LARTIK LETID 15
KANTIK 30 Mon Papa, mon Bondye ek Zanmi
“Vin pli pros avek Bondye i bon” pour nou!
“Me mwan, vin pli pros avek Bondye i bon pour mwan.”—PS. 73:28.
TOPIK
Nou pou vwar ki mannyer nou kapab vin pli pros avek Zeova e nou pou vwar ki byenfe nou gannyen ler nou fer sa.
1-2. (a) Ki nou bezwen fer pour nou annan en bon lanmitye avek en dimoun? (b) Ki nou pou vwar dan sa lartik?
ESKI ou annan en bon zanmi? Ki mannyer zot ti vin zanmi? I tre probab ki ou ti pas letan avek li, ou ti aprann konsernan bann keksoz ki i’n pas ladan e konsernan bann keksoz ki i kontan e pa kontan. Ou ti vwar ki i annan bann zoli kalite e ou ti anvi devlop sa bann menm kalite. Avek letan, ou ti kontan ou zanmi.
2 Pour ou annan en bon lanmitye avek en dimoun, ou bezwen fer zefor e ou bezwen pas letan avek sa dimoun. Nou bezwen fer sanmenm pour nou annan en bon lanmitye avek Zeova. Dan sa lartik, nou pou vwar ki mannyer nou kapab vin pli pros avek nou Bondye e nou pou vwar bann byenfe ki nou gannyen ler nou fer sa. Me premyerman, nou pou vwar akoz i bon pour nou vin pros avek Zeova, ki nou pli bon Zanmi.
3. Akoz nou devret medit lo bann byenfe ki nou gannyen ler nou vin pli pros avek Zeova? Donn en legzanp.
3 San dout ou dakor ki ler ou vin pros avek Zeova, sa i bon pour ou. Me ler nou medit lo akoz i bon pour nou vin pros avek Zeova, sa i kapab motiv nou pour kontinyen fer zefor pour vin pli pros avek li. (Ps. 63:6-8) Pour ed nou konpran sa, annou vwar en legzanp. Nou konnen ki i bon pour nou manz bann manze ki an bonn sante, pour fer legzersis, pour ganny ase repo e pour bwar ase delo. Kantmenm sa, en kantite dimoun pa fer sa bann keksoz e zot pa pran swen avek zot lasante. Me pli nou reflesir lo rezon akoz sa bann keksoz i bon pour nou lasante, pli nou pou kontinyen fer sa bann keksoz. Dan menm fason, nou konnen ki ler nou vin pros avek Bondye, sa i bon pour nou. Ler nou medit lo bann byenfe ki nou gannyen ler nou fer sa, sa pou motiv nou pour kontinyen vin pli pros avek nou Zanmi.—Ps. 119:27-30.
4. Dapre Psonm 73:28, ki mannyer sa psalmis ti santi?
4 Lir Psonm 73:28. Ekriven Psonm 73 ti en Levit ki ti’n ganny apwente konman en mizisyen kot tanp Zeova. I tre probab ki i ti’n ador Zeova fidelman pour plizyer lannen. Me kantmenm sa, i ti konnen ki i ti enportan pour li ek lezot gard antet ki “vin pli pros avek Bondye i bon.” Ki serten byenfe nou gannyen ler nou fer sa?
LER NOU “VIN PLI PROS AVEK BONDYE,” SA I FER NOU ERE
5. (a) Akoz ler nou vin pli pros avek Zeova, sa i fer nou ere? (b) Dapre Proverb 2:6-16, ki mannyer sa lasazes ki Zeova i donnen i kapab ed ou e protez ou personnelman?
5 Pli nou vin pli pros avek Zeova, pli nou pou ere. (Ps. 65:4) I annan en kantite rezon akoz nou pou ere. Par egzanp, ler nou aplik sa lasazes ki sorti dan Labib, nou ganny bann byenfe. Sa lasazes i protez nou kont move lenfliyans e i anpes nou fer bann fot grav. (Lir Proverb 2:6-16.) I pour sa rezon ki Labib i dir: “Sa dimoun ki trouv lasazes e sa enn ki ganny disernman pou ere.”—Prov. 3:13.
