Akoz laenn i kontinyen?

Akoz i kontinyen annan laenn dan lemonn? Pour konn larepons, nou bezwen konnen kisisa laenn, akoz dimoun i konmans annan laenn e ki mannyer laenn i propaze.

Kisisa laenn?

Laenn i ler en dimoun i vreman pa kontan en lot dimoun oubyen en group dimoun. I plis ki zis ankoler avek en dimoun pour en pe letan.

AKOZ DIMOUN I KONMANS ANNAN LAENN?

I annan plizyer rezon akoz dimoun i konmans ay son kanmarad. Dimoun i souvan ay son kanmarad, pa akoz sa ki en dimoun i fer me akoz sa ki en dimoun i ete. Zot kapab vwar sa bann dimoun konman bann move dimoun ki danzere e ki pa kapab sanze. Zot osi kapab vwar sa bann dimoun konman enferyer, en menas oubyen dimoun ki fer problenm. I kapab ki sa dimoun ki ay son kanmarad, i’n soufer akoz vyolans, lenzistis oubyen lezot levennman ki’n fer li devlop sa laenn.

KI MANNYER LAENN I PROPAZE?

Parfwa, dimoun i ay lezot menm si zot pa’n deza zwenn sa dimoun. Par egzanp, en dimoun i souvan annan menm santiman ki son fanmir oubyen zanmi i annan anver serten group dimoun. Alor, laenn i kapab fasilman ganny propaze ant bann group dimoun ki partaz menm santiman.

Ler nou konpran ki mannyer laenn i fasilman ganny propaze, nou kapab konpran akoz bokou dimoun i ay son kanmarad. Me pour nou sirmont laenn dan lemonn, nou bezwen konnen ki mannyer laenn ti konmanse. Nou kapab aprann sa dan Labib.

LABIB I DIR KI MANNYER LAENN TI KONMANSE

En desen ki montre de fles ki vir an ron ki reprezant bann fakter ki kontribye pour laenn kontinyen. 1. Dimoun i ganny fo lenformasyon avek dimoun ki zot frekante, dimoun lo Enternet ek sa ki zot lir oubyen gete dan nouvel. 2. Dimoun pa familye avek kiltir, ras oubyen larelizyon. 3. Dimoun i per sanzman, sa ki zot kapab perdi oubyen sa ki kapab arive avek zot. 4. Laenn i enkli prezidis, diskriminasyon ek vyolans.

LAENN PA TI KONMANS AVEK IMEN. I ti konmans avek en lanz dan lesyel ki ti rebel kont Bondye e ki pli tar i ti ganny apele Satan oubyen Dyab. Dyab “ti vin en mertriye ler i ti konmans” son rebelyon. “Parski i en manter e i papa mansonz” in kontinyen promot laenn ek vyolans. (Zan 8:44; 1 Zan 3:11, 12) Labib i dir ki Satan i ankoler, agresif e i pare pour fer dimoun ditor.—Zob 2:7; Revelasyon 12:9, 12, 17.

I FASIL POUR IMEN ENPARFE DEVLOP LAENN. Adan, sa premye zonm ti swiv legzanp Satan. Sa i fer ki tou imen in erit pese ek lenperfeksyon. (Romen 5:12) Kaen, premye garson Adan ti ay son frer Abel e i ti touy li. (1 Zan 3:12) I vre ki bokou imen i demontre lanmour ek konpasyon. Me akoz imen in erit pese, bokou zot i egois, groker, orgeye e sa i fer zot devlop laenn.—2 Timote 3:1-5.

I PLI FASIL POUR ANNAN LAENN LER I ANNAN DISKRIMINASYON. Sa lemonn ki nou pe viv ladan i promot laenn atraver bann move latitid ek kondwit ki danzere. Diskriminasyon, prezidis, lensilt ek vandalizm i ogmante akoz “lemonn antye i anba kontrol Satan.”—1 Zan 5:19.

Par kont, Labib pa zis dir ki mannyer laenn ti konmanse. I osi dir ki mannyer i pou fini.