Eski ledikasyon ek larzan i en garanti pour en meyer lavenir?

Bokou i krwar ki bann ki ris e ki annan en bon ledikasyon i annan en meyer lavenir. Zot krwar ki bann lakonpannyen, fanmir ek kominote pou benefisye si dimoun i al liniversite. Zot osi krwar ki si ou annan en bon ledikasyon sa pou fer ou ganny en louvraz ki pey byen e ler ou annan bokou larzan, sa i fer ou ere.

EN SWA KI BOKOU DIMOUN I FER

Annou vwar sa ki Zhang Chen, en zonm sorti Lasin i dir: “Mon ti krwar ki pour sorti dan lapovrete, mon ti bezwen en degre liniversite e ki en louvraz ki pey byen ti pou garanti mwan en lavi ere e satisfezan.”

Bokou dimoun i anvi etidye dan bann liniversite renonmen, petet dan lezot pei, pour zot annan en pli bon lavi. Sa ti popiler ziska ki COVID-19 ti fer li difisil pour dimoun vwayaze. Apepre 10 an pase, en lorganizasyon ti fer en letid e i ti raporte ki plis ki lanmwatye bann etidyan ki etidye dan lezot pei i sorti Lazi.

Souvandfwa, bann paran i fer bokou sakrifis pour anvoy zot zanfan etidye liniversite, dan en lot pei. Qixiang sorti Taywann, i dir: “Mon paran pa ti ris, me zot ti anvoy tou le kat zot zanfan liniversite Leta-z-ini.” Parey lezot fanmir, fanmir Qixiang ti bezwen pret en ta larzan pour pey liniversite.

ESKI LEDIKASYON I GARANTI EN MEYER LAVENIR?

Enn sa zenn madanm i paret fatige e strese anmezir i asiz devan konpiter tar aswar. — Bokou ki’n fer letid avanse e ki’n rod larises in dezapwente

Dan bokou ka, ledikasyon i kapab amelyor lavi en dimoun, me i pa toultan anmenn rezilta ki sa bann etidyan ti pe ekspekte. Par egzanp, bokou in travay dir e pret en kantite larzan pour pey liniversite me zot pa ganny sa louvraz ki zot ti anvi. En rapor par Rachel Mui dan zournal Business Times Sengapour i dir: “Bann etidyan ki’n fini letid liniversite i vwar li difisil pour ganny en louvraz.” Jianjie, en zonm ki’n fer plizyer degre liniversite e ki reste Taywann, i dir: “Bokou napa swa me pour aksepte en louvraz ki napa nanryen pour fer avek zot kalifikasyon.”

I annan ki menm si zot in ganny en louvraz dapre zot kalifikasyon, zot in vwar ki zot lavi pa vin parey zot ti ava swete. Apre ki Niran ki sorti Taylenn, ti retournen sorti liniversite Rwayonm Ini, i ti ganny en louvraz dapre son kalifikasyon. Niran i dir: “Parey mon ti pe ekspekte, mon kalifikasyon ti ed mwan pour ganny en louvraz ki pey byen. Me mon ti bezwen travay dir e bokou plis erdtan pour ganny sa saler. Avek letan, sa lakonpannyen ti fer lamazorite travayer aret travay, enkli mwan. Mon ti realize ki napa okenn louvraz ki kapab garanti mwan en meyer lavenir.”

Menm dimoun ki annan en ta larzan e ki paret pe viv en bon lavi, zot ankor annan problenm fanmir, problenm lasante e zot enkyet pour larzan. Katsutoshi ki sorti Zapon i dir: “Mon ti annan en ta larzan me kantmenm sa, mon pa ti ere akoz lezot ti zalou mwan e zot ti tret mwan dan en move fason.” Lam, en madanm ki reste Vyetnanm, i dir: “Bokou dimoun i esey rod en ta larzan akoz zot krwar ki sa pou fer zot lavi meyer. Me souvandfwa zot trakas plis, zot menm malad e tonm dan depresyon.”

AKOZ LEDIKASYON EK LARZAN PA ASE POUR GARANTI EN MEYER LAVENIR

I vre ki en dimoun i bezwen en ledikasyon de baz ek larzan pour pran swen avek son lekor ek son fanmir. Par kont, sa i pa ase pour garanti en meyer lavenir. Akoz non? Annou vwar sa ki Lekritir Sen i dir.

LETID AVANSE PA TOULTAN ANMENN SIKSE.

“Pa toultan bann ki pli vit ki ganny lakours, . . . ni sa ki entelizan larises, ni menm sa ki annan konnesans pa toultan reisi, akoz letan ek levennman san ekspekte i ariv lo tou dimoun san ki zot realize.”—EKLEZYAST 9:11, NWT.

Menm si en dimoun i annan en bon ledikasyon, i pa toultan ki i pou reisi dan lavi akoz i annan bokou keksoz ki i napa kontrol lo la, par egzanp diskriminasyon, problenm ekonomik oubyen problenm politik dan pei.

LARISES I KAPAB PA DIRE.

“Pa rente pour ganny larises. Tyonbo en kou e montre ou entelizan. Ler ou get larises, i pou disparet, akoz vreman i pou ganny lezel parey en leg e i pou anvole dan lesyel.”—PROVERB 23:4, 5, NWT.

Larzan i anmenn serten sekirite me sa pa dire pour lontan. En dimoun i kapab perdi tou son larzan oubyen son landrwa reste akoz bann kriz ekonomik ouswa dezas natirel tel parey tranblemandter, dife lafore ek siklonn.

LARZAN I SOUVAN ANMENN PROBLENM.

“Me larises en dimoun ris i anpes li dormi.”—EKLEZYAST 5:12, NWT.

Se sa ki ti arive avek en msye ki apel Franklin ki reste Hong Kong. I ti’n fer letid avanse e i ti annan en louvraz ki pey byen. Apre i ti ganny promosyon pour vin en manedyer. I ti dir: “Mon ti strese e sa ti annan en lefe lo mon lasante. Mon ti sitan enkyet ki mon pa ti kapab dormi.” Avek letan Franklin pa ti kapab kontinyen avek sa louvraz. I ti dir: “Mon ti konmans demann mon lekor akoz mon ti pe fer sa e sa ti fer mwan reflesir plis lo kwa ki enportan dan lavi.”

“Pa rente pour ganny larises.”—PROVERB 23:4, NWT

Parey Franklin, bokou in realize ki i annan keksoz ki bokou pli enportan dan lavi ki letid avanse ek larises. Olye konsantre lo keksoz materyel, serten in rod en meyer lavenir par esey vin en bon dimoun e fer sa ki bon pour lezot. Eski sa kalite fason viv i garanti en meyer lavenir? Sa lot lartik pour reponn sa kestyon.