Nou’n aprann bann leson e ganny bann sirpriz dan nou servis

Pandan Dezyenm Lager Mondyal, mon paran ti kit Lestoni e zot ti al reste Lalmanny, sa landrwa kot mon ti ne. Apre ki mon ti ne, zot ti konmans fer preparasyon pour nou al reste Kanada. Nou ti al reste Ottawa, Kanada dan en kazo poul. Nou ti vreman pov me kantmenm sa nou ti kapab manz dizef dan bomaten.

En zour, Temwen Zeova ti lir Revelasyon 21:3, 4 avek mon manman. Sa ki mon manman ti aprann ti fer li telman kontan ki i ti konmans plere. Mon manman ek mon papa ti kontinyen etidye Labib e pa bokou letan apre, zot ti batize.

Menm si mon paran pa ti tro konpran Angle, zot ti determinen pour servi Zeova. Preski tou le Sanmdi mon papa ti anmenn mwan ek mon pti ser Sylvia predikasyon. Mon papa ti fer sa, menm apre ki i ti’n travay tou lannwit dan en lizin kot i fer fonn nickel ki ti trouve Sudbury, Ontario. Tou le semenn nou ti etidye Latour Veyer konman en fanmir. Mon manman ek mon papa in fer mwan devlop en lanmour pour Bondye. Alor an 1956 ler mon ti annan di-z-an, mon ti deside pour dedye mon lavi avek Zeova. Sak fwa mon mazin lo ki kantite zot ti kontan Zeova, sa i ankouraz mwan pour kontinyen servi Zeova.

Ler mon ti fini lekol, mon ti ganny distrer. Mon ti mazinen ki si mon vin en pionye mon pa ti pou ganny ase larzan pour realiz mon rev pour fer voyaz partou dan lemonn par avyon. Mon ti ganny travay kot en stasyon radyo konman en Dj e mon ti kontan sa travay. Vi ki mon ti travay aswar, souvandfwa mon ti mank renyon e mon ti pas letan avek bann dimoun ki pa ti kontan Bondye. Finalman, mon konsyans ki ti’n ganny gide par Labib ti motiv mwan pour fer bann sanzman.

Mon ti al reste Oshawa, Ontario. Laba mon ti zwenn Ray Norman, son ser Lesli e lezot pionye. Zot tou zot ti akey mwan byen. Ler mon ti vwar sa lazwa ki zot ti annan, sa ti ed mwan pour reflesir lo sa ki mon ti anvi fer avek mon lavi. Zot ti ankouraz mwan pour konmans fer pionye e an Septanm 1966, mon ti konmans fer pionye. Mon ti ere e mon ti pe pas bann bon moman. Me mon lavi ti pe al sanze san ekspekte.

LER ZEOVA I ENVIT OU POUR FER EN KEKSOZ, ESEY FER LI

Ler mon ti ankor pe lekol, mon ti fer laplikasyon pour al Betel Toronto, Kanada. Pli tar ler mon ti pe fer pionye, mon ti ganny envite pour servi dan Betel pour kat-r-an. Vi ki mon ti kontan Lesli, mon ti per ki si mon ti aksepte sa lenvitasyon, mon pa ti pou vwar li ankor. Mon ti devid mon leker avek Zeova dan lapriyer. Apre sa, mon ti aksepte pour al Betel menm si mon leker ti fermal ler mon ti dir Lesli orevwar.

Mon ti travay dan laundry dan Betel e pli tar konman en sekreter. Sa letan, Lesli ti’n vin en pionye spesyal an Gatineau, Quebec. Souvan mon ti demann mon lekor ki i pe fer e si mon ti’n fer sa bon desizyon. En zour, mon ti ganny enn bann pli gro sirpriz dan mon lavi. Ray, frer Lesli ti ganny envite Betel. I ti’n ganny mete dan menm lasanm avek mwan. Sa ti fer ki mon ti reganny kontak avek Lesli. Nou ti marye le 27 Fevriye 1971, ki ti mon dernyen zour apre sa kat-r-an ki mon ti’n servi dan Betel.

