Nou kapab viv pour touzour

1. Ler nou medit lo promes Zeova konsernan lavi eternel, ki lefe sa i annan lo nou?

ZEOVA in promet pour donn bann ki obei li “lavi eternel.” (Rom. 6:23) Ler nou medit lo sa promes ki Zeova in fer avek nou, sa i fer nou kontan li plis. Zis mazin sa: Nou Papa ki dan lesyel i sitan kontan nou ki i’n ofer nou lavi eternel pour ki nou pa zanmen separe avek li.

2. Ki mannyer sa promes konsernan lavi eternel i ed nou?

² Promes Bondye konsernan lavi eternel i ed nou pour andir nou bann problenm. Menm si nou bann lennmi i menase pour touy nou, nou pa pou aret servi Zeova. Akoz? En rezon i akoz nou konnen ki si nou mor fidel avek Zeova, i pou resisit nou e nou annan sa lespwar pour viv pour touzour kot nou pa pou zanmen mor ankor. (Zan 5:28, 29; 1 Kor. 15:55-58; Ebr. 2:15) Akoz nou kapab asire ki i posib pour nou viv pour touzour? Annou vwar detrwa rezon.

ZEOVA I VIV POUR TOUZOUR

3. Akoz nou kapab asire ki Zeova i kapab fer nou viv pour touzour? (Psonm 102:12, 24, 27)

³ Nou konnen ki Zeova i kapab fer nou viv pour touzour parski Zeova i Sours lavi e i viv pour touzour. (Ps. 36:9) Remark sa detrwa verse ki montre ki Zeova in toultan egziste e ki i pou toultan egziste. Psonm 90:2 i dir ki Zeova i egziste “depi touzour e pour touzour.” Psonm 102 i dir en keksoz en pe parey. (Lir Psonm 102:12, 24, 27.) Profet Abakouk ti dir sa konsernan nou Papa ki dan lesyel: “O Zeova, pa ou’n toultan egziste? O mon Bondye Sen, ou pa mor.”​—Aba. 1:12.

4. Eski ou devret enkyet si ou vwar li difisil pour konpran sa nide ki Zeova in toultan egziste? Eksplike.

⁴ Eski ou vwar li difisil pour konpran sa nide ki Zeova in egziste “pour leternite”? (Iza. 40:28) En kantite dimoun i santi koumsa. Eliou ti dir sa konsernan Bondye: “Personn pa konpran son laz.” (Zob 36:26) Me menm si nou pa konpran en keksoz, sa pa vedir ki sa keksoz pa vre. Par egzanp, i kapab ki nou pa konpran byen ki mannyer lalimyer i fonksyonnen me eski sa i vedir ki lalimyer pa egziste? Non! Pareyman, konman bann imen i kapab ki nou pa pou zanmen vreman konpran ki mannyer i posib ki Zeova in toultan egziste e i pou toultan egziste. Me sa pa vedir ki Bondye pa eternel. Laverite konsernan Kreater pa depan lo sa ki nou, nou kapab konpran oubyen sa ki nou pa kapab konpran. (Rom. 11:33-36) Zeova ti egziste avan ki liniver i egziste, sa i enkli soley ek bann zetwal. Zeova i asir nou ki i’n “fer later avek son pwisans.” I ti egziste avan ki i ti “redi lesyel.” (Zer. 51:15; Akt 17:24) Ki en lot rezon akoz nou kapab asire ki i posib pour nou viv pour touzour?

ZEOVA IN KREE NOU POUR VIV POUR TOUZOUR

5. Ki lespwar sa premye koup imen ti annan?

⁵ Zeova ti kree bann keksoz lo later pour viv pour en serten kantite letan. Me sa pa ti enkli bann imen. Dapre plan Bondye, bann imen pa ti pou zanmen mor. Me Zeova ti averti Adan: “Ou pa devret manz fri dan pye konnesans sa ki byen ek sa ki mal, parski zour ki ou manz son fri, sirman ou pou mor.” (Zen. 2:17) Si Adan ek Ev ti’n obei Zeova, zot pa ti pou’n mor. I fer sans pour nou krwar ki avek letan Zeova ti pou les zot manz fri dan “sa pye lavi.” Sa ti pou vedir ki zot ti pou definitivman “viv pour touzour.”b​—Zen. 3:22.

6-7. (a) Kwa ankor ki montre ki i pa ti dan plan Zeova pour bann imen mor? (b) Ki keksoz ki ou ti ava kontan fer? (Vwar portre.)

