Lanmen Zeova pa zanmen tro kourt

1. Ki mannyer Moiz ti montre ki i ti annan konfyans dan Zeova ler i ti pe diriz bann Izraelit ler zot ti pe kit Lezip?

LIV Ebre i koz lo en kantite dimoun ki ti annan lafwa dan Zeova e enn parmi sa bann dimoun i Moiz. Moiz ti annan en lafwa for. (Ebr. 3:2-5; 11:23-25) I ti demontre lafwa ler i ti diriz bann Izraelit ler zot ti pe kit Lezip. I pa ti les lafreyer pour Faraon ek son larme anpes li fer sa. I ti annan konfyans dan Zeova e i ti diriz pep Zeova atraver Lanmer Rouz e pli tar ver Later Promiz. (Ebr. 11:27-29) Laplipar Izraelit ti konmans annan dout konsernan si Zeova ti pou kapab pran swen avek zot. Me Moiz ti kontinyen annan konfyans dan son Bondye. Moiz ti annan rezon pour annan lafwa dan Zeova parski Zeova ti donn bann Izraelit manze ek delo pour zot kapab sirviv dan en dezer, kot i ti napa preski nanryen ki ti pouse.a—Egz. 15:22-25; Ps. 78:23-25.

2. Akoz Bondye ti demann Moiz: “Eski lanmen Zeova i tro kourt”? (Nonm 11:21-23)

² Menm si Moiz ti annan en lafwa for, apepre enn an apre ki Zeova ti’n ed bann Izraelit pour kit Lezip, Moiz ti konmans kestyonnen si Zeova ti pou kapab donn bann Izraelit lavyann. Moiz pa ti kapab imazinen ki mannyer Zeova ti pou donn ase lavyann pour satisfer sa plizyer milyon dimoun ki ti pe kanpe dan en dezer kot i ti napa preski nanryen pour manze. Sa ti fer Zeova demann Moiz: “Eski lanmen Zeova i tro kourt?” (Lir Nonm 11:21-23.) Dan sa verse, sa lekspresyon “lanmen Zeova” pe refer avek lespri sen Bondye oubyen sa lafors ki Zeova i servi pour fer son lavolonte. Anfet, i ti konmsi Zeova ti pe demann Moiz: “Eski ou vreman krwar ki mon pa kapab fer sa ki mon’n dir mon pou fer?”

3. Akoz i enportan pour nou reflesir lo leksperyans Moiz ek bann Izraelit?

³ Eski ou’n deza enkyet konsernan si Zeova pou donn ou ek ou fanmir sa ki ou bezwen pour viv? Ki swa ou’n deza santi koumsa oubyen non, dan sa lartik, nou pou vwar leksperyans Moiz ek bann Izraelit e kwa ki ti fer zot napa ase konfyans ki Zeova i kapab pran swen avek zot. Nou pou vwar bann prensip Labib ki pou ed nou annan plis konfyans ki lanmen Zeova pa zanmen tro kourt.

APRANN AVEK LEKSPERYANS MOIZ EK BANN IZRAELIT

4. Kwa ki ti fer en kantite Izraelit konmans annan dout konsernan si Zeova i kapab pran swen avek zot?

⁴ Annou vwar sa ki ti pe arive sa letan. Nasyon Izrael ti’n kit Lezip ansanm avek “en kantite etranze.” Zot ti dan dezer e zot ti’n marse pour en pe letan pour al dan Later Promiz. (Egz. 12:38; Det. 8:15) Sa bann etranze ti’n fatige manz lamann e bann Izraelit osi ti konmans santi koumsa. Alor zot ti konmans konplent avek Moiz. (Nom. 11:4-6) Zot ti konmans anvi bann manze ki zot ti gannyen ler zot ti Lezip. Sa ti fer Moiz santi li anba presyon e i paret ki i ti mazinen ki i devret rod lavyann pour donn tou sa dimoun.—Nom. 11:13, 14.

5-6. Ki nou kapab aprann avek lafason ki bann etranze ti enfliyans en kantite Izraelit?

