Aprann pour mazin parey Zeova ek Zezi

1-2. Ki mannyer nou bezwen kontan Zeova e ki mannyer Zezi ti montre ki i ti kontan Zeova avek tou son lespri?

ZEZI ti eksplike ki sa komannman ki pli enportan. I ti dir: “Ou devret kontan Zeova ou Bondye avek tou ou leker, avek tou ou nanm, avek tou ou lafors e avek tou ou lespri.” (Lik 10:27) Sa verse i montre ki nou kontan Zeova avek tou sa ki nou annan e tou sa ki nou ete. Sa i enkli nou dezir, santiman ek lafors. Nou osi kontan Zeova avek nou lespri. Sa i enkli lafason ki nou vwar keksoz oubyen nou fason panse. Byensir nou pa pou zanmen kapab konpran konpletman fason panse Zeova me nou devret fer zefor pour mazin parey li. Nou kapab pli byen konpran fason panse Bondye par etidye “fason panse Kris” parski Zezi i konn fason panse son Papa e i imit li dan en fason parfe.—1 Kor. 2:16 ek not letid “we do have the mind of Christ.”

² Zezi i kontan Zeova avek tou son lespri. Zezi ti konnen ki Bondye i anvi i fer. I ti determinen pour fer sanmenm menm si i ti pou soufer. Zezi ti konsantre lo fer lavolonte son Papa e i pa ti les nanryen vin pli enportan ki sa.

3. Ki zapot Pyer ti aprann avek Zezi e ki Pyer ti ankouraz bann Kretyen pour fer? (1 Pyer 4:1)

³ Pyer ek lezot zapot ti annan sa privilez pour pas letan avek Zezi e sa ti fer ki zot ti konn son fason panse pour zot menm. Dan sa premye let ki Pyer ti ekri, i ti ankouraz bann Kretyen pour met zot pare pour annan menm fason panse avek Kris. (Lir 1 Pyer 4:1.) Dan langaz orizinal, sa lekspresyon “met zot pare,” i en lekspresyon ki ganny servi dan larme. Sa lekspresyon ki Pyer ti servi i dekri bann solda ki pran zot bann zarm pour met pare pour lager. Alor si bann Kretyen i aprann pour annan menm fason panse avek Kris, zot pou annan en zarm pwisan, setadir zot pou annan sa ki zot bezwen pour lager avek okenn move dezir e avek sa lemonn kontrole par Satan.—2 Kor. 10:3-5; Efe. 6:12.

4. Ki mannyer sa lartik i kapab ed nou pour swiv konsey ki Pyer ti donnen?

⁴ Dan sa lartik, nou pou vwar konsernan fason panse Zezi e ki mannyer nou kapab annan menm fason panse avek li. Atraver legzanp Zezi nou pou vwar ki mannyer nou kapab (1) aprann pour mazin parey Zeova, parski sa pou ed nou tou pour annan menm fason panse, (2) demontre limilite e (3) annan bon zizman par depan lo Zeova dan lapriyer.

APRANN POUR MAZIN PAREY ZEOVA

5. Kan ki Pyer pa ti annan menm pwennvi avek Zeova?

⁵ Annou vwar en moman kot Pyer pa ti pe vwar keksoz parey Zeova. Zezi ti dir son bann zapot ki i ti pou bezwen al Zerizalenm, ganny livre avek bann sef relizye laba, ganny tortire e ganny touye. (Mat. 16:21) Pyer ti konnen ki Zezi ti sa Mesi ki ti’n ganny promet, ki ti pou sov pep Bondye. Alor i kapab ki Pyer ti vwar li difisil ki Zeova ti pou les Zezi ganny touye. (Mat. 16:16) Alor Pyer ti anmenn Zezi akote e i ti dir li: “Pa bezwen dir sa Senyer, sa pa pou zanmen ariv avek ou.” (Mat. 16:22) Vi ki Pyer pa ti pe mazin parey Zeova, i ti napa menm fason panse avek Zezi.

6. Ki mannyer Zezi ti montre ki i ti annan menm fason panse avek Zeova?

⁶ Zezi ti konn fason panse son Papa e i ti imit li dan en fason parfe. Zezi ti dir Pyer: “Pas deryer mwan Satan! Ou parey en ros dan mon semen, parski ou pa mazin parey Bondye, me plito parey en zonm.” (Mat. 16:23) Zezi ti konnen ki pour li fer lavolonte Zeova i ti pou bezwen soufer e mor. Alor Zezi pa ti aksepte konsey Pyer menm si i kapab ki Pyer ti pe esey ed li. Sa zour Pyer ti aprann ki i ti bezwen annan menm fason panse avek Bondye. Sa i en leson enportan ki nou tou nou bezwen aprann.

