Swiv legzanp Zezi e devoue dan predikasyon

1. Kwa ki fer pep Zeova diferan avek bann swadizan Kretyen?

ENN bann keksoz ki fer bann serviter Zeova diferan avek bann swadizan Kretyen i zot devouman dan predikasyon. (Tit 2:14) Me i kapab ki parfwa ou napa sa lazwa ek sa lanvi pour al predikasyon. Petet ou santi parey en ansyen ki travay dir dan kongregasyon ki ti dir: “Parfwa, mon zis pa anvi al predikasyon.”

2. Kwa ki kapab fer li difisil pour kontinyen devoue dan sa travay predikasyon?

² Petet nou pli kontan fer lezot keksoz dan servis Zeova olye al predikasyon. Akoz? Petet sa i akoz ler nou konstri oubyen mentenir bann Lasal Rwayonm, ler nou ede ler i annan dezas oubyen ler nou ankouraz nou bann frer ek ser, nou vwar bann bon rezilta deswit e nou santi nou pli byen. Osi ler nou travay avek nou bann frer ek ser, nou travay dan lape e nou demontre lanmour anver kanmarad e nou konnen ki nou bann frer ek ser i rekonesan pour sa ki nou fer pour zot. De lot kote, i kapab ki nou pe anons sa bon nouvel dan menm teritwar pour plizyer lannen e pa bokou dimoun ki ekout sa mesaz. Oubyen i kapab ki i annan dimoun ki azir dan en fason brit anver nou travay predikasyon. Nou osi konnen ki anmezir lafen i aprose, plis dimoun i kapab opoz nou. (Mat. 10:22) Kwa ki kapab ed nou pour kontinyen devoue dan sa travay predikasyon e menm annan plis devouman dan sa travay predikasyon.

3. Ki mannyer Lik 13:6-9 i montre ki Zezi ti devoue dan predikasyon?

³ Atraver legzanp Zezi, nou kapab aprann ki mannyer pour annan devouman dan predikasyon. Ler i ti lo later, Zezi ti toultan devoue dan predikasyon. Anfet, pli letan ti pase, i ti fer plis dan predikasyon. (Lir Lik 13:6-9.) Dan en legzanp, Zezi ti konpar sa travay predikasyon ki i ti fer avek sa travay ki en zardinyen ti fer. Pour trwa-z-an, sa zardinyen ti travay dir pour pran swen avek en pye fig me sa pye fig pa ti raport fri. Pareyman, pour trwa-z-an, Zezi ti anons sa bon nouvel avek bann Zwif me laplipar zot pa ti vin son bann disip. Kantmenm sa, Zezi ti azir parey sa zardinyen ki ti kontinyen annan lespwar ki sa pye fig ti pou raport fri e i pa ti aret anons sa bon nouvel avek zot. O kontrer, i ti fer plis zefor pour tous zot leker.

4. Ki kat keksoz nou kapab aprann avek legzanp Zezi?

⁴ Dan sa lartik, nou pou vwar lafason ki Zezi ti montre ki i ti devoue dan predikasyon sirtou pandan sa dernyen sis mwan ki i ti lo later. (Vwar not letid “After these things” dan nwtsty-E dan Lik 10:1.) Ler nou aprann avek sa ki Zezi ti ansennyen e nou swiv son legzanp, sa pou ed nou pour kontinyen devoue dan predikasyon. Annou vwar kat keksoz ki Zezi ti fer ki ti ed li pour devoue dan predikasyon: (1) I ti konsantre lo fer lavolonte Zeova, (2) i ti konpran e azir an armoni avek bann profesi ki dan Labib, (3) i ti annan konfyans ki Zeova ti pou ed li e (4) i ti kontinyen annan lespwar ki serten ti pou ekout sa mesaz.

I TI KONSANTRE LO FER LAVOLONTE ZEOVA

5. Ki mannyer Zezi ti montre ki fer lavolonte Bondye ti sa keksoz pli enportan dan son lavi?

⁵ Zezi ti anons “sa bon nouvel lo Rwayonm” avek devouman parski i ti konnen ki i sanmenm sa ki Bondye i anvi i fer. (Lik 4:43) Sa travay predikasyon ti sa keksoz pli enportan dan son lavi. Pandan bann dernyen mwan ki i ti lo later, Zezi ti al “dan bann lavil ek vilaz enn apre lot” pour ansenny bann dimoun. (Lik 13:22) I ti osi ansenny lezot disip pour anons sa bon nouvel parey li.—Lik 10:1.