Nou de Lesli, nou ti ganny envite pour servi Quebec dan en kongregasyon ki koz Franse. Apre detrwa lannen, mon ti sirprann ler mon ti ganny demande pour servi konman sirveyan rezyonal a laz 28 an. Mon ti santi ki mon ti ankor tro zenn e napa ase leksperyans pour vin en sirveyan rezyonal me sa parol dan Zeremi 1:7, 8 ti ankouraz mwan. Me vi ki Lesli ti’n pas dan enn de aksidan loto, i pa ti kapab dormi byen. Alor, nou ti mazinen ki i ti pou difisil pour nou konman sirveyan rezyonal. Kantmenm sa, Lesli ti dir: “Si Zeova i envit nou pour fer en keksoz, nou devret esey fer li.” Nou ti aksepte sa responsabilite e nou ti fer sa travay pour 17 an.

Mon ti vreman bizi ler mon ti en sirveyan rezyonal e mon ti napa ase letan pour pase avek Lesli. Mon ti bezwen aprann en lot leson. En Lendi bomaten, nou ti tann doorbell sonnen. I ti napa personn devan laport, i ti annan zis en pannyen e ladan i ti annan en tapi latab, fri, fromaz, dipen, en boutey diven, bann ver e en let ki lo la ti ekri: “Anmenn ou madanm piknik.” I ti en zoli zour byen ansoleye. Me mon ti eksplik Lesli ki mon ti annan bann diskour pour prepare e nou pa ti pou kapab ale. I ti konpran mwan me i ti en pe sagren. Me apre ki mon ti’n konmans prepar mon diskour, mon konsyans ti konmans fatig mwan. Mon ti mazin Efezyen 5:25, 28. Mon ti mazinen ki sa verse ti en fason ki Zeova ti pe fer mwan rapel pour pran an kont santiman mon madanm. Apre ki mon ti’n priy Zeova, mon ti dir avek Lesli, “Annou al nou piknik” e sa ti fer li vreman kontan. Nou ti al dan en zoli landrwa o bor larivyer, nou ti tal en tapi e pas enn bann pli bon moman ansanm. Pli tar, mon ti annan letan pour prepar mon diskour.

Ler mon ti sirveyan rezyonal, nou ti pas en kantite bon moman. Nou ti servi depi British Columbia ziska Newfoundland. Mon ti pe voyaz plis ki mon ti’n mazinen. Mon ti’n mazin pour fer laplikasyon pour al Lekol Gilead me mon pa ti anvi al dan en lot pei. Mon ti mazinen ki mon pa ti alaoter pour vin en misyonner. An plis ki sa mon ti per ki nou ti kapab ganny anvoye dan en pei Lafrik kot i annan maladi ek lager. Mon ti kontan kot mon ti ete Kanada.

NOU GANNY ENVITE POUR AL LESTONI E DAN BANN PEI BALTICS

An 1992, Temwen Zeova ti kapab fer predikasyon an piblik dan serten pei ki oparavan ti form parti Linyon Sovyetik. Alor nou ti ganny demande si nou ti pou pare pour al servi Lestoni konman bann misyonner. Nou ti sirprann me nou ti priy Zeova lo la. Ankor enn fwa, nou ti mazinen ki si Zeova i envit nou pour fer en keksoz, nou devret eseye. Nou ti aksepte e mon ti kontan ki nou pa ti pe al Lafrik.

Deswit nou ti konmans aprann langaz Lestoni. Apre detrwa mwan dan sa pei, mon ti ganny demande pour vin sirveyan rezyonal. Nou ti pou vizit apepre 46 kongregasyon ek group dan trwa pei Baltic e osi an Kaliningrad, Larisi. Sa ti vedir ki nou ti pou bezwen esey aprann langaz Latvian, Lithuanian ek Russian. I ti difisil. Me kantmenm sa, bann frer ek ser ti kontan ki nou ti pe esey aprann zot langaz e zot ti ed nou. An 1999, en biro brans Temwen Zeova ti ganny etablir Lestoni e mon ti ganny envite pour servi lo komite ansanm avek Toomas Edur, Lembit Reile ek Tommi Kauko.

Nou ti zwenn en kantite frer ek ser ki ti pe reste Siberi akoz zot ti’n ganny deporte Siberi. Menm si zot pa ti ganny trete byen dan prizon e zot ti’n ganny separe avek zot fanmir, zot pa ti ankoler oubyen gard rankin. Zot ti kontinyen gard zot lazwa ek reste devoue dan sa travay predikasyon. Zot legzanp ti montre nou ki nou kapab andire e reste zwaye menm dan bann sirkonstans difisil.