7. Ki mannyer Pyer ti montre ki i ti anvi annan menm fason panse avek Zeova? (Vwar portre.)

⁷ Pli tar Pyer ti montre ki i ti anvi aprann pour annan menm fason panse avek Zeova. I ti’n ariv sa letan pour bann dimoun lezot nasyon form parti pep Bondye. Pyer ti ganny anvoye pour anons sa bon nouvel avek Korney ki ti en dimoun lezot nasyon. Korney ti parmi bann premye dimoun lezot nasyon ki ti vin Kretyen. Normalman bann Zwif pa ti frekant bann dimoun lezot nasyon. Alor Pyer ti bezwen sanz son fason panse pour li kapab al anons sa bon nouvel avek bann dimoun lezot nasyon. Ler Pyer ti konpran pwennvi Bondye konsernan bann dimoun lezot nasyon, i ti sanz son prop pwennvi. Sa i fer ki ler Korney ti demann li pour vin kot li, i ti ale “san okenn ezitasyon.” (Akt 10:28, 29) I ti anons sa bon nouvel avek Korney ek bann dimoun dan son lakour e zot ti batize.—Akt 10:21-23, 34, 35, 44-48.

8. Ki mannyer nou kapab montre ki nou annan menm fason panse avek Zeova? (1 Pyer 3:8)

⁸ Plizyer lannen pli tar, Pyer ti ankouraz bann Kretyen pour “annan menm fason panse.” (Lir 1 Pyer 3:8.) Pour nou kapab annan menm fason panse avek nou bann frer ek ser, nou bezwen annan menm pwennvi avek Zeova. Nou kapab aprann konsernan pwennvi Zeova dan Labib. Par egzanp, Zezi ti ankouraz son bann disip pour met Rwayonm Bondye premye dan zot lavi. (Mat. 6:33) Alor si en proklanmater dan ou kongregasyon i deside pour fer pionye oubyen pour servi Zeova a plen tan dan en lot fason, olye dir li ki i devret swazir pour annan en lavi pli fasil, nou devret koz an byen konsernan son lobzektif e ofer pour ed li.

DEMONTRE LIMILITE

9-10. Ki mannyer Zezi ti montre ki i ti annan limilite?

⁹ Sa zour swar avan ki Zezi ti ganny touye, i ti ansenny Pyer ek lezot zapot en leson enportan konsernan limilite. Pli boner, Zezi ti’n anvoy Pyer ek Zan pour prepar bann keksoz pour sa dernyen repa ki i ti pou pran avek zot avan i mor. I tre probab ki parmi bann preparasyon ki zot ti bezwen fer, i pour fer sir ki i annan en kivet ek bann servyet pour ki lipye bann envite i kapab ganny lave avan repa. Me lekel ki ti pou demontre limilite e lav lipye lezot?

¹⁰ Zezi ti montre ki i ti annan limilite e san okenn ezitasyon i ti lav lipye son bann zapot. I bezwen ki son bann zapot ti sirprann ler zot ti vwar Zezi fer en keksoz ki normalman en servant ki ti fer. Zezi ti tir son manto, pran en servyet e anmar dan son leren. I ti met delo dan en kivet e i ti konmans lav lipye son bann zapot. (Zan 13:4, 5) I kapab ki i ti pran en pe letan pour li kapab fini lav lipye tou le 12 son bann zapot, enkli lipye Zida, sa zapot ki ti pou trai li. Me Zezi ti demontre limilite e i ti fini lav lipye tou son bann zapot. Apre, Zezi ti dir zot: “Eski zot konpran sa ki mon fek fer? Zot apel mwan ‘Ansenyan’ ek ‘Senyer’ e zot annan rezon parski sanmenm ki mon ete. Alor, si mwan, zot Senyer ek Ansenyan, mon lav zot lipye, zot osi zot devret lav lipye kanmarad.”—Zan 13:12-14.

11. Ki mannyer Pyer ti montre ki i ti’n aprann pour demontre limilite? (1 Pyer 5:5 ek not) (Vwar portre.)

¹¹ Atraver legzanp Zezi, Pyer ti aprann pour demontre limilite. Apre ki Zezi ti’n retourn dan lesyel, Pyer ti fer en mirak e geri en zonm ki ti paralize depi nesans. (Akt 1:8, 9; 3:2, 6-8) En gran lafoul dimoun ti vwar sa mirak e zot ti antour Pyer. (Akt 3:11) Pyer pa ti anvi ki dimoun i donn li latansyon menm si i ti’n grandi dan en kiltir kot dimoun ti krwar ki i enportan pour annan en pozisyon o plase. Pyer ti demontre limilite e i ti donn tou laglwar Zeova ek Zezi. I ti dir: “Atraver non [Zezi] e akoz nou annan lafwa dan son non, sa zonm ki zot konnen ki la, in byen.” (Akt 3:12-16) Pli tar Pyer ti ekri bann Kretyen konsernan sa lenportans pour annan limilite. Sa bann mo ki i ti servi i donn sa nide met limilite lo ou parey en lenz. Sa i fer nou rapel sa zour ler Zezi ti anmar sa servyet dan son leren e lav lipye son bann zapot.—Lir 1 Pyer 5:5 ek not.