6. Ki mannyer sa travay predikasyon i relye avek lezot travay ki nou fer dan servis Zeova? (Vwar portre.)

⁶ Ozordi, sa travay pour anons sa bon nouvel i sa travay prensipal ki Zeova ek Zezi i anvi nou fer. (Mat. 24:14; 28:19, 20) Tou lezot travay ki nou fer dan nou servis pour Zeova, i relye avek sa travay predikasyon. Par egzanp, nou konstri bann batiman ki ganny servi dan servis Zeova oubyen nou servi dan Betel pour siport sa travay predikasyon ki pe ganny fer dan teritwar. Ler i annan en dezas, nou fer sir ki nou bann frer ek ser i annan bann keksoz ki zot bezwen pour ed zot repran zot bann aktivite spirityel enkli predikasyon. Ler nou gard antet ki sa travay predikasyon i vreman enportan e ki i sa travay prensipal ki Zeova i anvi nou fer, sa pou motiv nou pour partisip dan predikasyon regilyerman. En ansyen ki apel János ki reste Laongri i dir: “Mon gard antet ki napa okenn travay ki nou fer dan servis Zeova ki kapab ranplas sa travay predikasyon parski sa i sa travay prensipal ki nou fer.”

7. Akoz Zeova i anvi ki nou kontinyen fer predikasyon? (1 Timote 2:3, 4)

⁷ Pour nou annan plis devouman dan predikasyon, nou bezwen vwar lezot parey Zeova i vwar zot. Zeova i anvi ki lamazorite dimoun i tann sa bon nouvel e zot aksepte laverite konsernan li. (Lir 1 Timote 2:3, 4.) Pour ed nou fer sa, i ed nou pour amelyor lafason ki nou anons sa bon nouvel ki sov lavi. Par egzanp, sa brosir Kontan dimoun—Fer zot vin disip i donn nou sizesyon ki kapab ed nou pour konmans bann konversasyon avek bann dimoun pour ki avek letan, zot kapab konmans etidye Labib e vin bann disip Zezi. Menm si dimoun pa konmans servi Zeova la konmela, zot kapab annan sa loportinite pour fer li avan gran ladetres i fini. Alor sa ki nou dir zot la konmela i kapab sanmenm ki motiv zot pour servi Zeova dan lavenir. Me sa pou arive si nou kontinyen fer predikasyon.

I TI KONPRAN E AZIR AN ARMONI AVEK BANN PROFESI KI DAN LABIB

8. Lefet ki Zezi ti konn bann profesi, ki mannyer sa ti annan en lefe lo lafason ki i ti servi son letan?

⁸ Zezi ti konpran ki mannyer bann profesi ti pou ganny akonplir. I ti konnen ki i pou fer sa travay predikasyon pour trwa-z-an edmi. (Dan. 9:26, 27) I ti osi konnen ki Labib ti’n predir konsernan kan e ki mannyer i ti pou mor. (Lik 18:31-34) Sa ki i ti konnen ti annan en lefe lo lafason ki i ti servi son letan. Sa ti fer ki i ti anons sa bon nouvel avek devouman pour li kapab fini sa travay ki i ti’n ganny donnen pour fer.

9. Ki mannyer ler nou konpran bann profesi Labib, sa i motiv nou pour anons sa bon nouvel avek devouman?

⁹ Ler nou konpran bann profesi Labib, sa i kapab motiv nou pour anons sa bon nouvel avek devouman. Nou konnen ki lafen i pros. Labib ti predir ki mannyer bann dimoun ti pou ete dan bann dernyen zour e ki ti pou arive pandan sa bann letan e nou pe vwar sa bann profesi pe ganny akonplir. Labib ti osi predir ki “dan letan lafen,” lerwa sid ek lerwa nor ti pou lager avek kanmarad. Nou konpran ki sa pe refer avek sa konfli ki i annan ant Pouvwar Mondyal Angle ek Ameriken ek Larisi ek son bann alye. (Dan. 11:40) Nou osi konpran ki Pouvwar Mondyal Angle ek Ameriken i reprezant lipye sa stati ki Danyel 2:43-45 i koz lo la. Nou konvenki ki byento Rwayonm Bondye pou detrir gouvernman imen zis parey bann profesi i montre. Tou sa bann profesi i montre ki lafen i vreman pros. Alor nou bezwen servi nou letan dan sa pli bon fason setadir pour anons sa bon nouvel.