⁵ Bann etranze ki ti’n kit Lezip ansanm avek bann Izraelit pa ti rekonesan pour bann keksoz ki Zeova ti’n donn zot e i paret ki bann Izraelit ti konmans mazin parey zot. Sa i kapab arive avek nou osi. Ler lezot otour nou pa rekonesan, sa i kapab annan en lefe lo nou e nou konmans pa satisfe e pa rekonesan pour sa ki Zeova i donn nou. Sa i kapab arive si nou konmans mank bann keksoz ki nou ti annan dan lepase oubyen nou konmans zalou bann keksoz ki lezot i annan. Me nou pou pli zwaye si nou aprann pour kontant nou avek sa ki nou annan.

⁶ Bann Izraelit ti’n devret gard antet ki Bondye ti’n promet ki i ti pou donn zot en kantite bon keksoz. Sa promes ti pou ganny akonplir ler zot ti pou ariv dan Later Promiz e pa ler zot ti dan dezer. Dan menm fason, i ti pou byen ki nou medit lo sa ki Zeova in promet pour donn nou dan nouvo lemonn olye konsantre lo bann keksoz ki nou napa la konmela. Nou kapab osi medit lo bann verse ki kapab ed nou pour annan plis konfyans dan Zeova.

7. Akoz nou kapab asire ki lanmen Zeova pa tro kourt?

⁷ Dan Nonm 11:23, Bondye ti demann Moiz: “Eski lanmen Zeova i tro kourt?” I kapab ki ou demande akoz Zeova ti dir sa. I kapab ki Zeova ti pe ed Moiz pour reflesir lo de keksoz: (1) ki son pwisans napa limit e (2) ki i kapab servi son pwisans nenport landrwa kot i oule. Alor menm si bann Izraelit ti dan milye dezer, Zeova ti kapab donn zot en kantite lavyann. Avek “son lanmen for ek son gran pwisans,” Bondye ti montre ki i kapab ed son pep nenport landrwa kot zot ete. (Ps. 136:11, 12) Ler nou pe pas dan problenm, nou kapab asire ki lanmen Zeova pa tro kourt e ki i pou toultan ed nou.—Ps. 138:6, 7.

8. Kwa ki pou ed nou pour pa fer menm fot ki bann ki ti dan dezer ti fer? (Vwar portre.)

⁸ Pa bokou letan apre sa, Zeova ti fer sa ki i ti’n promet e i ti donn son pep en kantite lavyann kay. Me bann Izraelit pa ti remersye Zeova pour sa mirak ki i ti’n fer. O kontrer en kantite parmi zot ti voras e zot ti anvi plis kay ki zot ti bezwen. Pour en zour edmi, zot ti kontinyen anmas otan kay ki zot ti kapab. Zeova ti ankoler avek sa bann ki ti “annan bann dezir egois” e i ti pini zot. (Nom. 11:31-34) Nou kapab aprann en leson avek zot legzanp. Nou bezwen fer atansyon ki nou pa vin egois. Ki swa nou annan en kantite larzan oubyen non, nou bezwen premyerman konsantre lo “bann trezor dan lesyel.” Pour nou kapab fer sa, nou bezwen fer zefor pour kontinyen vin pli pros avek Zeova ek Zezi. (Mat. 6:19, 20; Lik 16:9) Ler nou fer sa, nou kapab asire ki Zeova pou pran swen avek nou.

9. Ki nou kapab asire?

⁹ Dan nou letan osi, Zeova i pare pour ed son pep. Eski sa i vedir ki nou pa pou zanmen eksperyans problenm ekonomik oubyen ki nou pa pou zanmen bezwen manze? Non.b Nou kapab asire ki Zeova pa pou zanmen abandonn nou. I pou ed nou dan nenport problenm ki nou pas ladan. Ki mannyer nou kapab montre ki nou annan konfyans ki Zeova pou donn nou sa ki nou bezwen? Annou vwar de sityasyon: (1) ler nou eksperyans problenm ekonomik e (2) ler nou pe plàn pour lavenir.

