Mon’n vwar ki bann frer ek ser ki fidel i prospere

Mon ti riye parski mon zanmi pa ti paret en dimoun relizye. Mon ti demann li: “Ki ou konnen lo Labib ou?” I pa ti reponn mwan deswit. Finalman, i ti dir mwan ki son manman ti en Temwen Zeova e ki i ti’n aprann serten keksoz avek son manman. Mon ti anvi konn plis alor mon ti demann li plis lenformasyon.

Nou ti koz lo Labib ziska tar dan lannwit. Mon zanmi ti dir mwan ki Labib i dir ki Satan ki sef sa lemonn. (Zan 14:30) Petet ou’n konn sa lenformasyon tou ou lavi me pour mwan, sa ti en nouvo keksoz e i ti vreman enteresan. Mon ti’n toultan tande ki en Bondye ki bon e zis ki pe kontrol lemonn. Me sa pa ti annakor avek bann move keksoz ki mon ti’n vwar dan mon lavi. Menm si mon ti annan zis 26 an, mon ti’n vwar en kantite keksoz ki ti’n fatig mwan.

Mon papa ti en pilot dan United States Air Force. Alor depi ki mon ti ankor zanfan, mon ti konnen ki larme ti’n pare pour fer en latak nikleer nenport ler. Lager Vietnam ti arive pandan bann lannen ki mon ti liniversite Kaliforni. Mon ti zwenn bann protestasyon ki bann etidyan ti fer. Bann gard ti tay avek nou avek baton. Zot ti tir gaz fer plere, me nou ti taye menm si nou ti pe toufe e nou pa ti vwar byen kler. Sa letan i ti annan en kantite problenm e dimoun ti pe rebele. Bann sef politik ti ganny touye e bann dimoun ti fer bann protestasyon e fer dezord. Bann dimoun ti annan diferan lopinyon lo kwa ki devret ganny fer. Tousala ti konfizan.

An 1970, mon ti konmans travay dan en landrwa ki lo lakot nor Alaska e mon ti fer en kantite larzan. Pli tar, mon ti pran en avyon e al Lonn. Laba, mon ti aste en moter e mon ti konmans vwayaze menm si mon ti napa en destinasyon antet. Detrwa mwan pli tar, mon ti ariv Lafrik. Pandan mon vwayaz, mon ti zwenn plizyer dimoun ki ti anvi sove zot osi e kit tou zot bann problenm.

Mon ti’n vwar e tann en kantite move keksoz dan mon lavi e sa ti fer ki sa ki Labib ti dir konsernan en move personnaz ki pe kontrol lemonn ti fer sans pour mwan. Me si Bondye pa ti pe kontrol lemonn, ki i ti pe fer? Mon ti anvi konn larepons sa kestyon.

Dan bann mwan ki ti swiv, mon ti ganny larepons pour sa kestyon. Avek letan, mon ti aprann konn e kontan plizyer dimoun ki ti reste fidel avek Bondye dan tou sirkonstans.

MON TI AL NOR IRLANN, EN LANDRWA KOT I TI ANNAN VYOLANS

Ler mon ti retourn Lonn, mon ti pran kontak avek manman mon zanmi e i ti donn mwan en Labib. Pli tar, ler mon ti al Amsterdam, Pei ba, en msye Temwen Zeova ti vwar mwan pe lir mon Labib anba lalimyer dan semen e i ti ed mwan pour konn plis. Apre sa, mon ti al Dublin, Irlann e laba mon ti al rod biro brans Temwen Zeova dan sa pei. Mon ti tap lo zot laport e lanmenm laba ki mon ti rankontre Arthur Matthews, en frer ki saz e annan bokou leksperyans. Mon ti demann en letid Labib e i ti dakor pour fer letid Labib avek mwan.