10. Dan ki lezot fason bann profesi Labib i kapab motiv nou pour devoue dan predikasyon?

¹⁰ Dan bann profesi i osi annan en mesaz ki nou vreman anvi partaze. En ser ki apel Carrie ki reste Repiblik Dominiken, i dir: “Ler mon mazin bann zoli keksoz ki Zeova i promet pour fer dan lavenir, mon santi ki mon bezwen koz avek lezot lo sa bann promes.” I osi dir: “Ler mon vwar bann problenm ki bann dimoun pe fer fas avek, mon realize ki sa bann promes pa zis pour mwan, i pour zot osi.” Bann profesi Labib i montre nou ki Zeova pe ed nou pour fer sa travay predikasyon e sa i ankouraz pour kontinyen dan sa travay. En ser ki apel Leila ki reste Laongri, i dir: “Izai 11:6-9 i motiv mwan pour anons sa bon nouvel menm avek bann ki mon krwar pa pou ekoute. Mon konnen ki avek led Zeova, tou dimoun i kapab sanze.” En frer ki apel Christopher ki reste Lazanbi, i dir: “Parey Mark 13:10 ti’n predir, sa bon nouvel pe ganny anonse partou dan lemonn e mon santi ki i en loner pour ede akonpli sa profesi.” Ki profesi Labib ki motiv ou pour kontinyen anons sa bon nouvel?

I TI ANNAN KONFYANS KI ZEOVA TI POU ED LI

11. Akoz Zezi ti bezwen annan konfyans ki Zeova ti pou ed li pour kontinyen devoue dan predikasyon? (Lik 12:49, 53)

¹¹ Zezi ti annan konfyans ki Zeova ti pou ed li pour kontinyen devoue dan predikasyon. Menm si Zezi ti swazir son bann parol byen, i ti konnen ki sa bon nouvel konsernan Rwayonm ti pou fer serten dimoun ankoler e bokou ti pou opoz sa mesaz. (Lir Lik 12:49, 53.) Bann sef relizye pa ti kontan sa mesaz ki Zezi ti pe anonse alor plizyer fwa zot ti esey touy li. (Zan 8:59; 10:31, 39) Me Zezi ti kontinyen anons sa bon nouvel parski i ti konnen ki Zeova ti avek li. I ti dir: “Mon pa tousel, me mon Papa ki’n anvoy mwan i avek mwan. . . . I pa’n les mwan tousel parski mon toultan fer sa ki fer li plezir.”—Zan 8:16, 29.

12. Ki mannyer Zezi ti prepar son bann disip pour kontinyen fer predikasyon menm ler dimoun i opoz zot?

¹² Zezi ti fer son bann disip rapel ki zot ti kapab annan konfyans ki Zeova ti pou ed zot. I ti asir zot plizyer fwa ki Zeova ti pou ed zot menm ler zot ganny persekite. (Mat. 10:18-20; Lik 12:11, 12) Vi ki Zezi ti konnen ki zot ti pou ganny persekite, i ti dir zot ki zot devret pridan. (Mat. 10:16; Lik 10:3) I ti dir zot ki zot pa devret fors dimoun pour ekout zot mesaz. (Lik 10:10, 11) I ti osi dir zot ki si zot ganny persekite, zot devret al dan en lot landrwa. (Mat. 10:23) Menm si Zezi ti devoue dan predikasyon e i ti annan konfyans dan Zeova, i ti evit bann sityasyon danzere ler i ti kapab.—Zan 11:53, 54.

13. Akoz ou kapab asire ki Zeova pou ed ou?

¹³ Ozordi, en kantite dimoun i opoz sa travay predikasyon. Alor nou bezwen led Zeova pour kontinyen devoue dan predikasyon. (Rev. 12:17) Akoz ou asire ki Zeova pou ed ou? Annou vwar sa ki Zezi ti dir dan son lapriyer ki’n ganny ekrir dan Zan sapit 17. Zezi ti demann Zeova pou vey lo son bann zapot e Zeova ti reponn son lapriyer. Dan liv Akt, nou vwar lafason ki Zeova ti ed bann zapot pour anons sa bon nouvel avek devouman menm ler zot ti ganny persekite. Dan son lapriyer, Zezi ti osi demann Zeova pour vey lo bann ki ti pou devlop lafwa dan sa mesaz ki bann zapot ti pe anonse. Sa i enkli ou osi. Zeova i ankor pe reponn lapriyer Zezi. I pou ed ou zis parey i ti ed bann zapot.—Zan 17:11, 15, 20.