LER NOU EKSPERYANS PROBLENM EKONOMIK

10. Ki bann problenm ekonomik nou kapab fer fas avek?

¹⁰ Anmezir ki lafen sa lemonn i vin pli pros, lavi pou vin pli difisil parski i annan sanzman dan bann gouvernman, i annan lager, dezas oubyen bann nouvo pandemi. I kapab ki en sel kou nou perdi nou louvraz, bann keksoz ki nou annan oubyen nou bezwen kit sa landrwa kot nou reste. Sa i kapab fer ki i vin pli difisil pour ganny bann keksoz ki nou bezwen. I kapab ki nou pou bezwen trouv en lot louvraz dan en lot landrwa oubyen i kapab ki nou pou bezwen al reste dan en lot landrwa ansanm avek nou fanmir pour nou kapab ganny sa ki nou bezwen. Kwa ki kapab ed nou pour fer bann desizyon ki montre lo nou annan konfyans dan Zeova?

11. Kwa ki kapab ed ou pour fer fas avek problenm ekonomik? (Lik 12:29-31)

¹¹ I vreman enportan pour koz avek Zeova konsernan bann keksoz ki fer ou enkyet parski sa pou ed ou en kantite. (Prov. 16:3) Demann Zeova pour donn ou sa lasazes ki ou bezwen pour fer bann bon desizyon, pour ed ou reste kalm e pour ou aret “trakas tro bokou.” (Lir Lik 12:29-31.) Kontinyen demann li pour ed ou kontant ou avek sa ki ou bezwen pour viv. (1 Tim. 6:7, 8) Fer resers dan nou bann piblikasyon lo ki mannyer pour fer fas avek problenm ekonomik. En kantite frer ek ser in vwar ki bann video ek lartik ki lo jw.org in ed zot fer fas avek problenm ekonomik.

12. Ki bann kestyon en Kretyen i kapab demann son lekor ki pou ed li fer sa pli bon desizyon pour son fanmir?

¹² I annan serten frer ek ser ki’n aksepte en louvraz kot zot in bezwen al reste lwen avek zot fanmir e en kantite parmi zot in realize ki sa ti en move desizyon. Avan ki ou aksepte en lot louvraz, pa reflesir zis lo larzan ki ou pou gannyen me reflesir sirtou lo si sa louvraz pou ed ou ek ou fanmir reste pros avek Zeova. (Lik 14:28) Demann ou lekor: ‘Si mon al reste lwen avek mon konzwen, ki lefe sa pou annan lo nou maryaz? Eski mon pou kapab al tou mon bann renyon, partisip dan predikasyon e pas letan avek mon bann frer ek ser?’ Si ou annan zanfan, ou osi bezwen demann ou lekor sa kestyon enportan: ‘Si mon lwen avek mon zanfan, ki mannyer mon pou kapab elve li “dapre disiplin ek gidans Zeova”?’ (Efe. 6:4) Ler ou pe fer sa desizyon, ou bezwen les ou ganny gide par fason panse Zeova e non pa par fason panse ou fanmir ek zanmi ki pa aplik sa ki Labib i dir.c En frer ki apel Tony, ki reste dan en pei Lazi, ti ganny ofer plizyer louvraz dan en lot pei. Me apre ki i ti’n koz lo sa size avek Zeova dan lapriyer e i ti’n koz lo la avek son madanm, i ti deside pour pa aksepte sa bann louvraz me o kontrer i ti fer zefor pour depans mwens larzan. Ler Tony i mazin lo sa ki’n arive, i dir: “Mon’n annan sa privilez pour ed plizyer dimoun pour aprann konn Zeova e nou bann zanfan i vreman kontan pour servi Zeova. Nou’n aprann ki tan ki nou aplik sa ki Matye 6:33 i dir, Zeova pou pran swen avek nou.”