Nou’n travay dir pour plizyer lannen e nou pa ti pran ase letan pour repoze. Sa ti fer ki Lesli ti konmans santi li vreman fatige. Nou pa ti realiz deswit ki sa ti akoz i ti annan en maladi ki apel fibromyalgia, ki ti fer li fatige. Sa ti fer nou mazin pour retourn Kanada. Ler nou ti ganny envite lekol kot biro brans Patterson, New York, U.S.A, mon pa ti krwar ki nou ti pou kapab asiste. Me apre ki nou ti’n koz avek Zeova dan lapriyer, nou ti aksepte. Zeova ti beni sa desizyon. Ler nou ti dan sa lekol, Lesli ti kapab ganny swen medikal ki i ti bezwen. Alor nou ti kapab repran nou bann aktivite.

NOU TI GANNY EN LOT SIRPRIZ, SAFWASI POUR AL LO EN LOT KONTINAN

En zour swar an 2008, ler nou ti Lestoni, biro brans prensipal Temwen Zeova ti telefonn mwan e demann nou si nou ti pou dakor pour al Kongo. Mon ti sirprann, sirtou parski mon ti pou bezwen donn zot en larepons son lannmen. Mon pa ti dir Lesli nanryen deswit, parski mon ti konnen ki i pa ti pou dormi sa zour swar. Me mwan ki pa ti dormi sa zour swar. Parski mon ti pe priy Zeova konsernan sa ki ti pe fer mwan enkyet konsernan al Lafrik.

Son lannmen ler mon ti donn Lesli sa nouvel, nou ti dir: “Zeova ki pe envit nou pour al Lafrik. Si nou pa eseye, ki mannyer nou pou konnen ki nou pa kapab fer li e ki nou pa pou kontan laba?” Alor, apre 16 an ki nou ti’n pase Lestoni, nou ti fer sa vwayaz pour al Kinshasa, Kongo. Biro brans laba ti annan en zoli zarden e i ti vreman trankil. Enn bann premye keksoz ki Lesli ti mete dan nou lasanm, ti en kart ki i ti’n vin avek sorti Kanada. Lo sa kart ti annan sa parol: “Fleri kot ou’n ganny plante.” Apre ki nou ti’n zwenn bann frer ek ser, kondwir bann letid Labib e eksperyans lazwa ki nou servis konman misyonner i anmennen, nou ti ganny plis lazwa dan nou servis pour Zeova. Avek letan, nou ti ganny sa privilez pour vizit lezot biro brans dan apepre 13 pei Lafrik. Sa ti permet nou pour aprann konn en kantite diferan dimoun. Mon ti nepli enkyet pour reste Lafrik e nou remersye Zeova pour anvoy nou pour servi Lafrik.

Ler nou ti Kongo, nou ti ganny donnen diferan kalite keksoz pour manze enkli zensek e mon ti krwar mon pa ti pou kapab manze. Me ler nou ti vwar nou bann frer ek ser pe manze, nou ti esey manze nou osi e nou ti kontan.

Nou ti al dan les sa pei pour ankouraz nou bann frer ek ser e anmenn bann keksoz ki zot ti bezwen. Dan sa bann landrwa, i ti annan bann group guerrilla ki ti pe atak bann vilaz e pe fer ditor bann madanm ek zanfan. Laplipar frer ek ser ti napa bokou keksoz materyel. Kantmenm sa, zot lespwar dan rezireksyon, zot lanmour pour Zeova e zot fidelite anver son lorganizasyon ti ankouraz nou en kantite. Zot legzanp ti fer nou mazin rezon ki nou servi Zeova e ranforsi nou lafwa dan li. Serten frer ek ser ti’n perdi zot lakour ek plantasyon. Sa ti fer mwan rapel ki nou kapab perdi nou bann keksoz materyel en sel kou e ki nou lanmitye avek Zeova i sa ki pli enportan. Kantmenm bann frer ek ser ti pe pas dan tou sa bann difikilte, i rar ki zot ti konplent. Zot latitid ti ankouraz nou pour fer fas avek nou bann problenm ek problenm lasante avek kouraz.

