Kestyon lekter
Lekel sa “bann lanz ki Bondye in swazir” ki 1 Timote 5:21 i koz lo la?
Zapot Pol ti ekri Timote, ki ti en ansyen li osi e dir: “Mon donn ou lord devan Bondye ek Kris Zezi ek bann lanz ki Bondye in swazir, pour obei sa bann lenstriksyon san prezize oubyen fer lapreferans.”—1 Tim. 5:21.
Pour ed nou konnen lekel sa bann lanz, premyerman nou pou vwar ki bann lanz ki pa kapab form parti sa group ki’n ganny mansyonnen. I kler ki i pa sa 144,000 Kretyen swazir. Ler Pol ti ekri Timote, i ti napa okenn Kretyen swazir dan lesyel. Bann zapot ek lezot Kretyen swazir pa ti ankor vin bann lanz, alor i pa kapab ki sa verse ti pe refer avek zot.—1 Kor. 15:50-54; 1 Tesa. 4:13-17; 1 Zan 3:2.
Osi, i pa kapab ki sa verse pe refer avek bann lanz ki ti dezobei Bondye pandan letan Deliz. Sa bann lanz ti swazir pour swiv Satan e zot ti vin bann demon e alor zot ti vin bann lennmi Zezi. (Zen. 6:2; Lik 8:30, 31; 2 Pyer 2:4) Dan lavenir, zot pou ganny mete dan labim pour 1,000 an e apre zot pou ganny detrir ansanm avek Dyab.—Zid 6; Rev. 20:1-3, 10.
Alor, i bezwen ki “bann lanz ki Bondye in swazir” ki Pol ti koz lo la, i bann lanz dan lesyel ki fidel avek “Bondye ek Kris Zezi.”
I annan plizyer milye lanz fidel. (Ebr. 12:22, 23) I paret ki Zeova i donn zot diferan travay pour fer. (Rev. 14:17, 18) Rapel ki en fwa, Zeova ti demann zis en lanz pour touy 185,000 solda Asiriyen. (2 Rwa. 19:35) Me i kapab ki i ti annan plizyer lanz ki ti ganny demande pour “tir dan Rwayonm [Zezi] tou bann keksoz ki fer dimoun tonbe e bann ki fer sa ki mal.” (Mat. 13:39-41) I annan lezot lanz ki kapab ganny demande pour “rasanble sa bann ki’n ganny swazir” pour anmenn zot dan lesyel. (Mat. 24:31) Osi, lezot lanz i kapab ganny demande ‘pour protez nou partou kot nou ale.’—Ps. 91:11; Mat. 18:10; konpar Matye 4:11; Lik 22:43.
I kapab ki sa “bann lanz ki Bondye in swazir” ki 1 Timote 5:21 i koz lo la, i bann lanz ki annan sa responsabilite pour pran swen avek kongregasyon. Konteks sa verse i montre ki Pol ti pe donn bann konsey saz konsernan bann ansyen ki merit respe bann frer ek ser dan kongregasyon. Pol ti dir ki bann ansyen i devret desarz zot responsabilite “san prezize oubyen fer lapreferans” e ki zot pa devret fer en desizyon vitman san reflesir byen avan. En rezon enportan akoz bann ansyen i devret swiv konsey Pol i akoz zot pe desarz zot bann responsabilite “devan Bondye ek Kris Zezi ek bann lanz ki Bondye in swazir.” I kler alor, ki serten lanz in ganny donnen bann responsabilite ki annan pour fer avek kongregasyon. Par egzanp, pour protez bann serviter Bondye, pour ede dan sa travay predikasyon oubyen pour dir Zeova konsernan bann keksoz ki zot vwar.—Mat. 18:10; Rev. 14:6.