou Bondye.” (Mat. 22:37, 38) Esey ed ou etidyan pour kontan Zeova.

13. Ki mannyer nou kapab ed en etidyan pour aprann konsernan bann zoli kalite ki Zeova i annan? Donn en legzanp.

¹³ Ler ou pe koz avek ou etidyan, dir li akoz ou kontan Zeova. Sa i kapab ed li realize ki i bezwen annan son prop lanmitye avek Bondye. (Ps. 73:28) Par egzanp, eski i annan en verse Labib oubyen en fraz dan en piblikasyon ki nou etidye ladan ki’n tous ou leker e ki ansenny nou en keksoz konsernan lanmour, lasazes, lazistis oubyen pwisans Zeova? Koz lo la avek ou etidyan e fer li konnen ki sa i enn parmi plizyer rezon akoz ou kontan ou Papa ki dan lesyel. I annan en lot keksoz ankor ki tou etidyan Labib i bezwen fer pour progrese ziska batenm.

ANKOURAZ LI POUR ASISTE RENYON

14. Ki i dir dan Ebre 10:24, 25 konsernan nou bann renyon ki kapab ed nou bann etidyan progrese?

¹⁴ Nou tou nou anvi ki nou etidyan i progrese ziska batenm. En fason enportan ki nou kapab ed zot i ler nou ankouraz zot pour asiste renyon. Bann ansenyan ki eksperyanse i dir ki bann etidyan ki pa tarde pour asiste renyon i fer progre vitman. (Ps. 111:1, NWT) Serten ansenyan i eksplik zot etidyan ki i annan en kantite keksoz ki zot pou aprann dan renyon, ki zot pa pou aprann dan letid. Lir Ebre 10:24, 25 avek ou etidyan e eksplik li akoz i bon pour li asiste renyon. Montre li sa video Kwa ki pase dan Lasal Rwayonm?f Ed ou etidyan pour fer bokou zefor pour pa mank okenn renyon.

15. Ki nou kapab fer pour ankouraz nou etidyan pour asiste renyon?

¹⁵ Ki ou kapab fer si ou etidyan pa ankor asiste renyon oubyen i pa pe asiste renyon regilyerman? Rakont li en keksoz ki ou’n aprann dan renyon resaman e ki ou’n kontan. Ler i vwar ki ou vreman kontan bann renyon, i kapab ki i pou anvi asiste renyon. Donn li en kopi sa Latour Veyer oubyen Kaye renyon ki nou pe servi. Montre li sa ki nou pou diskite dan prosen renyon e demann li ki bout dan renyon ki pli enteresan pour li. Sa ki ou etidyan i vwar e tande ler i asiste son premye renyon pou pli bon ki okenn keksoz ki i vwar e tande dan en lot larelizyon. (1 Kor. 14:24, 25) I pou zwenn lezot dimoun ki pou bann bon legzanp pour li swiv e ki pou ed li progrese ziska batenm.

16. Ki mannyer nou kapab fer bann letid Labib ki progrese ziska batenm e ki nou pou vwar dan sa lartik ki swiv?

¹⁶ Ki mannyer nou kapab fer bann letid Labib ki progrese ziska batenm? Nou kapab ed nou etidyan pour pran son letid o serye par ankouraz li pour etidye sak semenn e pour prepare avan son letid. Nou anvi ankouraz li pour kominik avek Zeova toulezour e pour devlop en lanmitye pros avek Li. Nou osi anvi ankouraz li pour asiste renyon. (Vwar sa bwat, “Sa ki en etidyan i bezwen fer pour progrese ziska batenm.”) Par kont, parey nou pou vwar dan sa lartik ki swiv, i annan ankor senk keksoz ki bann ansenyan i kapab fer pour ed zot etidyan progrese ziska batenm.