KI MANNYER NOU KAPAB SIRMONT LAENN
3 | Retir laenn dan ou lespri
Sa ki Labib i dir:
“Transform zot par sanz zot fason panse, pour ki zot menm zot fer sir ki sa i lavolonte Bondye, ki bon, akseptab e parfe.”—ROMEN 12:2.
Ki i vedir:
Fason ki nou panse i enportan pour Bondye. (Zeremi 17:10) Nou bezwen fer plis ki evit bann parol ek aksyon ki promot laenn. Laenn i konmans dan nou lespri ek leker. Alor nou bezwen retir okenn latras laenn dan nou bann panse ek santiman. Ler nou fer sa, nou pou kapab “transform” nou e sirmont laenn.
Sa ki ou kapab fer:
Reflesir onnetman lo lafason ki ou panse e santi anver lezot, espesyalman dimoun ki sorti dan en lot ras oubyen en lot nasyonalite. Demann ou lekor: ‘Ki mannyer mon vwar zot? Eski lafason ki mon vwar zot i baze lo sa ki mon konnen lo zot personnelman? Oubyen eski i baze lo prezidis?’ Evit bann keksoz lo Enternet, film oubyen divertisman ki promot laenn ek vyolans.
Parol Bondye i kapab ed nou sirmont laenn dan nou leker ek lespri
I pa toultan fasil pour egzamin nou panse ek santiman dan en fason onnet. Me parol Bondye i kapab ed nou “konn tou panse ek lentansyon ki dan leker.” (Ebre 4:12) Alor kontinyen egzamin sa ki Labib i dir. Konpar sa ki i dir avek ou prop fason panse e esey ou mye pour mazin dan en fason ki fer Bondye plezir. Parol Bondye i kapab ed nou sirmont laenn “ki’n byen anrasinen” dan nou lespri ek leker.—2 Korentyen 10:4, 5.