Mon ti eksite pour konmans etidye Labib e mon ti kontan pour lir bann liv ek magazin ki Temwen Zeova ti pibliye. Byensir, mon ti osi kontan pour etidye Labib. I ti vreman eksitan! Ler mon ti al renyon, mon ti vwar ki menm bann zanfan ti konn larepons pour bann kestyon ki bann zonm byen edike ti’n demande pour plizyer santenn lannen. Bann kestyon parey: ‘Akoz bann move keksoz i arive? Lekel Bondye? Ki arive ler nou mor?’ Tou mon bann zanmi ti bann Temwen Zeova. I ti fasil pour mwan zanmi avek zot parski mon pa ti konn lezot dimoun dan sa pei. Zot ti ed mwan pour kontan Zeova e pour anvi fer son lavolonte.

An 1972, mon ti batize. Enn an pli tar, mon ti konmans fer pionye ordiner e mon ti al dan en pti kongregasyon Newry, Nor Irlann. Mon ti lwe en pti lakaz dan montanny. I ti annan bef pa tro lwen lo en laferm e mon ti practice devan zot. I ti konmsi zot ti pe ekout mwan atantivman anmezir zot pe moule. Zot pa ti kapab donn mwan okenn konsey me zot ti ed mwan pour aprann pour get lodyans ler mon pe fer diskour. An 1974, mon ti vin en pionye spesyal e mon ti travay ansanm avek Nigel Pitt ki ti vin mon bon zanmi.

Sa letan i ti annan en kantite vyolans Nor Irlann. Alor, serten dimoun ti apel Nor Irlann “the land of the bomb and the bullet” (landrwa bonm ek boulet). Dan sa landrwa, i ti toultan annan lager, dimoun ti pe ganny fiziye e bann transpor ti pe eksploze. Problenm ti souvan akoz politik oubyen larelizyon. Me bann Katolik ek Protestan ti rekonnet ki bann Temwen Zeova pa ti pran kote dan bann zafer politik, alor nou ti lib pour fer predikasyon an sekirite. Souvan bann met lakour ti konnen kote e kan ki i ti pou annan vyolans e zot ti averti nou pour nou evit bann danze.

Me kantmenm sa, i ti annan bann sityasyon danzere. En zour mwan avek en lot pionye ki ti apel Denis Carrigan, nou ti pe fer predikasyon dan en vilaz ki pa ti tro lwen. Dan sa landrwa, i ti napa Temwen Zeova e nou ti’n al laba zis en fwa oparavan. En madanm ti akiz nou konmkwa nou ti bann solda Angle ki ti’n vin espyonn sa landrwa, petet akoz nou pa ti koz avek en aksan Irlande. Sa ki sa madanm ti dir ti fer nou per. Si ou ti zis byen avek bann solda ou ti kapab ganny fiziye amor oubyen ganny fiziye dan ou zenou. Ler nou ti pe debout deor dan lafreser pe esper bis nou tousel, nou ti vwar en loto arete devan sa kafeterya kot sa madanm ti’n akiz nou. Sa madanm ti vin deor e koz avek sa de zonm ki ti dan sa loto e i ti montre ledwa lo nou. Apre sa, sa bann zonm ti vin kot nou dousman dan zot loto e demann nou detrwa kestyon konsernan progranm bis. Ler bis ti arive, zot ti koz avek drayver. Nou pa ti tann sa ki zot ti pe dir. I ti napa lezot pasaze dan bis, alor nou ti konvenki ki zot ti pe fer plan pour fer nou ditor an deor lavil. Me sa pa ti arive. Ler mon ti pe debarke dan bis, mon ti demann avek drayver: “Sa bann zonm ki ti pe koz avek ou, eski zot ti pe koz lo nou?” I ti reponn: “Mon konnen ki zot ete e mon’n dir zot. Pa bezwen per. Zot an sekirite.”

An 1976 kot en lasanble distrika ki ti ganny fer Dublin, mon ti zwenn Pauline Lomax ki ti en pionye spesyal sorti Langleter. I ti en ser fidel, i ti annan limilite e i ti en bon ser. Li avek son frer Ray zot in grandi dan laverite. Enn an pli tar nou de Pauline nou ti marye e nou ti kontinyen fer pionye spesyal Ballymena, Nor Irlann.

