Kontinyen viv par lafwa

1. Akoz zapot Pol ti satisfe ler i ti reflesir lo lafason ki i ti’n viv son lavi?

LER zapot Pol ti konnen ki i ti pros pour ganny touye, i ti reflesir lo lafason ki i ti’n viv son lavi e bann desizyon ki i ti’n fer ti fer li vreman kontan. I ti dir: “Mon’n fini sa lakours e mon’n reste ferm dan lafwa.” (2 Tim. 4:6-8) Konman en Kretyen, Pol ti fer bann desizyon ki saz e i ti asire ki sa ti fer Zeova kontan. Nou osi nou anvi fer bann bon desizyon pour nou kapab ganny laprouvasyon Zeova. Ki mannyer nou kapab fer sa?

2. Ki Pol ti pe esey dir dan 2 Korentyen 5:7?

² Pol ti dir sa konsernan son lekor ek lezot Kretyen fidel: “Nou pe viv par lafwa e non pa dapre sa ki nou vwar.” (2 Kor. 5:7) Ki i ti pe esey dir? En dimoun ki viv dapre sa ki i vwar, i fer bann desizyon zis dapre sa ki i vwar, tande e santi. De lot kote, en dimoun ki viv par lafwa, i fer bann desizyon ki montre ki i annan konfyans dan Zeova. Par son aksyon i montre ki i asire ki ler i swiv konsey Zeova ki dan Labib, i pou annan en bon lavi la konmela e Zeova pou rekonpans li plis ankor dan lavenir.—Ps. 119:66; Ebr. 11:6.

3. Ki byenfe nou gannyen ler nou viv par lafwa? (2 Korentyen 4:18)

³ Parfwa nou tou nou fer bann desizyon dapre sa ki nou vwar, tande e santi. Me si ler nou pe fer bann desizyon enportan nou depan zis lo sa ki nou vwar, tande oubyen santi, i tre probab ki nou pou fer fot. Akoz? Parski parfwa nou kapab ganny anbete avek sa ki nou vwar e tande. Si nou fer desizyon zis dapre sa ki nou vwar, tande oubyen santi, avek letan nou pou fer en keksoz ki pa fer Zeova plezir. (Ekle. 11:9; Mat. 24:37-39) Me si nou fer bann desizyon dapre nou lafwa, nou pou fer bann desizyon ki “akseptab pour Senyer.” (Efe. 5:10) Ler nou swiv konsey Bondye, sa pou donn nou lape lespri e pou fer nou vreman zwaye. (Ps. 16:8, 9; Iza. 48:17, 18) Osi, si nou kontinyen viv par lafwa, setadir nou kontinyen depan lo gidans Zeova, nou pou viv pour touzour.—Lir 2 Korentyen 4:18.

4. Ki mannyer en dimoun pou konnen si i pe viv par lafwa oubyen i pe viv dapre sa ki i vwar?

⁴ Ki mannyer nou kapab konnen si nou pe viv par lafwa oubyen nou pe viv dapre sa ki nou vwar? Nou tou nou bezwen demann nou lekor: Kwa ki gid mwan ler mon pe fer bann desizyon? Eski mon depan lo zis sa ki mon vwar ouswa mon rod konsey Zeova? Annou vwar ki mannyer nou kapab kontinyen viv par lafwa dan trwa domenn enportan: ler nou pe swazir en louvraz, ler nou pe swazir en konzwen e ler nou ganny bann lenstriksyon sorti kot lorganizasyon Zeova. Dan sak sa bann domenn, nou pou vwar sa ki nou bezwen reflesir lo la pour nou kapab fer bann bon desizyon.

LER NOU PE SWAZIR EN LOUVRAZ

5. Ki nou devret reflesir lo la ler nou pe swazir en louvraz?

⁵ Nou tou nou anvi pran swen avek nou lekor e avek nou fanmir. (Ekle. 7:12; 1 Tim. 5:8) Serten louvraz i pey byen. I kapab ki sa louvraz i permet sa dimoun pour ganny ase larzan pour pran swen avek son fanmir e pour menm met en pe larzan dekote pour lavenir. Tandis ki i annan lezot travay ki pey zis ase pour en dimoun ganny bann keksoz de baz ki son fanmir i bezwen, parey manze, en landrwa reste ek lenz. Ler nou pe deside si nou pou aksepte en louvraz, i normal pour mazin lakantite larzan ki nou pou gannyen. Me si en dimoun i mazin zis lakantite larzan ki i pou gannyen, sa i montre ki sa dimoun pe viv dapre sa ki i vwar e pa par lafwa.

