Lezot mouton i loue Bondye ek Kris

1. Ki lefe en diskour ki ti ganny fer 1935 ti annan lo en garson?

AN 1926, en garson ti batize a laz 18 an. Son paran ti bann Etidyan Labib e sa ti fason ki Temwen Zeova ti ganny apele sa letan. Son paran ti annan trwa garson ek de fiy e zot ti ansenny zot zanfan pour servi Zeova e pour swiv legzanp Zezi Kri. Parey tou bann Etidyan Labib sa letan, sa garson fidel ti manz dipen e bwar diven pandan Memoryal sak lannen. Me son lespwar ti sanze ler i ti tann sa diskour enportan ki ti annan pour tit “The Great Multitude,” (Sa gran lafoul). Sa diskour ti ganny fer par Joseph Rutherford kot en lasanble Washington, D.C., Leta-z-ini an 1935. Ki bann Etidyan Labib ti aprann kot sa lasanble?

2. Ki sa laverite ki Frer Rutherford ti eksplike dan son diskour?

² Dan sa diskour, Frer Rutherford ti eksplike lekel ki form parti sa “gran lafoul” ki ganny mansyonnen dan Revelasyon 7:9. Ziska sa letan, bann Etidyan Labib ti krwar ki sa gran lafoul ti en group dimoun ki ti pou al dan lesyel me ki zot pa ti sitan fidel parey bann Kretyen swazir. Frer Rutherford ti servi Labib pour eksplike ki bann dimoun ki form parti gran lafoul pa’n ganny swazir pour al viv dan lesyel me zot lezot moutonb Kris ki pou sirviv “gran ladetres” e viv pour touzour lo later. (Rev. 7:14) Zezi ti promet: “Mon annan lezot mouton ki pa dan sa berkay, sa bann osi mon bezwen rasanble zot. Zot pou ekout mon lavwa e i pou annan en sel troupo ek en sel berze.” (Zan 10:16) Sa bann “lezot mouton” i bann Temwen Zeova fidel ki annan sa lespwar pour viv pour touzour dan Paradi lo later. (Mat. 25:31-33, 46) Annou vwar ki mannyer sa nouvo konprenezon lo bann laverite dan Labib, in sanz lavi plizyer Temwen Zeova enkli sa frer 18 an.​—Ps. 97:11; Prov. 4:18.

EN NOUVO KONPRENEZON TI SANZ LAVI PLIZYER MILYE DIMOUN

3-4. Dan sa lasanble an 1935, ki plizyer milye dimoun ti realize konsernan zot lespwar e akoz?

³ En moman eksitan dan sa lasanble i ler sa orater ti demann avek lodyans: “Eski tou bann ki annan sa lespwar pour viv lo later pour touzour i kapab debout silvouple?” En frer ki ti kot sa lasanble ti dir ki i ti vwar plis ki lanmwatye lodyans debout. Apre sa, Frer Rutherford ti dir: “Gete! La sa gran lafoul!” Tou dimoun dan lodyans ti kriye avek lazwa. Sa bann ki ti debout ti realize ki Zeova pa ti’n swazir zot pour al viv dan lesyel. Zot ti konnen ki zot pa ti’n ganny swazir par lespri sen Bondye. Son lannmen dan sa lasanble, i ti annan 840 dimoun ki ti batize e laplipar parmi zot ti form parti lezot mouton.

⁴ Apre sa diskour, sa zenn frer ki’n ganny mansyonnen pli boner, ansanm avek plizyer milye lezot Etidyan Labib ti aret manz sa dipen e bwar sa diven pandan Memoryal. Bokou ti santi parey en frer ki ti dir: “Sa zour Memoryal 1935, ti sa dernyen fwa ki mon ti manz sa dipen e bwar sa diven zour Memoryal. Mon ti realize ki Zeova pa ti’n servi son lespri sen pour donn mwan sa lespwar pour al viv dan lesyel. O kontrer, mon ti annan sa lespwar pour viv lo later e pour ede fer later vin en paradi.” (Rom. 8:16, 17; 2 Kor. 1:21, 22) Depi sa letan, lakantite dimoun ki form parti sa gran lafoul in ogmante e zot pe travay ansanm avek bann Kretyen swazir ki ankor lo later.