6. Akoz sa psalmis ti perdi son lazwa?
6 I kapab ki parfwa menm bann zanmi Zeova i sagren. Ekriven Psonm 73 ti perdi son lazwa ler i ti mazin bann keksoz ki pour li ti paret enzis. I ti ankoler e zalou parski i ti krwar ki bann move dimoun, ki pa kontan Bondye e ki pa obeir son bann standar, ti annan en lavi fasil. I ti krwar ki dimoun ki vyolan e arogan ti toultan pli ris, pli an bonn sante e zot pa ti soufer. (Ps. 73:3-7, 12) Sa bann keksoz ti sitan fatig sa psalmis ki i ti mazinen si i vo lapenn servi Zeova. I ti sitan sagren ki i ti dir: “Vreman i pa vo lapenn ki mon’n gard mon leker pir e ki mon’n lav mon lanmen akoz mon inosan.”—Ps. 73:13.
7. Ki nou kapab fer ler nou sagren? (Vwar portre.)
7 Menm si sa psalmis ti vreman sagren, i ti fer en keksoz pour sanz son fason panse. I “ti antre dan landrwa sen Bondye” e laba Zeova ti ed li pour sanz son fason panse. (Ps. 73:17-19) Ler nou sagren, Zeova ki nou pli bon Zanmi i konnen ki mannyer nou pe santi. Si nou demann li pour gid nou e nou aksepte led ki i donn nou atraver son Parol ek bann frer ek ser dan kongregasyon, nou pou ganny sa lafors ki nou bezwen pour andire menm si nou sagren. Menm ler nou sitan enkyet ki nou pa konnen ki pour fer, Zeova i kapab rekonfort nou e soulaz nou.—Ps. 94:19.a
Sa Levit ki ti ekri Psonm 73, pe debout dan “landrwa sen Bondye” (Vwar paragraf 7)
LER NOU “VIN PLI PROS AVEK BONDYE,” NOU ANNAN EN BON LAVI E NOU ANNAN LESPWAR
8. Ki lezot byenfe nou gannyen ler nou vin pli pros avek Bondye?
8 Vin pli pros avek Bondye i bon pour nou dan de lezot fason enportan. Premyerman, si nou annan en bon lanmitye avek Bondye, nou kapab annan en bon lavi. Dezyenmman, nou kapab annan en lespwar pour lavenir e nou asire ki sa ki nou pe espere pou vin vre. (Zer. 29:11) Aprezan annou diskit lo sa bann byenfe en pe plis.
9. Akoz ler nou vin pli pros avek Zeova, sa i fer nou annan en bon lavi?
9 Ler nou vin pli pros avek Zeova, sa i fer nou annan en bon lavi. En kantite dimoun ozordi i dir ki Bondye pa egziste e sa i fer ki zot pa konnen akoz imen i lo later e zot krwar ki dan lavenir imen pou nepli egziste. Me nou, nou’n etidye Labib e nou konvenki ki Bondye “i egziste e ki i sa enn ki rekonpans sa bann ki pe vreman rod li.” (Ebr. 11:6) Depi la konmela, nou annan en lavi ki gou parski nou pe fer sa ki nou’n ganny kree pour fer, setadir pour servi Zeova nou Papa ki dan lesyel.—Det. 10:12, 13.
10. Ki Zeova in promet bann ki annan konfyans dan li? (Psonm 37:29)
10 En kantite dimoun napa lespwar pour lavenir. Zot zis travay, marye, annan zanfan e apre zot anmas larzan pour ler zot pran retret. Zot pa konnen ki Bondye in promet pour fer dan lavenir. De lot kote, bann serviter Zeova i annan konfyans dan li. (Ps. 25:3-5; 1 Tim. 6:17) Nou annan konfyans dan nou Bondye ek Zanmi e nou konnen ki i pou fer sa ki i’n promet. I annan en kantite bon keksoz ki nou pe espere. Enn parmi i sa loportinite pour ador Bondye pour touzour dan Paradi.—Lir Psonm 37:29.
11. Ki i arive ler nou vin pli pros avek Bondye e ki mannyer sa i fer Bondye santi?
11 Ler nou vin pli pros avek Bondye, sa i anmenn lezot byenfe. Par egzanp, Zeova in promet pour pardonn pese son bann zanmi ler zot repantir. (Iza. 1:18) Sa i fer ki nou pa bezwen kontinyen santi nou koupab akoz bann pese ki nou’n fer dan lepase. (Ps. 32:1-5) Osi, nou kontan ler nou fer Zeova kontan. (Prov. 23:15) Byensir i annan en kantite lezot byenfe ki nou gannyen parski nou zanmi Zeova. Me ki mannyer nou kapab kontinyen vin pli pros avek Bondye?