14. Ki mannyer nou konnen ki nou pou kapab kontinyen anons sa bon nouvel avek devouman? (Vwar portre.)

¹⁴ Anmezir ki lafen i aprose, i kapab ki i pou pli difisil pour nou anons sa bon nouvel. Me Zezi i asir nou ki nou pou ganny sa led ki nou bezwen pour kontinyen devoue dan sa travay predikasyon. (Lik 21:12-15) Parey Zezi ek son bann disip ti fer, nou les bann dimoun deside si zot pou ekoute oubyen non e nou pa argimant avek zot. Menm ler sa travay predikasyon i anba restriksyon, nou bann frer ek ser in kapab kontinyen anons sa bon nouvel parski zot depan lo Zeova e pa lo zot prop lafors. Zis parey Zeova ti donn son bann serviter dan premye syek lafors, ozordi i donn nou sa lafors ki nou bezwen pour “anons sa mesaz afon” parey i anvi. (2 Tim. 4:17) Ou kapab asire ki si ou depan lo Zeova, ou pou kapab kontinyen anons sa bon nouvel avek devouman.

I TI KONTINYEN ANNAN LESPWAR KI SERTEN TI POU EKOUT SA MESAZ

15. Kwa ki montre ki Zezi ti asire ki sa travay predikasyon ti pou annan bann bon rezilta?

¹⁵ Zezi ti asire ki i ti pou annan dimoun ki ti pou ekout sa bon nouvel. Sa ti ed li pour kontinyen annan lazwa e pour kontinyen travay dir dan predikasyon. Par egzanp, ver lannen 30, Zezi ti konpar bann dimoun avek en plantasyon ki ti’n pare pour rekolt parski i ti vwar ki en kantite parmi zot ti pare pour ekout sa bon nouvel. (Zan 4:35) Apepre enn an pli tar, i ti dir son bann disip: “Rekolt i gran.” (Mat. 9:37, 38) Pli tar, i ti osi dir: “Rekolt i gran . . . Sipliy Met rekolt pour anvoy plis travayer pour anmas son rekolt.” (Lik 10:2) Zezi ti toultan annan lespwar ki dimoun ti pou ekout sa bon nouvel e i ti zwaye ler zot ti ekoute.—Lik 10:21.

16. Ki mannyer bann legzanp ki Zezi ti servi ti montre ki sa travay predikasyon ti pou annan bann bon rezilta? (Lik 13:18-21) (Vwar portre.)

¹⁶ Zezi ti ed son bann disip pour kontinyen devoue dan predikasyon par rapel zot ki sa mesaz ki zot anonse pou annan bann bon rezilta. Annou vwar de legzanp ki i ti servi. (Lir Lik 13:18-21.) Dan en legzanp, Zezi ti konpar sa mesaz Rwayonm avek en pti lagrenn moutard ki grandi pour vin en gro pye dibwa. Sa legzanp pe monte ki en kantite dimoun ti pou aksepte sa bon nouvel e ki nanryen pa ti pou kapab anpes sa arive. Dan en lot legzanp, i ti konpar sa mesaz konsernan Rwayonm avek lelven. Sa i akoz sa mesaz ti pou ganny anonse partou dan lemonn e i ti pou motiv dimoun pour fer sanzman menm si lezot pa ti pou vwar sa bann sanzman deswit. Dan sa fason, Zezi ti ed son bann disip pour vwar ki sa travay predikasyon ti pou reisi.

17. Ki bann rezon nou annan pour kontinyen annan en bon pwennvi konsernan sa travay predikasyon?

¹⁷ Ler nou reflesir lo lafason ki sa mesaz Rwayonm pe ed en kantite dimoun partou dan lemonn, sa i motiv nou pour kontinyen devoue dan predikasyon. Tou le lannen, plizyer milye dimoun i asiste Memoryal e etidye Labib avek Temwen Zeova. Plizyer santenn milye i batize e zot osi zot partisip dan sa travay predikasyon ansanm avek nou. Nou pa konnen ki kantite dimoun ki pou aksepte sa mesaz. Me nou konnen ki Zeova pe rasanble en gran lafoul ki pou pas atraver gran ladetres. (Rev. 7:9, 14) Zeova i sa Met rekolt e i vwar ki i ankor annan dimoun ki pou aksepte sa bon nouvel, alor nou annan bon rezon pour kontinyen anons sa bon nouvel.

18. Ki nou anvi dimoun i remarke?

¹⁸ Bann vre disip Zezi in toultan anons sa bon nouvel avek devouman. Ler dimoun ti vwar lafason ki bann zapot ti koz avek lardyes, “zot ti realize ki sa bann zonm ti bann disip Zezi.” (Akt 4:13) Parey bann zapot, nou anvi anons sa bon nouvel avek lardyes, koumsa dimoun pou remarke ki nou pe swiv legzanp Zezi e nou devoue dan predikasyon.