LER NOU PE PLÀN POUR LAVENIR

13. Ki nou kapab fer la konmela pour nou kapab annan sa ki nou bezwen dan nou bann vye zour?

¹³ Nou osi kapab montre ki kantite nou annan konfyans dan Zeova ler nou pe fer plan konsernan nou bann vye zour. Labib i ankouraz nou pour travay dir la konmela pour nou kapab annan sa ki nou bezwen dan lavenir. (Prov. 6:6-11) Alor i rezonnab pour met en pti keksoz dekote dapre nou mwayen. I vre ki larzan i donn en serten proteksyon. (Ekle. 7:12) Me nou pa devret sitan anvi bann keksoz materyel ki sa i vin sa keksoz pli enportan dan nou lavi.

14. Ki mannyer Ebre 13:5 i kapab ed nou ler nou pe plàn pour lavenir?

¹⁴ Zezi ti donn en legzanp pour montre ki en dimoun ki anmas larzan me ki pa “ris devan Bondye,” i bet. (Lik 12:16-21) Personn pa konnen ki pou arive dan lavenir. (Prov. 23:4, 5; Zak 4:13-15) Zezi ti dir ki tou bann ki anvi vin son disip, ti pou bezwen pare pour “abandonn” bann keksoz materyel ki zot annan. (Lik 14:33) Sanmenm sa ki ti arive dan premye syek avek bann Kretyen Zide. Zot ti reste zwaye menm si zot ti perdi tou sa ki zot ti annan. (Ebr. 10:34) Ozordi en kantite frer ek ser in perdi zot louvraz parski zot pa’n siport en parti politik. (Rev. 13:16, 17) Kwa ki ti ed zot pour fer sa? Zot ti annan konfyans total dan promes Zeova ki dir: “Mon pa pou zanmen kit ou e mon pa pou zanmen abandonn ou.” (Lir Ebre 13:5.) Alor nou fer sa ki nou kapab pour nou annan sa ki nou bezwen dan nou bann vye zour e si en keksoz i arive, nou annan konfyans total ki Zeova pou ed nou.

15. Ki mannyer bann paran i devret konsider zot zanfan? (Vwar portre.)

¹⁵ Dan serten kiltir, dimoun i prensipalman annan zanfan pour ki pli tar sa zanfan i kapab fer ase larzan pour pran swen avek zot ler zot in vye. Me Labib i dir ki paran ki devret pran swen avek zot zanfan. (2 Kor. 12:14) I kapab ki serten paran i bezwen serten led pratik anmezir zot vin pli aze e en kantite zanfan i kontan pour ed zot paran dan sa fason. (1 Tim. 5:4) Me bann paran ki servi Zeova i konnen ki sa ki pou fer zot pli zwaye i ler zot elve zot zanfan pour vin en serviter Zeova e non pa ler zot elve zot zanfan avek sa lobzektif ki ler zot zanfan in vin adilt, i pou fer ase larzan pour pran swen avek zot.—3 Zan 4.

16. Ki mannyer bann paran i kapab ed zot zanfan pour ki ler zot vin adilt zot pou kapab pran swen avek zot lekor? (Efezyen 4:28)

¹⁶ Paran, anmezir ki ou ansenny ou zanfan ki mannyer pour pran swen avek son lekor ler i vin en adilt, ansenny zot atraver ou legzanp ki mannyer pour annan konfyans dan Zeova. Depi ki zot ankor zanfan, ansenny zot ki i enportan pour travay dir. (Prov. 29:21; lir Efezyen 4:28.) Anmezir zot grandi, ed zot pour fer zot mye kot lekol. Bann paran i kapab fer resers pour rod bann prensip Labib ki pou ed zot, ed zot zanfan fer en desizyon saz konsernan zot ledikasyon. Lobzektif bann paran i pour ed zot zanfan kapab pran swen avek zot lekor ler zot vin adilt e pour zot kapab fer plis dan predikasyon.

17. Ki nou kapab asire?

¹⁷ Bann serviter Zeova ki annan konfyans dan li, i kapab asire ki Zeova i pare e i kapab donn zot sa ki zot bezwen. Pli lafen i vin pli pros, pli nou pou bezwen annan konfyans dan Zeova. Me nenport kwa ki arive, annou kontinyen annan konfyans ki Zeova pou servi son pwisans pour donn nou sa ki nou bezwen. Nou kapab asire ki lanmen Zeova i for e i pa zanmen tro kourt pour ed nou.