5. Ki mannyer Zeova i vwar bann dimoun ki’n aret manz dipen e bwar diven pandan Memoryal?

⁵ I annan en kantite frer ek ser ki ti aret manz dipen e bwar diven pandan Memoryal apre sa lasanble 1935. Ki mannyer Zeova i vwar sa bann frer ek ser? Ki mannyer Zeova i vwar enn son serviter ozordi ki manz sa dipen e bwar sa diven pandan Repa Senyer me ki apre i konpran ki i pa’n ganny swazir par lespri sen? (1 Kor. 11:28) Serten in manz sa dipen e bwar sa diven akoz zot pa ti’n konpran ki lespwar zot annan. Me si zot admet ki zot in fer en fot, zot aret manz sa dipen e bwar sa diven pandan Memoryal e zot kontinyen servi Zeova fidelman, Zeova pou aksepte zot parmi lezot mouton. Menm si zot pa manz dipen e bwar diven pandan Memoryal, zot kontinyen asiste Memoryal parski zot apresye sa ki Zeova ek Zezi in fer pour zot.

EN LESPWAR MERVEYE

6. Ki lord Zezi in donn bann lanz?

⁶ Vi ki gran ladetres i pros, i pou ankourazan pour nou vwar sa ki Revelasyon sapit 7 i dir konsernan bann Kretyen swazir ek lezot mouton. Dan sa sapit, Zezi i donn lord bann lanz pour kontinyen tenir sa kat divan ki pou anmenn destriksyon lo later. Zot devret tenir sa bann divan ziska ki tou bann Kretyen swazir in ganny sele, setadir ziska ki Zeova i deside ki zot fidel. (Rev. 7:1-4) Konman rekonpans pour zot fidelite, sa bann frer swazir Kris i vin lerwa ek pret ansanm avek Zezi dan lesyel. (Rev. 20:6) Zeova, Zezi ansanm avek bann lanz pou vreman kontan pou vwar sa 144,000 Kretyen swazir ganny zot rekonpans dan lesyel.

7. Dapre Revelasyon 7:9, 10, lekel ki Zan ti vwar dan son vizyon e ki zot ti pe fer? (Vwar portre lo kouvertir.)

⁷ Apre ki Zan ti’n koz lo sa 144,000 lerwa ek pret, i ti vwar en keksoz eksitan. Zan ti vwar “en gran lafoul” ki sirviv Armagedon. Dan sa gran lafoul i annan bokou plis dimoun ki sa 144,000 e nou pa konnen ki kantite i annan. (Lir Revelasyon 7:9, 10.) Zot dan “bann rob blan” e sa i montre ki zot kontinyen reste “san okenn tas” dan sa lemonn Satan e zot in reste fidel anver Bondye ek Kris. (Zak 1:27) Zot kriy for ki zot in ganny sove gras a sa ki Zeova ek Zezi, sa Pti Mouton Bondye, in fer. Zot osi annan bann brans pye palm dan zot lanmen ki montre ki zot rekonnet Zezi konman sa Lerwa ki Zeova in swazir.​—Konpar Zan 12:12, 13.

8. Ki Revelasyon 7:11, 12 i dir konsernan Zeova, Zezi, bann lanz ek bann Kretyen swazir ki’n resisite?

⁸ Lir Revelasyon 7:11, 12. Ki ti arive ler bann ki dan lesyel ti vwar sa gran lafoul? Zan ti vwar zot dan lazwa e pe loue Bondye ler zot ti vwar bann ki form parti sa gran lafoul. Zeova, Zezi, bann lanz ek tou bann Kretyen swazir ki’n resisite pou kontan ler zot vwar lakonplisman sa vizyon kot sa gran lafoul i pas atraver gran ladetres.

9. Dapre Revelasyon 7:13-15, ki sa bann ki form parti sa gran lafoul pe fer ozordi?

⁹ Lir Revelasyon 7:13-15. Zan i dir ki sa gran lafoul ti’n “lav zot rob e fer zot rob vin blan dan disan Pti Mouton.” Sa i vedir ki zot annan en konsyans kler e ki zot annan laprouvasyon Zeova. (Iza. 1:18, NWT) Zot bann Kretyen ki’n batize, ki annan lafwa dan sakrifis Zezi e ki annan en lanmitye avek Zeova. (Zan 3:36; 1 Pyer 3:21) I pour sa rezon ki zot annan laprouvasyon Bondye e ki zot kapab servi li lo later “lizour konman aswar.” Ozordi, bann ki form parti sa gran lafoul i devoue e zot fer laplipar sa travay pour anons sa bon nouvel konsernan Rwayonm e pour fer disip. Zot fer sa parski Rwayonm Bondye i sa keksoz pli enportan pour zot.​—Mat. 6:33; 24:14; 28:19, 20.

