Bann koup marye, konsantre lo zot servis pour Zeova

1-2. (a) Akoz bann koup ki’n fek marye i devret annan konfyans dan Zeova? (Psonm 37:3, 4) (b) Ki nou pou vwar dan sa lartik?

ESKI ou pe al marye ouswa ou’n fek marye? Si wi, ou vreman anvi viv ou lavi avek sa dimoun ki ou vreman kontan. Byensir, lavi maryaz pa toultan fasil e i annan bann desizyon enportan pour fer. Si ou pou zwaye dan ou maryaz pandan bann lannen ki vini, sa i depan lo lafason ki ou fer fas avek bann difikilte ek desizyon ki ou fer la konmela. Si ou depan lo Zeova, ou pou fer bann bon desizyon. Ou maryaz pou vin pli for e ou pou pli ere. Si ou pa aplik bann konsey sorti kot Bondye, i tre probab ki ou pou fer fas avek bann difikilte ki pou anmenn problenm dan ou maryaz e ou pa pou ere.​—Lir Psonm 37:3, 4, NWT.

² Menm si sa lartik i pour bann koup ki’n fek marye, i pou diskit lo bann difikilte ki tou koup marye i kapab annan. Nou pou vwar ki nou kapab aprann avek legzanp bann msye ek madanm fidel ki dan Labib. Sa bann legzanp dan Labib i ansenny nou bann leson ki nou kapab aplike dan nou lavi e dan nou lavi maryaz. Nou pou osi vwar ki nou kapab aprann avek leksperyans bann koup dan nou letan.

KI DIFIKILTE BANN KOUP KI’N FEK MARYE I KAPAB FER FAS AVEK?

3-4. Ki difikilte bann koup ki’n fek marye i kapab fer fas avek?

³ I kapab ki serten dimoun i ankouraz en koup ki’n fek marye pour viv parey laplipar dimoun pe viv ozordi. Par egzanp, i kapab ki bann paran ek lezot fanmir i met presyon lo en koup pour konmans fer zanfan pli vit posib. Oubyen i kapab ki bann zanmi ek manm fanmir i ankouraz en koup ki’n fek marye pour aste en lakaz ek en kantite keksoz pour fer zot konfortab.

⁴ Si en koup pa fer atansyon, zot pou kapab fer bann desizyon ki pou fer zot ganny en kantite det. I tre probab ki sa msye ek sa madanm pou bezwen travay en kantite erdtan pour zot kapab pey sa bann det e zot pou napa ase letan pour fer predikasyon, letid Labib personnel ek ladorasyon fanmir. I kapab ki sa koup pou bezwen mank renyon pour zot travay apre ler pour ganny plis larzan oubyen pour zot gard zot travay. Sa pou fer ki zot pou mank en kantite loportinite pour fer plis dan zot servis pour Zeova.

5. Ki ou aprann avek sa ki ti arive avek Klaus ek Marisa?

⁵ En kantite legzanp i montre ki ler bann keksoz materyel i sa keksoz ki pli enportan dan nou lavi, nou pa ere. Annou vwar sa ki en koup ki apel Klaus ek Marisa ti aprann.b Ler zot ti marye, zot tou le de zot ti travay a plen tan pour kapab annan en kantite larzan ek keksoz materyel. Me zot pa ti ere. Klaus i dir: “Nou ti annan plis ki sa ki nou ti bezwen me nou ti napa okenn lobzektif pour fer plis pour Zeova. Anfet, lavi ti konplike e nou ti anba en kantite stres.” Petet ou osi ou’n remarke ki ler ou konsantre lo bann keksoz materyel, sa pa’n fer ou ere. Si wi, pa dekouraze. Annou vwar bann bon legzanp ki kapab ed ou pour fer bann sanzman. Premyerman, annou vwar ki bann msye i kapab aprann avek sa ki Lerwa Zeosafat ti fer.

