KI MANNYER NOU KAPAB SIRMONT LAENN

2 | Pa bezwen revanze

Sa ki Labib i dir:

“Pa rann personn mal pour mal. . . . Fer tou sa ki depan lo zot pour viv anpe avek tou dimoun si i posib. Mon bann frer, pa bezwen revanze, . . . parski i’n ganny ekrir: ‘La sa ki Zeova in dir, “Mwan ki revanze, mwan ki pou fer peye.”’”—ROMEN 12:17-19.

Ki i vedir:

Menm si i normal pour ankoler ler en dimoun i fer nou ditor, Bondye pa anvi ki nou esey fer sa dimoun ditor. O kontrer, i ankouraz nou pour annan pasyans akoz i’n promet ki en zour i pou retir tou lenzistis.—Psonm 37:7, 10.

Sa ki ou kapab fer:

Ler bann imen enparfe i revanze, sa i fer ki i kontinyen annan laenn. Alor, si en dimoun in ofans ou oubyen fer ou ditor, pa fer parey. Esey kontrol ou santiman e azir dan en fason kalm. Dan serten ka, i pli bon pour oubliy sa ki’n arive. (Proverb 19:11) Dan lezot ka, i pou pli bon si ou raport sa ki’n arive. Par egzanp, dan bann ka ki ou viktim dan en krim, ou kapab swazir pour raport sa krim avek lapolis oubyen lezot lotorite.

Ler ou kontinyen annan laenn ou detri ou prop lekor

Me ki ou kapab fer si napa en fason pour rezourd sa problenm dan lape? Oubyen si ou’n fer tou sa ki ou kapab pour rezourd sa problenm dan lape? Pa revanze. Si ou revanze, i tre probab ki sa pou fer sa sityasyon vin pli pir. Me si ou pa revanze, ou pou kapab sirmont laenn. Ou kapab aprann pour annan konfyans dan lafason ki Zeova i rezourd problenm. “Annan konfyans dan li e i pou azir dan ou faver.”—Psonm 37:3-5.

En leksperyans—ADRIÁN

I ti kontrol son santiman pour pa revanze

Ler Adrián ti ankor adolesan, i ti vyolan, i ti ranpli avek laenn e i ti anvi fer ditor nenport dimoun ki ti’n fer li ditor. Adrián i dir: “Souvandfwa, mon ti lager avek fizi e plizyer fwa mon ti ganny lese demi mor dan semen, bennyen dan disan.”

Adrián ti konmans etidye Labib ler i ti annan 16 an. I dir: “Anmezir ki mon ti kontiny mon letid Labib, mon ti realize ki mon ti bezwen fer serten sanzman dan mon personnalite.” I ti bezwen aret annan laenn e aret servi vyolans. I ti apresye sa ki i ti aprann dan Romen 12:17-19 konsernan pa revanze. I ti osi dir: “Avek letan, mon ti aksepte ki Zeova pou retir lenzistis dan son prop fason e dan son moman apropriye. Ptitapti, mon ti nepli vyolan.”

En zour swar, en group zenn sorti dan en geng ki Adrián ti deza lager avek avan ti atak li. Zot sef ti kriye, “Defann ou lekor!” Adrián i dir: “Mon ti vreman anvi lager avek zot mwan osi.” Me olye lager avek zot, i ti deswit priy Zeova e i ti sove.

Adrián i kontinyen dir: “Son lannmen mon ti zwenn sef sa geng li tousel. Mon ti telman ankoler ki mon ti anvi revanze me ankor enn fwa mon ti priy Zeova trankilman e sipliy li pour ed mwan kontrol mon lekor. Mon ti sirprann ler sa zenn garson ti apros mwan e dir, ‘Pardonn mwan pour sa ki’n arive yer swar. Pour dir ou laverite, mon ti pou kontan vin parey ou. Mon anvi etidye Labib.’ Mon ti vreman kontan ki mon ti’n reisi kontrol mon lakoler. Gras a mon kondwit, sa zenn garson ti konmans etidye Labib avek mwan.”