6. Ki mannyer nou kapab montre ki nou pe viv par lafwa ler nou pe swazir en louvraz? (Ebre 13:5)

⁶ Si nou viv par lafwa, nou pou osi pran kont lefe ki sa louvraz pou annan lo nou lanmitye avek Zeova. Nou kapab demann nou lekor: ‘Eski dan sa travay mon pou bezwen fer bann keksoz ki Zeova pa kontan?’ (Prov. 6:16-19) ‘Eski sa louvraz pou fer mwan mank renyon, pas mwens letan dan predikasyon, annan mwens letan pour etidye Labib e menm fer mwan pas en kantite letan lwen avek mon fanmir?’ (Fili. 1:10) Si ou larepons pour bann kestyon koumsa i wi, i ti pou saz pour ou pa aksepte sa louvraz, menm si i difisil pour trouv louvraz. Vi ki nou viv par lafwa, nou fer bann desizyon ki montre ki nou asire ki Zeova pou donn nou sa ki nou bezwen.—Mat. 6:33; lir Ebre 13:5.

7-8. Ki mannyer en frer ki reste Sid Lanmerik ti montre ki i pe viv par lafwa? (Vwar portre.)

⁷ Annou vwar leksperyans en frer ki apel Javier,a ki reste Sid Lanmerik. Javier ti vwar akoz i enportan pour viv par lafwa. I dir: “Mon ti fer laplikasyon pour en louvraz kot mon ti pou ganny de fwa plis ki mon ti pe gannyen e mon ti pou pe fer en louvraz ki mon ti pou vreman kontan.” Me Javier ti osi vreman anvi fer pionye. I osi dir: “Mon ti ganny apele pour fer en entervyou pour sa louvraz. Avan sa entervyou, mon ti demann Zeova pour ed mwan parski mon ti asire ki i konnen kwa ki pli bon pour mwan. Mon ti anvi fer plis dan mon travay e ganny plis larzan me mon pa ti anvi sa travay si i ti pou anpes mwan atenn mon bann lobzektif spirityel.”

⁸ Javier i dir: “Pandan sa entervyou, sa dimoun ki ti pe fer entervyou ti dir mwan ki souvan mon ti pou bezwen travay apre ler. Dan en fason zantiy, mon ti dir li ki mon pa ti pou kapab fer sa parski mon ti bezwen letan pour fer mon bann keksoz spirityel.” Alor Javier ti deside pour pa aksepte sa louvraz. De semenn pli tar, i ti konmans fer pionye ordiner. Detrwa mwan pli tar, i ti trouv en travay a mitan. I dir: “Zeova ti tann mon lapriyer e i ti ed mwan pour trouv en louvraz ki ti pou permet mwan pour fer pionye. Mon vreman kontan pour annan en travay ki permet mwan pour annan plis letan pour servi Zeova e pour ed mon bann frer ek ser.”

9. Ki ou aprann avek leksperyans Trésor?

⁹ Ki nou devret fer si nou realize ki sa travay ki nou pe fer pe fer li difisil pour nou reste pros avek Zeova? Annou vwar legzanp en frer ki apel Trésor ki reste Kongo. I dir: “Mon ti’n fek ganny en nouvo travay e i ti enn ki mon ti’n toultan anvi. Mon ti pe ganny trwa fwa plis ki sa ki mon ti gannyen oparavan e dimoun ti vwar mwan konman en dimoun enportan.” Me Trésor ti mank renyon souvan parski i ti travay apre ler. Osi, parfwa son bann koleg travay ti met presyon lo li pour kasyet bann keksoz dezonnet ki zot ti pe fer. Trésor ti anvi kit sa travay me i ti per ki i pa ti pou trouv en lot louvraz. Kwa ki ti ed li? I dir: “Abakouk 3:17-19 ti ed mwan konpran ki menm si mon aret travay e ganny mwens larzan, dan en fason ou en lot, Zeova ti pou pran swen avek mwan. Alor mon ti aret travay.” I osi dir: “En kantite anplwayer i krwar ki en dimoun pou fer nenport kwa pour gard en travay ki pey byen e ki i pou menm sakrifye letan ki i pase avek son fanmir ek letan ki i pase pour ador Bondye. Mon kontan ki mon’n protez mon lanmitye avek Zeova e mon relasyon avek mon fanmir. Enn an pli tar, Zeova ti ed mwan pour trouv en bon louvraz kot mon ti ganny ase larzan pour pran swen avek mon lekor e pour annan plis letan pour mon bann aktivite spirityel. I kapab ki ler nou met Zeova premye, pour en pe letan nou napa bokou larzan, me Zeova pou pran swen avek nou.” Si nou annan konfyans dan bann konsey ek promes sorti kot Zeova, nou pou kontinyen fer bann desizyon ki montre ki nou annan lafwa e Zeova pou beni nou.