10. Ki sa gran lafoul i asire e ki promes zot pou vwar akonplir?

¹⁰ Sa gran lafoul ki pas atraver gran ladetres i asire ki Bondye pou kontinyen pran swen avek zot parski “sa Enn ki lo tronn pou kouver zot avek son latant.” Sa promes ki lezot mouton i enpasyan pour vwar akonplir pou finalman vin vre: “[Bondye] pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor.”​—Rev. 21:3, 4.

11-12. (a) Dapre Revelasyon 7:16, 17, ki benediksyon sa gran lafoul pou gannyen? (b) Ki lezot mouton i kapab fer zour Memoryal e akoz?

¹¹ Lir Revelasyon 7:16, 17. Ozordi serten parmi pep Bondye i lafen akoz zot napa ase larzan pou aste manze oubyen akoz i annan lager dan zot pei. Lezot i dan prizon akoz zot lafwa dan Bondye. Par kont, bann ki form parti sa gran lafoul i vreman kontan parski zot konnen ki apre ki sa move lemonn i ganny detrir, zot pou toultan annan en kantite manze spirityel e ase manze pour zot manze. Ler Zeova i detri sa move lemonn Satan, i pou fer sir ki sa gran lafoul i ganny proteze kont son lakoler ki parey “gro lasaler.” Apre gran ladetres, Zezi pou gid bann ki ankor vivan ver “bann sours delo lavi [eternel].” Zis mazinen: Sa gran lafoul i annan en lespwar merveye. Parmi tou sa dimoun ki’n viv lo later, sa gran lafoul pa pou zanmen mor!​—Zan 11:26.

¹² Lezot mouton i rekonesan anver Zeova ek Zezi parski zot annan en lespwar merveye! Menm si Zeova pa’n swazir zot pour al viv dan lesyel, i kontan zot parey i kontan bann Kretyen swazir. Tou le de group i kapab loue Bondye ek Kris. En fason zot fer sa, i ler zot asiste Memoryal.

LOUE ZEOVA EK ZEZI AVEK TOU OU LEKER ZOUR MEMORYAL

13-14. Akoz bann Kretyen swazir ek bann ki form parti lezot mouton i bezwen asiste Memoryal?

¹³ Dan sa bann dernyen lannen, dan 1,000 dimoun ki asiste Memoryal, pa plis ki en dimoun ki manz sa dipen e bwar sa diven. Sa i vedir ki dan laplipar kongregasyon dan lemonn, i napa personn ki manz sa dipen e bwar sa diven zour Memoryal. Sa i montre ki laplipar frer ek ser ki asiste Memoryal i annan sa lespwar pour viv lo later. Me alor, akoz zot asiste Memoryal? Zot fer sa pour menm rezon ki dimoun i asiste maryaz en zanmi. Bann zanmi i asiste maryaz pour montre ki zot kontan e siport sa koup ki pe marye. Pareyman, bann ki form parti lezot mouton i asiste Memoryal parski zot anvi demontre zot lanmour ek sipor pour Kris ek bann Kretyen swazir. Lezot mouton i osi asiste Memoryal pour montre zot lapresyasyon pour sakrifis Zezi ki fer li posib pour zot viv pour touzour lo later.

¹⁴ En lot rezon enportan ki lezot mouton i asiste Memoryal i akoz zot pe obei lord Zezi. Ler Zezi ti entrodwi Repa Senyer avek son bann zapot, i ti dir zot: “Kontinyen fer sa pour montre ki zot pe mazin mwan.” (1 Kor. 11:23-26) Alor, bann ki form parti lezot mouton i kontinyen asiste Repa Senyer tan ki i annan bann Kretyen swazir ki ankor lo later. Anfet, bann ki form parti lezot mouton i envit tou dimoun pour asiste Memoryal ansanm avek zot.