Mon ti servi ansanm avek mon madanm konman sirveyan rezyonal pour en pe letan. Nou ti travay avek nou bann frer ek ser Belfast, Londonderry e dan lezot landrwa danzere. Nou ti ganny ankouraze avek lafwa nou bann frer ek ser ki ti’n abandonn bann krwayans relizye, prezidis ek laenn, pour zot kapab servi Zeova. Sirman Zeova ti beni e protez zot!

Mon ti reste Irlann pour di-z-an. Apre sa an 1981 nou ti ganny envite pour asiste 72zyenm laklas Lekol Gilead. Apre ki nou ti’n ganny nou diplonm, nou ti ganny anvoye Sierra Leone, was Lafrik.

BANN FRER EK SER SIERRA LEONE TI FIDEL MALGRE ZOT TI POV

Nou ti reste dan en lakaz misyonner avek 11 lezot dimoun. Dan sa lakaz, i ti annan en lakwizin, trwa kabinen, de lasanmben, en telefonn, en masin lave ek en masin ki fer lenz sek. Tanzantan kouran ti koupe san ekspekte. I ti annan en kantite lera dan plafon e dan soubasman, i ti annan kobra.

Menm si nou landrwa reste pa ti dan sa pli bon kondisyon, nou ti pas bann bon moman dan predikasyon. Dimoun ti annan respe pour Labib e zot ti ekout nou byen. En kantite dimoun ti etidye Labib e zot ti vin Temwen Zeova. Dimoun dan sa landrwa ti apel mwan “Msye Robert” e zot ti apel Pauline “Madanm Robert.” Avek letan, mon ti konmans pas plis letan kot Betel e mwens letan dan predikasyon e sa ti fer ki dimoun ti konmans apel Pauline “Madanm Pauline” e zot ti apel mwan “Msye Pauline.” Pauline ti kontan sa.

Bokou sa bann frer ek ser ti pov me Zeova ti pran swen avek zot, parfwa dan bann fason remarkab. (Mat. 6:33) Mon rapel en ser ki ti annan larzan zis pour aste manze pour li ek son zanfan pour en zour. Me i ti donn en frer ki ti malad tou sa larzan pour li aste latizann malarya. Pli tar sa menm zour, en madanm ti vin kot sa ser san ekspekte e i ti pey sa ser pour penny li. I ti annan bokou sityasyon koumsa.

NOU TI APRANN EN NOUVO KILTIR LER NOU TI NIZERYA

Nou ti reste Sierra Leone pour ne-v-an. Apre nou ti ganny anvoye dan Betel Nizerya. Safwasi nou ti pe servi dan en gran biro brans. Mon ti fer menm travay ki mon ti fer Sierra Leone me pour Pauline keksoz ti sanze. Sa sanzman ti difisil pour li. Oparavan, i ti pe pas 130 erdtan tou le mwan dan predikasyon e pe fer bann letid Labib ki ti pe progrese. Aprezan, i ti pe servi konman en koudriyez dan Betel pour li koud bann lenz ki’n andomaze. I ti pran letan pour li adapte me apre i ti realize ki lezot ti vreman apresye sa travay ki i ti pe fer e i ti konsantre lo fer son mye pour ankouraz lezot Betelit.

Kiltir Nizerya ti diferan e i ti annan en kantite pour nou aprann. En zour en frer ti vin kot mon lofis e i ti entrodwir mwan avek en ser ki ti’n fek vin dan Betel. Ler mon ti pe donn li ponnyendmen, i ti salye mwan. Mon ti sirprann. Deswit de verse ti vin dan mon lespri, sa ti Akt 10:25, 26 ek Revelasyon 19:10. Mon ti mazinen, ‘Eski mon devret dir li pa fer sa?’An menm tan, mon ti realize ki i ti’n ganny aksepte dan Betel savedir i ti konnen ki Labib i dir.

Mon ti santi mwan anbarase pandan ki nou ti pe koze. Apre, mon ti fer resers e mon ti aprann ki sa ser ti pe swiv en koutim ki sa letan ti ankor pe ganny fer dan serten parti sa pei. Bann zonm osi ti fer parey. I ti en fason pour demontre respe. I pa ti en form ladorasyon e dan Labib, i ti annan bann legzanp parey. (1 Sam. 24:8) Mon ti kontan ki mon pa ti’n dir nanryen ki ti’n kapab anbaras mon ser.