PAREY LERWA ZEOSAFAT, ANNAN KONFYANS DAN ZEOVA

6. Ki mannyer Zeosafat ti aplik sa prensip dan Proverb 3:5, 6 ler en gran larme ti vin lager avek son pep?

⁶ Bann msye marye, eski parfwa zot santi zot anba presyon akoz zot bann responsabilite? Si wi, zot kapab benefisye avek legzanp Lerwa Zeosafat. Konman lerwa, i ti responsab pour protez son pep antye. Ki mannyer i ti fer sa? Zeosafat ti fer sa ki i ti kapab pour protez sa pep. I ti fortifye bann lavil Zida e i ti rasanble en gran larme ki ti annan plis ki 1,160,000 solda. (2 Kron. 17:12-19) Pli tar, Zeosafat ti fer fas avek en gro problenm. En gran larme bann Amonit, Moabit ek bann zonm ki sorti dan rezyon bann montanny Seir ti menas li, son fanmir ek son pep. (2 Kron. 20:1, 2) Ki Zeosafat ti fer? I ti demann Zeova pour ed li e donn li lafors. Sa ti annakor avek sa konsey saz ki dan Proverb 3:5, 6, NWT. (Lir.) Lapriyer Zeosafat ki dan 2 Kronik 20:5-12 i montre ki kantite i ti annan konfyans dan son Papa ki dan lesyel ki kontan li. Ki mannyer Zeova ti reponn lapriyer Zeosafat?

7. Ki mannyer Zeova ti reponn lapriyer Zeosafat?

⁷ Zeova ti koz avek Zeosafat atraver en levit ki ti apel Zaryel. Zeova ti dir: “Pran zot pozisyon, pa bouze e vwar konman Zeova pou sov zot.” (2 Kron. 20:13-17, NWT) Normalman, sa i pa en fason pour lager dan en batay. Par kont sa bann lenstriksyon pa ti sorti kot en imen, zot ti sorti kot Zeova. Zeosafat ti annan konfyans total dan Bondye e i ti obei sa bann lenstriksyon. Ler Zeosafat ek son bann dimoun ti al lo fron batay, i pa ti met bann solda ki ti pli eksperyanse devan. O kontrer i ti met bann santer ki ti napa okenn zarm. Zeova ti gard son promes ki i ti’n fer avek Zeosafat e i ti ranport laviktwar lo son bann lennmi.​—2 Kron. 20:18-23.

8. Ki bann msye marye i kapab aprann avek legzanp Zeosafat?

⁸ Bann msye marye, zot kapab aprann avek legzanp Zeosafat. Ou annan sa responsabilite pour pran swen avek ou fanmir. Alor, ou travay dir pour protez e siport ou fanmir. Ler ou annan problenm, petet ou santi ki ou kapab rezourd ou problenm ou menm. Me pa depan lo ou prop lekor. O kontrer, ler ou tousel, priy Zeova pour ganny led. An plis, fer en lapriyer senser ansanm avek ou madanm. Rod gidans Zeova par etidye Labib ek bann piblikasyon ki lorganizasyon Bondye i donnen e aplik sa konsey ki ou gannyen. I kapab ki lezot pa dakor avek bann desizyon ki ou fer e zot menm kapab dir ou ki ou bet. Zot kapab dir ou ki larzan ek bann keksoz ki larzan i kapab aste, pou donn ou fanmir sa pli bon proteksyon. Me rapel legzanp Zeosafat. I ti met konfyans dan Zeova e i ti montre sa par son aksyon. Zeova pa ti abandonn sa zonm fidel e i pa pou abandonn ou. (Ps. 37:28, NWT; Ebr. 13:5) Kwa ankor ki bann koup i kapab fer pour fer sir ki zot ere?

PAREY PROFET IZAI EK SON MADANM, FER OU SERVIS POUR ZEOVA SA KEKSOZ PLI ENPORTAN DAN OU LAVI

9. Ki nou kapab dir lo profet Izai ek son madanm?

⁹ Sa ki ti pli enportan pour Izai ek son madanm ti pour servi Zeova. Izai ti en profet e petet son madanm osi ti profetize parski i ti ganny apele “en profet.” (Iza. 8:1-4, NWT) Konman en koup, Izai ek son madanm ti met ladorasyon Zeova premye dan zot lavi. Zot in kit en bon legzanp pour bann koup ki’n marye ozordi!

10. Ler bann koup marye i etidye bann profesi Labib, ki mannyer sa i ed zot pour vin pli determinen pour fer tou sa ki zot kapab pour servi Zeova?

¹⁰ Bann koup marye ozordi i kapab swiv legzanp Izai ek son madanm par fer tou sa ki zot kapab dan servis Zeova. Zot kapab met plis konfyans dan Zeova par etidye bann profesi Labib ansanm e vwar ki mannyer zot toultan vin vre.c (Tit 1:2) Zot kapab osi mazinen ki zot kapab fer pour ede akonpli serten profesi Labib. Par egzanp, zot kapab ede akonpli sa profesi Zezi ki dir ki sa bon nouvel pou ganny anonse partou lo later avan lafen i arive. (Mat. 24:14) Pli en koup i asire ki bann profesi Labib pe akonpli, zot pou pli determinen pour fer tou sa ki zot kapab pour servi Zeova.