⁶ I enteresan pour note ki serten syantis in trouv levidans ki montre ki laservel imen i kapab tenir bokou plis lenformasyon ki en dimoun i normalman anmase pandan son lavi. An 2010, en lartik dan zournal Scientific American Mind ti dir ki nou laservel i kapab tenir apepre 2.5 milyon gigabytes lenformasyon. Sa i menm kantite lenformasyon ki trwa milyon erdtan (plis ki 300 an) progranm televizyon ki’n ganny rikorde. Me i kapab ki nou laservel i kapab tenir bokou plis lenformasyon ki sa. Sa i montre ki Zeova ti kree nou laservel pour tenir bokou plis lenformasyon ki nou anmase dan zis 70 oubyen 80 an.​—Ps. 90:10.

⁷ Zeova in osi kree nou avek sa dezir pour kontinyen viv. Labib i dir ki Bondye in “met dezir pour viv pour touzour dan leker bann imen.” (Ekle. 3:11) Sa i en rezon akoz nou konsider lanmor konman en lennmi. (1 Kor. 15:26) Si ou ganny en maladi grav, eski ou pou reste lebra krwaze e esper lanmor? Non! Normalman nou al kot dokter e petet nou pran latizann pour tret sa maladi. Anfet nou fer tou sa ki nou kapab pour nou pa mor. Ler en dimoun ki nou kontan i mor, ki swa sa dimoun i zenn oubyen i aze, nou sagren pour en kantite letan. (Zan 11:32, 33) Nou Kreater pa ti pou’n kree nou avek sa dezir pour viv pour touzour e avek sa kapasite pour kontinyen anmas lenformasyon, si i pa ti dan son plan pour bann imen kontinyen viv. Me i ankor annan plis rezon pour nou krwar ki nou kapab viv pour touzour. Aprezan annou vwar sa ki Zeova in fer dan lepase e ki i pe fer la konmela ki montre ki i pa’n sanz son plan.

PLAN ZEOVA PA’N SANZE

8. Ki Izai 55:11 i asir nou konsernan plan Zeova pour nou?

⁸ Menm si Adan ek Ev ti fer pese e anmenn lanmor lo zot bann zanfan, Zeova pa ti sanz son nide konsernan son plan. (Lir Izai 55:11.) I ankor anvi ki bann dimoun fidel i viv pour touzour. Nou konn sa akoz bann keksoz ki Zeova in dir e fer pour akonplir son plan.

9. Ki Bondye in promet? (Danyel 12:2, 13)

⁹ Zeova in promet ki i pou resisit bann dimoun ki’n mor e i pou donn zot sa loportinite pour viv pour touzour. (Akt 24:15; Tit 1:1, 2) Zob ki ti en serviter fidel Zeova, ti asire ki Zeova i vreman anvi resisit bann dimoun ki’n mor. (Zob 14:14, 15) Profet Danyel ti konnen ki imen ti pou resisite e annan sa loportinite pour viv pour touzour. (Ps. 37:29; lir Danyel 12:2, 13.) Bann Zwif dan letan Zezi osi ti konnen ki Zeova ti pou donn son bann serviter fidel “lavi eternel.” (Lik 10:25; 18:18) Zezi ti koz lo sa promes plizyer fwa e li osi son Papa ti resisit li.​—Mat. 19:29; 22:31, 32; Lik 18:30; Zan 11:25.

10. Ki bann rezireksyon ki’n arive dan lepase i montre? (Vwar portre.)

¹⁰ Zeova i Sours lavi e i annan sa pouvwar pour resisit dimoun. I ti donn Eliya pouvwar pour resisit garson en vev sorti Zarefat. (1 Rwa. 17:21-23) Pli tar, Bondye ti ed profet Elisa pour resisit garson en madanm Sounamit. (2 Rwa. 4:18-20, 34-37) Sa bann rezireksyon ek lezot ankor i montre ki Zeova i annan sa pouvwar pour resisit dimoun. Ler Zezi ti lo later, i ti montre ki son Papa ti’n donn li sa pouvwar pour resisit dimoun. (Zan 11:23-25, 43, 44) Aprezan Zezi i dan lesyel e i’n ganny donnen “tou lotorite dan lesyel e lo later.” Alor, i pou akonpli sa promes ki dir ki “tou bann ki dan latonm” pou ganny resisite e zot pou ganny sa loportinite pour viv pour touzour.​—Mat. 28:18; Zan 5:25-29.

11. Ki mannyer sa ranson i fer li posib pour nou viv pour touzour?

¹¹ Akoz Zeova ti les son Garson ki i kontan mor? Zezi ti donn larepons sa kestyon ler i ti dir: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.” (Zan 3:16) Ler Bondye ti donn son Garson konman en ranson pour kouver nou pese, i ti fer li posib pour nou ganny lavi eternel. (Mat. 20:28) Sa i en parti enportan dan plan Bondye e zapot Pol ti eksplik sa ler i ti dir: “Zis parey lanmor in vin par en sel zonm, rezireksyon osi i vin par en sel zonm. Parski zis parey tou i mor dan Adan, tou pou revin vivan dan Kris.”​—1 Kor. 15:21, 22.

