Eski ou annan lafwa?

Pour nou kapab fer Bondye plezir, nou bezwen annan lafwa. Me kantmenm sa, Labib i dir ki “pa tou dimoun ki annan lafwa.” (2 Tesa. 3:2) Ler zapot Pol ti dir sa bann parol, i ti pe koz lo “bann dimoun ki move e mesan” ki ti pe persekit li. Me sa ki i ti dir konsernan lafwa i osi aplik pour lezot dimoun. Serten dimoun pa aksepte ki i annan en Bondye ki’n kree tou keksoz. (Rom. 1:20) I annan lezot dimoun ki dir ki zot krwar ki i annan en keksoz oubyen en personnaz ki pli pwisan ki egziste. Me sa pa vre lafwa.

Nou bezwen konvenki ki Zeova i egziste e ki i “sa enn ki rekonpans” bann ki annan en lafwa for. (Ebr. 11:6) Lafwa i en kalite ki lespri sen Bondye i kapab ed nou devlope. Pour nou kapab ganny lespri sen, nou bezwen demann Zeova dan lapriyer. (Lik 11:9, 10, 13) En fason enportan ki nou kapab ganny lespri sen Bondye i par lir Parol enspire Bondye, setadir Labib. Apre nou kapab medit lo sa ki nou lir dan Labib e fer zefor pour aplik sa ki nou aprann. Ler nou fer sa, nou pe les lespri sen Bondye ed nou pour viv nou lavi dan en fason ki montre ki nou annan sa kalite lafwa ki fer Zeova plezir.