PAREY PRISIL EK AKILA, MET LENTERE RWAYONM PREMYE

11. Ki Prisil ek Akila ti kapab fer e akoz?

¹¹ Bann zenn koup marye i kapab aprann avek Prisil ek Akila, ki ti en koup Zwif ki ti reste dan lavil Ronm. Zot ti tann sa bon nouvel konsernan Zezi e zot ti vin bann Kretyen. San dout, zot ti satisfe avek zot lavi. Me ler lanperer Klod ti donn lord tou bann Zwif pour kit Ronm, zot lavi ti sanz en sel kou. Annou vwar ki lefe sa ti annan lo Prisil ek Akila. Zot ti bezwen kit sa landrwa ki zot ti’n abitye avek, rod en nouvo landrwa reste e rekonmans zot biznes fer latant. Eski sa bann sanzman ti anpes zot fer tou sa ki zot ti kapab pour Zeova? I tre probab ki ou konn larepons sa kestyon. Dan zot nouvo landrwa reste dan lavil Korent, Prisil ek Akila ti ed sa kongregasyon laba e zot ti travay avek zapot Pol pour ankouraz bann frer ek ser laba. Pli tar, zot ti al reste dan bann lezot lavil kot i ti annan bezwen pour plis proklanmater. (Akt 18:18-21; Rom. 16:3-5) Zot ti vreman bizi e zot ti ere!

12. Akoz en koup marye i bezwen met bann lobzektif dan zot servis pour Zeova?

¹² Bann koup dan nou letan i kapab swiv legzanp Prisil ek Akila par met lentere Rwayonm premye. Sa pli bon moman pour en koup diskit lo zot bann lobzektif, i ler zot pe pwente. Ler en koup i met bann lobzektif dan zot servis pour Zeova e zot travay dir pour atenn sa bann lobzektif, zot pou annan plis loportinite pour vwar ki Zeova i ed zot. (Ekle. 4:9, 12) Annou vwar legzanp Russell ek Elizabeth. Russell i dir: “Ler nou ti pe pwente, nou ti diskit lo nou bann lobzektif spirityel.” Elizabeth i dir: “Nou ti diskit lo sa bann keksoz pour ki ler nou ti pou bezwen fer bann desizyon pli tar, nou ti pou fer sir ki nou bann desizyon pa anpes nou atenn sa bann lobzektif.” Sirkonstans Russell ek Elizabeth ti permet zot pour al reste Micronesia pour servi kot i annan bezwen pour plis proklanmater.

13. Dapre Psonm 28:7, ki pou arive ler nou met nou konfyans dan Zeova?

¹³ Parey Russell ek Elizabeth, en kantite koup in deside pour gard zot lavi senp pour zot kapab pas plis letan posib pour anons e ansenny sa bon nouvel. Ler en koup i met bann lobzektif pour fer tou sa ki zot kapab pour Zeova e zot travay ansanm pour atenn sa bann lobzektif, bann bon keksoz pou arive. Zot pou vwar ki Zeova i pran swen avek zot, zot pou devlop plis konfyans dan li e zot pou vreman ere.​—Lir Psonm 28:7, NWT.

PAREY ZAPOT PYER EK SON MADANM, ANNAN KONFYANS DAN PROMES ZEOVA

14. Ki mannyer zapot Pyer ek son madanm ti montre ki zot ti annan konfyans dan sa promes dan Matye 6:25, 31-34?

¹⁴ Bann koup marye i osi kapab aprann avek legzanp zapot Pyer ek son madanm. Apepre enn an apre ki zapot Pyer ti’n zwenn Zezi, i ti bezwen fer en desizyon enportan. Pyer ti annan biznes lapes e sa ti ed li pour pran swen avek son fanmir. Alor, ler Zezi ti envit Pyer pour vin son disip, Pyer ti bezwen mazin son madanm ler i ti fer son desizyon. (Lik 5:1-11) Pyer ti deside pour al anons sa bon nouvel ansanm avek Zezi. I ti fer en bon desizyon! Nou annan bon rezon pour krwar ki madanm Pyer ti siport son desizyon. Labib i dir ki apre ki Zezi ti’n resisite, madanm Pyer ti al avek Pyer lo serten son bann vwayaz. (1 Kor. 9:5) Vi ki madanm Pyer ti en bon madanm Kretyen, Pyer ti kapab donn konsey bann msye ek madanm Kretyen. (1 Pyer 3:1-7) Pyer ek son madanm ti annan konfyans dan promes Zeova ki I ti pou pran swen avek zot si zot met Rwayonm premye dan zot lavi.​—Lir Matye 6:25, 31-34.