LER OU PE SWAZIR EN KONZWEN

10. Ler en dimoun pe swazir en konzwen kwa ki kapab montre ki i pe viv dapre sa ki i vwar?

¹⁰ Maryaz i en kado sorti kot Zeova e i normal pour en dimoun anvi marye. Ler en ser pe reflesir lo en frer ki i kapab marye avek, petet i pou pran kont personnalite, laparans ek repitasyon sa frer.b I pou osi pran kont lafason ki i zer larzan, lafason ki i desarz son bann responsabilite dan son fanmir e lafason ki sa frer i fer li santi. Tou sa bann keksoz i enportan. Me si i pran kont zis sa bann keksoz, sa pou montre ki i pe viv dapre sa ki i vwar.

11. Ki mannyer nou kapab montre ki nou pe viv par lafwa ler nou pe swazir en konzwen? (1 Korentyen 7:39)

¹¹ Zeova i vreman fyer ler nou bann frer ek ser i swiv son konsey ler zot pe swazir en konzwen. Par egzanp, zot aplik sa konsey Labib pour espere ziska ki zot vin en pe pli matir avan ki zot mazin pour marye. (1 Kor. 7:36) Zot sirtou fer sir ki sa dimoun ki zot pe mazin marye avek i annan bann kalite ki Zeova i dir en bon msye oubyen en bon madanm i devret annan. (Prov. 31:10-13, 26-28; Efe. 5:33; 1 Tim. 5:8) Si en dimoun ki pa Temwen Zeova i demontre en lentere dan zot, zot pa konmans en relasyon avek sa dimoun. O kontrer zot obeir sa konsey ki dan 1 Korentyen 7:39 ki dir marye “selman avek en disip Senyer.” (Lir.) Zot fer sa parski zot asire ki Zeova pou toultan donn zot sa sipor emosyonnel ki zot bezwen.—Ps. 55:22.

12. Ki ou aprann avek leksperyans Rosa?

¹² Annou vwar leksperyans Rosa en pionye ki reste Lakolonbi. En msye kot son travay ki pa ti en Temwen Zeova, ti konmans demontre lentere dan li. Rosa ti dakor avek sa msye. Rosa i dir: “I ti paret en bon dimoun. I ti ed bann dimoun dan son kominote e i pa ti fimen, servi drog oubyen bwar tro bokou. Mon ti kontan lafason ki i ti tret mwan. I ti annan tou bann kalite ki mon ti anvi sa msye ki mon marye avek i annan, eksepte i pa ti en Temwen Zeova.” Rosa ti osi dir: “I ti difisil pour mwan dir li ki mon pa ti anvi annan en relasyon avek li. Sa letan mon ti pe santi mwan tousel e mon ti anvi marye me mon pa ti’n trouv en dimoun dan laverite pour mwan marye avek.” Kantmenm sa, Rosa pa ti konsantre lo zis sa ki i ti kapab vwar. I ti reflesir lo lefe ki sa desizyon ti pou annan lo son lanmitye avek Zeova. Alor i ti koup tou kontak avek sa msye e i ti reste bizi dan son servis pour Zeova. En pe letan apre, Rosa ti ganny envite pour asiste Lekol pour bann predikater Rwayonm e aprezan i en pionye spesyal. Rosa i dir: “Zeova in donn mwan en kantite keksoz ki’n fer mwan vreman zwaye.” I pa toultan fasil pour fer sa ki Zeova i anvi nou fer, sirtou ler i annan pour fer avek bann keksoz ki nou kontan. Me ler nou depan lo gidans Zeova, nou toultan ganny bann byenfe.

LER NOU GANNY BANN LENSTRIKSYON SORTI KOT LORGANIZASYON ZEOVA

13. Kwa ki kapab fer nou viv dapre sa ki nou vwar ler nou ganny bann lenstriksyon sorti kot lorganizasyon Zeova?

¹³ Souvan nou ganny bann lenstriksyon swa avek bann ansyen, sirveyan rezyonal, biro brans oubyen Konsey Direkter, ki ed nou dan nou servis pour Zeova. Me parfwa i kapab ki nou pa konpran akoz bann frer in donn en lenstriksyon e i kapab ki nou vwar zis move lefe ki sa lenstriksyon i annan lo nou. Nou kapab menm konmans konsantre lo defo bann frer ki’n donn sa lenstriksyon.