Nou ti zwenn en kantite frer ek ser Nizeryen ki ti’n reste fidel pandan plizyer lannen. Par egzanp frer Isaiah Adagbona.b I ti aprann laverite ler i ti ankor zenn me apre i ti ganny lalep. I ti ganny anvoye dan en landrwa kot bann dimoun ki annan lalep ti reste e laba, i ti sa sel Temwen Zeova. Menm si i ti fer fas avek lopozisyon, i ti ed plis ki 30 dimoun dan sa landrwa pour aksepte laverite e i ti form en kongregasyon dan sa kominote.

BANN FRER EK SER KENYA TI ANNAN PASYANS AVEK MWAN

An 1996, nou ti ganny anvoye dan biro brans Kenya. I ti sa premye fwa ki mon ti’n retourn dan sa pei depi sa vizit ki mon ti koz lo la o konmansman. Nou ti reste dan Betel. I ti annan en kantite zako (vervet monkeys) lo sa propriyete. Zot ti vol fri ki bann ser ti anmennen. En fwa, en ser kot Betel ti’n kit son lafnet lasanm ouver. Ler i ti retournen, i ti vwar en group zako pe manz manze ki i ti’n kit dan son lasanm. I ti kriye e kit son lasanm. Sa bann zako ti kriye zot osi e zot ti sot par lafnet.

Nou de Pauline, nou ti dan en kongregasyon ki koz Swayli. Pa bokou letan apre ki nou ti’n vin dan sa kongregasyon, mon ti ganny demande pour kondwir Letid Liv Kongregasyon (ki konmela i apel Letid Labib kongregasyon). Me mon pa ti kapab koz sa langaz byen. Mon ti prepare davans pour mwan kapab lir bann kestyon. Me si i ti annan menm en pti diferans ant larepons ki lodyans ti donnen avek larepons ki ti dan liv, mon pa ti konpran. Sa ti anbarasan! Mon ti sagren pour bann frer ek ser. Me zot ti annan limilite e zot ti annan pasyans avek mwan e zot ti les mwan kondwir letid liv. Sa ti enpresyonn mwan.

BANN FRER EK SER LETA-Z-INI TI FIDEL MENM SI ZOT TI DAN EN PEI KI RIS

Nou ti Kenya pour mwens ki enn an e an 1997, nou ti ganny envite dan Betel, Brooklyn, New York. Aprezan, nou ti dan en pei kot dimoun ti annan en kantite keksoz materyel e sa ti kapab vin en problenm. (Prov. 30:8, 9) Me kantmenm sa, bann frer ek ser pe kontinyen reste fidel. Zot pe servi zot letan ek keksoz materyel pour siport bann travay ki lorganizasyon Zeova pe fer e non pa pour zot vin ris.

Pandan bann lannen, nou’n vwar ki mannyer bann frer ek ser in demontre zot lafwa dan diferan sirkonstans. Ler nou ti Irlann, nou ti vwar nou bann frer ek ser pe demontre zot lafwa menm si i ti annan vyolans. Ler nou ti Lafrik, bann frer ek ser ti demontre lafwa malgre zot ti pov e ganny mete an izolasyon. Ler nou ti Leta-z-ini, bann frer ek ser ti demontre lafwa menm si zot ti dan en pei ki ris. Zeova i vreman kontan ler i get lo later e i vwar bann dimoun ki montre ki zot kontan li menm si zot pas dan tou sort sityasyon.

Bann lannen in pas vit, “pli vit ki zegwir sa enn ki fer latwal.” (Zob 7:6) Konmela, nou travay avek bann frer ek ser kot Biro prensipal Temwen Zeova ki Warwick, New York. Nou kontan parski nou pe kontinyen servi Zeova avek bann dimoun ki vreman kontan kanmarad. Nou kontan pour fer sa ki nou kapab pour siport nou Lerwa, Zezi Kri, ki byento pou rekonpans bann ki’n fidel avek li.​—Mat. 25:34.