12. Ki mannyer Zeova pou akonpli son plan gras a son Rwayonm?

¹² Zezi ti ansenny son bann disip pour priye ki Rwayonm Bondye i vini e ki lavolonte Bondye i ganny fer lo later. (Mat. 6:9, 10) Enn bann keksoz ki form parti plan Bondye i pour bann imen viv pour touzour lo later. Pour fer sa, Zeova in apwent son Garson konman Lerwa dan son Rwayonm. Antretan, Bondye pe rasanble 144,000 dimoun sorti lo later pour zot travay ansanm avek Zezi pour akonpli Son lavolonte.​—Rev. 5:9, 10.

13. Ki Zeova pe fer e ki nou, nou bezwen fer?

¹³ Zeova pe rasanble “en gran lafoul” dimoun e i pe form zot pour viv anba dominasyon son Rwayonm. (Rev. 7:9, 10; Zak 2:8) Menm si i annan bokou divizyon dan lemonn akoz laenn ek lager, bann dimoun ki form parti “sa gran lafoul” i fer bokou zefor pour retir okenn laenn ki i kapab annan dan zot leker. Zot pe montre par zot aksyon ki zot pe fer zot lepe vin bann pyos. (Mik. 4:3) Olye partisip dan bann lager kot en kantite dimoun i ganny touye, zot pe ed dimoun pour trouv “sa vre lavi” par ansenny zot konsernan sa vre Bondye ek son plan. (1 Tim. 6:19) Menm si zot fanmir i opoz zot oubyen i kapab ki zot perdi larzan parski zot pe siport Rwayonm Bondye, Zeova i fer sir ki zot annan sa ki zot bezwen pour viv. (Mat. 6:25, 30-33; Lik 18:29, 30) Sa bann levidans i asir nou ki Rwayonm Bondye i reel e ki i pou kontinyen akonpli plan Zeova.

NOU ANNAN EN ZOLI LAVENIR DEVAN NOU

14-15. Ki mannyer sa promes Zeova pour detri lanmor pour touzour pou ganny akonplir?

¹⁴ Zezi i Lerwa dan Rwayonm Bondye ki dan lesyel e i pou akonpli tou bann promes ki Zeova in fer. (2 Kor. 1:20) Depi 1914, Zezi pe domin lo son bann lennmi. (Ps. 110:1, 2) Byento, Zezi avek bann ki pou dirize ansanm avek li pou fini ranport laviktwar lo son bann lennmi e zot pou detri bann move dimoun.​—Rev. 6:2.

¹⁵ Pandan Renny Mil an Kris, Zezi pou resisit bann dimoun ki’n mor e i pou ed tou bann ki obei Zeova pour vin parfe. Apre sa tes final, tou bann ki Zeova i ziz konman bann dimoun drwat “pou ganny donnen later e zot pou viv lo la pour touzour.” (Ps. 37:10, 11, 29) Nou pou kontan parski sa “dernyen lennmi, lanmor, pou ganny detrir.”​—1 Kor. 15:26.

16. Ki sa rezon pli enportan ki nou servi Zeova?

¹⁶ Dan sa lartik, nou’n vwar ki nou lespwar pour viv pour touzour i baze lo Parol Bondye. Sa lespwar i kapab ed nou pour reste fidel avek Zeova pandan sa bann dernyen zour ki vreman difisil. Me menm si nou anvi viv pour touzour, sa pa devret sa rezon pli enportan pour reste fidel. Sa rezon pli enportan ki nou reste fidel avek Zeova ek Zezi i akoz nou kontan zot en kantite. (2 Kor. 5:14, 15) Sa i motiv nou pour swiv zot legzanp e pour koz avek lezot lo nou lespwar. (Rom. 10:13-15) Ler nou aprann pour pa egois e pour zenere, nou vin sa kalite dimoun ki Zeova i anvi konman son zanmi pour touzour.​—Ebr. 13:16.

17. Ki sakenn parmi nou i devret fer? (Matye 7:13, 14)

¹⁷ Eski nou pou parmi sa bann ki pou viv pour touzour? Zeova in donn nou sa loportinite me i depan lo nou pour reste lo sa semen ki anmenn ver lavi. (Lir Matye 7:13, 14.) Ki mannyer lavi pou ete ler nou pou viv pour touzour? Dan sa lartik ki swiv, nou pou vwar larepons sa kestyon.