14. Kwa ki pou ed nou pour obeir bann lenstriksyon ki nou gannyen sorti kot lorganizasyon? (Ebre 13:17)

¹⁴ Nou annan lafwa ki Zeova pe gid son lorganizasyon e i konnen ki nou pe pas ladan. Sa i fer ki ler nou ganny lenstriksyon sorti kot lorganizasyon Zeova, nou obeir deswit e nou fer li avek lazwa. (Lir Ebre 13:17.) Nou gard antet ki ler nou obeir bann lenstriksyon, sa i gard linite dan kongregasyon. (Efe. 4:2, 3) Nou annan konfyans ki menm si bann frer ki pe dirize i enparfe, ler nou obeir zot, Zeova pou beni nou. (1 Sam. 15:22) Nou osi annan konfyans ki menm si en lenstriksyon i bezwen ganny sanze, dan son moman apropriye Zeova pou fer sir ki sa i arive.—Mik. 7:7.

15-16. Kwa ki ti ed en frer pour viv par lafwa menm si i ti annan dout konsernan lenstriksyon ki i ti gannyen? (Vwar portre.)

¹⁵ Annou vwar en leksperyans ki montre byenfe ki nou gannyen ler nou annan lafwa e nou swiv lenstriksyon sorti kot lorganizasyon. Remark sa ki ti arive Perou. Menm si en kantite dimoun i koz langaz Espanyol, laplipar dimoun i koz bann langaz lokal sa pei ler zot dan zot lakour. Enn sa bann langaz i Quechua. Pour plizyer lannen, bann frer ek ser ki koz langaz Quechua ti rod bann dimoun ki koz sa langaz dan teritwar ki tonm anba zot kongregasyon. Me ler gouvernman ti met bann nouvo lalwa, en azisteman ti bezwen ganny fer dan lafason ki bann frer ek ser i rod sa bann dimoun. (Rom. 13:1) Serten frer ek ser ti mazinen ki sa azisteman ti pou fer pli difisil pour trouv dimoun. Me ler bann frer ek ser ti obeir sa lenstriksyon, zot ti vwar ki Zeova ti beni zot zefor e zot ti trouv en kantite dimoun ki koz langaz Quechua.

¹⁶ Kevin, ki en ansyen dan en kongregasyon ki koz Quechua, ti enn parmi bann dimoun ki ti enkyet konsernan sa nouvo laranzman. I dir: “Mon ti demann mon lekor, ‘Aprezan ki mannyer nou pou trouv bann dimoun ki koz Quechua?’” Ki Kevin ti fer? I dir: “Mon ti reflesir lo sa ki Proverb 3:5 i dir e lo legzanp Moiz. Zeova ti demann Moiz pou diriz bann Izraelit ler zot ti pe kit Lezip. I ti demann Moiz pou anmenn zot kot Lanmer Rouz. Me laba zot pa ti pou kapab sov bann Ezipsyen. Sa lenstriksyon pa ti paret fer sans. Kantmenm sa Moiz ti obeir e Zeova ti beni li par fer en mirak pour sov zot.” (Egz. 14:1, 2, 9-11, 21, 22) Kevin ti pare pour fer sanzman e esey en lot metod predikasyon. Ki ti arive? I dir: “Mon ti enpresyonnen avek lafason ki Zeova ti beni nou. Oparavan nou ti mars en kantite pour nou kapab zwenn bann dimoun ki koz Quechua e parfwa nou ti zwenn zis enn oubyen de. Aprezan nou al dan bann landrwa kot i annan en kantite dimoun ki koz Quechua. Sa i fer ki nou’n zwenn plis dimoun, nou’n fer plis retourn vizit ek letid Labib. Bokou plis dimoun i asiste renyon.” I kler ki ler nou annan lafwa e nou obeir lenstriksyon sorti kot lorganizasyon, Zeova pou toultan rekonpans nou.

17. Ki ou’n aprann dan sa lartik?

¹⁷ Dan sa lartik, nou’n vwar trwa domenn kot i vreman enportan ki nou fer bann desizyon dapre sa ki Zeova i anvi nou fer. Me nou bezwen fer bann desizyon dapre sa ki Zeova i anvi dan tou laspe nou lavi. Par egzanp ler nou pe swazir ki kalite film nou pou gete, ki nou pou fer dan nou letan detann, si nou pou fer letid avanse e lafason ki nou pou elve nou zanfan. Nenport desizyon ki nou bezwen fer, nou pa devret ganny gide zis par sa ki nou vwar. Nou bezwen osi pran kont nou lanmitye avek Zeova, son konsey e lefet ki Zeova in promet pour pran swen avek nou. Si nou fer sa, nou pou kapab “mars o non Zeova nou Bondye pour touzour e touzour.”—Mik. 4:5.