12. Ki mannyer nou kapab kontinyen devlop limilite parey Pyer?

¹² Nou kapab swiv legzanp Pyer e kontinyen devlop limilite. Demontre limilite i enplik plis ki sa ki nou dir. Sa lekspresyon ki Pyer ti servi ki’n ganny tradwir “limilite,” i montre ki limilite i enplik lafason ki nou vwar nou lekor e lafason ki nou vwar lezot. Nou fer bann bon keksoz pour lezot parski nou kontan Zeova e nou kontan dimoun, pa akoz nou anvi ki lezot i felisit nou. Nou montre ki nou annan limilite si nou vwar li en plezir pour servi Zeova ek nou bann frer ek ser menm si lezot pa vwar sa ki nou fer.—Mat. 6:1-4.

ANNAN “BON ZIZMAN”

13. Ki i vedir ler en dimoun i annan “bon zizman”?

¹³ Ki i vedir ler en dimoun i annan “bon zizman”? (1 Pyer 4:7) En Kretyen ki annan bon zizman i fer son mye pour fer bann bon desizyon dapre pwennvi Zeova. En Kretyen ki fer sa, i konnen ki i napa nanryen ki pli enportan ki son lanmitye avek Zeova. I annan en bon pwennvi lo son lekor parski i konnen ki i pa konn tou keksoz. I montre ki i depan lo Bondye par koz avek Zeova dan lapriyer souvan.a

14. En fwa, ki mannyer Pyer pa ti depan lo Zeova?

¹⁴ Sa zour swar avan Zezi ti mor, Zezi ti dir son bann disip: “Zot tou zot pou abandonn mwan ozordi swar.” Me Pyer ti krwar ki i ti for e i ti dir: “Kantmenm tou lezot pou abandonn ou, mwan mon pa pou zanmen abandonn ou!” Sa zour swar Zezi ti donn serten disip en konsey. I ti dir: “Kontinyen veye e kontinyen priye.” (Mat. 26:31, 33, 41) Si Pyer ti’n swiv sa konsey, petet pli tar i ti pou’n annan sa kouraz pour dir ki i en disip Zezi. O kontrer, Pyer ti dir ki i pa konn Zezi e apre i ti regrete.—Mat. 26:69-75.

15. Ki mannyer Zezi ti kontinyen montre ki i ti annan bon zizman sa zour swar avan i ti mor?

¹⁵ Zezi ti toultan depan lo Zeova. Menm si Zezi ti parfe, sa zour swar avan i ti mor, i ti fer lapriyer plizyer fwa. Sa ti donn li kouraz pour fer sa ki Zeova ti anvi i fer. (Mat. 26:39, 42, 44; Zan 18:4, 5) I bezwen ki Pyer pa ti zanmen oubliye ki Zezi ti fer lapriyer plizyer fwa.

16. Ki mannyer Pyer ti montre ki i ti’n aprann pour annan bon zizman? (1 Pyer 4:7)

¹⁶ Avek letan, Pyer ti aprann pour depan lo Zeova plis par fer lapriyer plis. Apre ki Zezi ti’n resisite, i ti asir Pyer ek lezot zapot ki zot ti pou ganny lespri sen pour zot kapab anons sa bon nouvel. Me Zezi ti demann zot pour reste Zerizalenm e espere ziska ki zot ganny lespri sen. (Lik 24:49; Akt 1:4, 5) Ki Pyer ti fer pandan ki i ti pe espere? Pyer ek lezot Kretyen ti pe “kontinyen priy en kantite.” (Akt 1:13, 14) Pli tar dan sa premye let ki Pyer ti ekri bann frer ek ser, i ti ankouraz zot pour annan bon zizman e pour depan lo Zeova dan lapriyer. (Lir 1 Pyer 4:7.) Pyer ti aprann pour depan lo Zeova e i ti kapab ed e ankouraz son bann frer ek ser.—Gal. 2:9.

17. Nenport ki abilite ki nou annan, ki nou bezwen kontinyen fer? (Vwar portre.)

¹⁷ Pour nou annan bon zizman, nou bezwen koz avek Zeova dan lapriyer regilyerman. Nenport ki abilite ki nou annan, nou rekonnet ki nou bezwen kontinyen priy Zeova. Alor ler nou annan bann desizyon enportan pour fer, nou priy Zeova e demann li pour gid nou e nou annan konfyans ki i konnen kwa ki pli bon pour nou.

18. Ki mannyer nou kapab kontinyen fer zefor pour mazin parey Zeova?

¹⁸ Nou rekonesan ki Zeova in kree nou avek sa abilite pour demontre bann kalite ki li i annan. (Zen. 1:26) Byensir nou pa kapab swiv legzanp Zeova dan en fason parfe. (Iza. 55:9) Me parey Pyer nou kapab fer zefor pour mazin parey Zeova par fer zefor pour aprann konsernan fason panse Zeova, pour demontre limilite e annan bon zizman.