15. Ki ou aprann avek leksperyans Tiago ek Esther?

¹⁵ Si ou’n marye pour plizyer lannen, ki mannyer ou kapab kontinyen devlop sa dezir pour fer plis pour Zeova? En fason ki ou kapab fer sa, i ler ou aprann avek leksperyans lezot koup. Par egzanp, ou kapab lir sa seri “They Offered Themselves Willingly” an Angle. Sa bann lartik ti ed Tiago ek Esther, en koup marye ki sorti Brezil, pour anvi al servi kot i annan plis bezwen. Tiago i dir: “Ler nou ti lir ki mannyer Zeova in ed son bann serviter dan nou letan, nou osi nou ti anvi swiv gidans Zeova e santi ki i pe ed nou.” Pli tar, zot ti al reste Paraguay e depi 2014 zot pe servi dan en landrwa ki koz Portige. Esther i dir: “En verse ki nou vreman kontan i Efezyen 3:20. Plizyer fwa dan nou servis pour Zeova, nou’n vwar sa bann parol vin vre.” Dan sa let ki Pol ti ekri pour bann Kretyen Efez, i ti promet ki Zeova pou donn nou plis ki sa ki nou demande. Sa promes in vin vre plizyer fwa!

16. Ler bann koup ki’n fek marye pe mazin konsernan zot bann lobzektif, avek lekel zot devret rod konsey?

¹⁶ Bann koup ki’n fek marye i kapab benefisye avek leksperyans lezot koup ki’n aprann pour depan lo Zeova. I annan serten koup ki’n servi Zeova a plen tan pour plizyer lannen. Si ou pe mazin konsernan ou bann lobzektif, ou kapab demann zot konsey. Sa i en lot fason pour montre ki ou annan konfyans dan Zeova. (Prov. 22:17, 19, NWT) Bann ansyen osi i kapab ed bann koup ki’n fek marye pour met e atenn bann lobzektif dan servis Zeova.

17. Ki ti arive avek Klaus ek Marisa e ki nou kapab aprann avek zot leksperyans?

¹⁷ I kapab ki parfwa nou deside pour fer plis pour Zeova me keksoz pa ariv parey nou ti ava kontan. Annou vwar ki ti arive avek Klaus ek Marisa, ki’n ganny mansyonnen pli boner. Trwa-z-an apre ki zot ti’n marye, zot ti kit zot lakour pour al ede dan travay konstriksyon kot Biro Brans Finlenn. Me zot ti aprann ki zot pa ti pou ganny drwa reste laba pour plis ki sis mwan. O konmansman zot ti dezapwente me apre zot ti ganny envite pour asiste en laklas pour aprann langaz Arab. Aprezan, zot pe servi dan en landrwa ki koz Arab dan en lot pei e zot vreman kontan. Ler Marisa i mazin sa ki’n arive, i dir: “Mon ti per pour fer en keksoz ki mon pa’n deza fer e mon ti bezwen met tou mon konfyans dan Zeova. Me mon’n vwar ki Zeova in toultan ed nou dan bann fason ki nou pa ekspekte. Sa in fer mwan annan plis konfyans dan Zeova.” Parey sa legzanp i montre, ou kapab asire ki Zeova pou toultan rekonpans ou si ou met ou konfyans dan li.

18. Ki bann koup ki’n marye i kapab fer pour kontinyen annan konfyans dan Zeova?

¹⁸ Maryaz i en kado sorti kot Zeova. (Mat. 19:5, 6) I oule ki bann koup ki’n marye i kontan sa kado. (Prov. 5:18) Bann koup ki’n fek marye, reflesir lo sa ki zot pe fer avek zot lavi. Eski zot pe fer tou sa ki zot kapab pour montre Zeova ki kantite zot apresye sa bann kado ki i’n donn zot? Koz avek Zeova dan lapriyer. Rod bann prensip dan son Parol ki aplik pour ou. Apre swiv sa konsey ki Zeova i donn ou. Si ou fer ou servis pour Zeova vin sa keksoz pli enportan dan ou maryaz, ou kapab asire ki ou pou ere!