EN NOUVO RESPONSABILITE LAZI

Nou ti ganny en lot sirpriz. Nou ti ganny demande pour al servi dan biro brans Hong Kong. Nou pa’n zanmen mazin pour al reste Lazi. Me apre ki nou ti’n vwar lanmen Zeova dan tou nou bann responsabilite, nou ti aksepte sa lenvitasyon. An 2013 avek larm dan nou lizye, nou ti kit Lafrik e osi nou bann bon zanmi, san konnen ki nou pou ekspekte kot nou pe ale.

I ti vreman en gran sanzman pour nou al reste Hong Kong parski i ti en lavil kot i ti annan en kantite dimoun ki sorti partou dan lemonn. Langaz Sinwan ti vreman difisil pour aprann. Me bann frer ti akey nou byen e nou ti vreman kontan zot manze. I ti annan bokou plis travay ki ti pe ganny fer kot biro brans. Me i ti pou kout ser pour aste bann propriyete. Alor Konsey Direkter ti pran en desizyon saz pour vann laplipar propriyete biro brans. Pa lontan apre, an 2015, nou ti ganny anvoye Sid Kore kot nou ti kontinyen nou servis. Laba nou ti bezwen aprann en lot langaz difisil. Me menm si nou pa ankor konn koz byen sa langaz, bann frer ek ser i ankouraz nou par dir nou ki nou pe amelyore.

BANN LESON KI NOU’N APRANN DAN SERVIS ZEOVA

I pa toultan fasil pour fer bann nouvo zanmi me nou ti vwar ki ler nou pran linisyativ pour envit lezot kot nou, nou kapab aprann konn zot pli vitman. Nou’n vwar ki nou bann frer ek ser i pli parey kanmarad ki zot diferan e ki Zeova in kree nou dan en fason ki nou kapab eksprim nou santiman e demontre lafeksyon anver kanmarad.​—2 Kor. 6:11.

Nou’n vwar li neseser pour aksepte dimoun parey Zeova i fer e pour vwar bann levidans ki Zeova i kontan nou e i pe gid nou. Ler nou santi nou dekouraze oubyen nou pe mazinen si bann frer ek ser i vreman kontan nou, nou relir bann kart ek let lankourazman ki sorti kot nou bann zanmi. Nou’n eksperyans lafason ki Zeova in reponn nou lapriyer, lafason ki i’n reasir nou ki i kontan nou e lafason ki i’n donn nou lafors pour kontinyen.

Pandan bann lannen ki’n pase, nou de Lesli nou’n aprann akoz i enportan pour fer letan pour kanmarad menm si nou bizi. Nou’n osi konpran akoz i enportan pour nou riy nou prop lekor ler nou fer fot, sirtou ler nou pe esey aprann en nouvo langaz. Osi, tou le swar nou esey mazin lo en keksoz ki nou’n kontan dan lazournen pour nou kapab remersye Zeova.

Fransman, mon pa ti krwar ki mon ti pou kapab vin en misyonner oubyen reste dan en lot pei. Me mon’n kontan pour aprann ki mannyer tou keksoz i posib avek led Zeova. Mon rapel sa ki Profet Zeremi ti dir: “O Zeova, ou’n anbet mwan.” (Zer. 20:7) Zeova in donn nou en kantite zoli sirpriz e in beni nou dan bann fason ki nou pa ti pe ekspekte. I’n menm donn mwan sa ki mon ti toultan anvi e sa i pour vwayaz par avyon. Nou’n vwayaz dan bokou plis pei ki mon ti pou’n kapab imazinen ler mon ti ankor en pti garson e vizit bann biro brans lo senk kontinan. Mon osi vreman rekonesan ki Lesli ti pare pour siport mwan dan tou sa bann diferan responsabilite.

Nou toultan esey rapel ki tou sa ki nou fer, nou fer li akoz nou kontan Zeova. Bann bon keksoz ki nou gannyen ozordi i montre nou ki mannyer lavi pou vreman merveye dan lavenir ler Zeova pou “ouver [son] lanmen e satisfer dezir tou sa ki vivan.”​—Ps. 145:16.