15. Ki nou kapab fer pour loue Bondye ek Kris zour Memoryal?

¹⁵ Pandan Memoryal, nou annan sa loportinite pour loue Bondye ek Kris ler nou sant kantik e priy ansanm. Sa diskour ki pou ganny fer sa lannen i annan pour tit “Apresye sa ki Bondye ek Kris in fer pour ou!” Sa diskour pou ogmant nou lapresyasyon pour Zeova ek Kris. Alor, ler dipen ek diven pe ganny pase, nou pou kapab reflesir lo sa ki zot reprezante, setadir lekor ek disan Zezi. Nou pou reflesir lo sa lanmour ki Zeova in demontre pour nou ler i ti permet son Garson pour mor dan nou plas pour ki nou kapab ganny lavi. (Mat. 20:28) Tou dimoun ki kontan nou Papa ek son Garson pou anvi asiste Memoryal.

REMERSYE ZEOVA POUR SA LESPWAR KI I’N DONN OU

16. Dan ki fason bann Kretyen swazir ek lezot mouton i parey?

¹⁶ Dan serten fason, bann Kretyen swazir ek lezot mouton i parey. Tou le de i enportan pour Zeova. I kontan zot tou le de parey. Apre tou, i ti pey pour tou le de group ler i ti sakrifye son Garson. Diferans ki i annan ant sa de group i ki zot lespwar i diferan. Tou le de group i bezwen reste fidel anver Bondye ek Kris. (Ps. 31:23) Rapel ki lespri sen Bondye i kapab travay lo nou tou parey. Sa i vedir ki Zeova i donn son lespri sen sak dimoun dapre sa ki i bezwen, ki swa i en Kretyen swazir oubyen i form parti lezot mouton.

17. Ki bann Kretyen swazir ki ankor lo later pe espere?

¹⁷ Bann Kretyen swazir pa ne avek sa lespwar pour al viv dan lesyel. Bondye ki’n donn zot sa lespwar. Zot mazin lo zot lespwar, priy lo la e zot vreman anvi ganny zot rekonpans dan lesyel. Zot pa konnen ki mannyer zot lekor pou ete ler zot dan lesyel. (Fili. 3:20, 21; 1 Zan 3:2) Me kantmenm sa, zot vreman anvi rankontre Zeova, Zezi, bann lanz ek lezot Kretyen swazir e pour ansanm avek zot dan Rwayonm Bondye dan lesyel.

18. Ki lezot mouton pe espere avek enpasyans?

¹⁸ Lezot mouton i vreman anvi viv pour touzour lo later. Sa i en keksoz ki tou imen i anvi. (Ekle. 3:11, NWT) Zot pe esper sa zour kot zot pou kapab ede pour fer later antye vin en paradi. Zot enpasyan pour sa zour kot zot kapab konstri zot prop lakaz, annan zot zarden e elve bann zanfan ki annan en lasante parfe. (Iza. 65:21-23) Zot osi enpasyan pour vwayaz partou lo later, pour vwar bann montanny, lafore, losean e pour etidye tou keksoz ki Zeova in kree. Sa ki fer zot pli zwaye i ki zot konnen ki dan paradi, zot lanmitye avek Zeova pou kontinyen vin pli for.

19. Ki nou tou nou kapab fer zour Memoryal e kan ki Memoryal pou ganny fer sa lannen?

¹⁹ Zeova in donn tou son bann serviter en lespwar merveye pour lavenir. (Zer. 29:11) Memoryal lanmor Kris i donn nou tou sa loportinite pour loue Bondye ek Kris pour tou sa ki zot in fer pour nou kapab viv pour touzour. Memoryal i sa renyon pli enportan ki bann vre Kretyen i fer tou le lannen. I pou ganny fer apre soley kouse Sanmdi le 27 Mars 2021. Sa lannen, en kantite dimoun ki reste dan bann landrwa kot zot lib pour asiste sa levennman enportan, pou kapab fer li. I annan lezot ki pou asiste malgre lopozisyon. Serten pou selebre sa Memoryal dan prizon. Ki tou dimoun, ki swa dan kongregasyon, group oubyen zot tousel, i pas en bon Memoryal anmezir ki Zeova, Zezi, bann lanz ek bann Kretyen swazir ki’n ganny resisite i obzerve.