KI MANNYER NOU KAPAB KONTINYEN “VIN PLI PROS AVEK BONDYE”?
12. Ki ou’n fer pour vin pros avek Bondye?
12 Si ou’n fini batize konman en Temwen Zeova, ou’n deza fer en kantite keksoz pour ou kapab vin pros avek Bondye. Par egzanp, ou’n aprann en kantite laverite konsernan Zeova ek Zezi Kri, ou’n repantir pour bann pese ki ou’n fer dan lepase, ou’n demontre ki ou annan lafwa dan Bondye e ou’n fer ou mye pour obeir li. Me pour ou kapab vin pli pros avek Bondye, ou bezwen kontinyen fer sa bann keksoz.—Kol. 2:6.
13. Ki trwa keksoz ki kapab ed nou pour kontinyen vin pli pros avek Zeova?
13 Kwa ki pou ed nou pour kontinyen vin pli pros avek Bondye? (1) Nou bezwen kontinyen etidye e lir Labib. Ler nou pe fer sa, nou devret fer plis ki zis aprann bann lenformasyon de baz konsernan Bondye. O kontrer, nou devret esey konpran ki Bondye i anvi nou fer e fer zefor pour viv dapre bann prensip ki i’n met dan Labib. (Efe. 5:15-17) (2) Nou bezwen fer nou lafwa vin pli for par medit lo sa kantite fason ki Zeova i montre ki i kontan nou. (3) Nou bezwen kontinyen ay bann keksoz ki ofans Zeova e pour pa vin zanmi avek dimoun ki fer sa ki mal.—Ps. 1:1; 101:3.
14. Anliny avek 1 Korentyen 10:31, ki nou kapab fer sak zour pour fer Zeova plezir? (Vwar portre.)
14 Lir 1 Korentyen 10:31. I enportan ki nou kontinyen fer bann keksoz ki nou konnen pou fer Zeova plezir. Me sa pa zis enplik fer predikasyon e asiste renyon. I osi enplik bann keksoz ki nou fer dan nou lavi toulezour. Par egzanp, ler nou onnet dan tou keksoz e nou partaz sa ki nou annan avek lezot, sa i fer Bondye kontan. (2 Kor. 8:21; 9:7) I osi anvi ki nou montre ki nou rekonesan pour sa lavi ki in donn nou. Alor nou bezwen fer atansyon konsernan ki kantite nou manze, bwar e nou fer lezot keksoz ki pou ed nou reste an bonn sante. Ler Zeova i vwar ki nou pe fer zefor pour fer li plezir dan tou sa ki nou fer, i pou kontan nou plis.—Lik 16:10.
Ler nou dray dan en bon fason, nou fer legzersis, manz bann manze ki an bonn sante e nou demontre zenerozite, sa i fer Zeova kontan (Vwar paragraf 14)
15. Ki mannyer Zeova i ekspekte nou tret lezot?
15 Zeova i demontre labonte anver bann ki fer sa ki byen e osi anver bann ki fer sa ki mal. (Mat. 5:45) I ekspekte ki nou osi nou demontre labonte anver lezot. Par egzanp, Zeova i demann nou “pour pa koz an mal lo personn, pour pa fer kankan, me pour . . . toultan demontre ladouser anver tou dimoun.” (Tit 3:2) Alor menm si dimoun pa krwar dan Zeova, nou pa krwar ki nou pli siperyer ki zot. (2 Tim. 2:23-25) Ler nou toultan demontre labonte anver lezot, sa i fer nou vin pli pros avek Zeova.
NOU KAPAB “VIN PLI PROS AVEK BONDYE” MENM LER NOU FER FOT
16. Ki mannyer ekriven Psonm 73 ti konmans santi apre en serten letan?
16 Ki ou pou fer si apre en serten letan ou konmans santi ki ou nepli pros avek Zeova akoz bann fot ki ou’n fer? En keksoz en pe parey ti ariv avek ekriven Psonm 73. I ti dir: “Mon lipye ti pros pour kit sa bon semen, mon lipye ti pros pour glise.” (Ps. 73:2) Li menm i ti admet ki i ti “vreman dekouraze” e ki i “pa ti kapab reflesir byen” “parey en zannimo ki pa konpran nanryen” devan Zeova. (Ps. 73:21, 22) Eski i ti krwar ki lefet ki i ti’n fer fot, Zeova ti nepli kontan li e ki i pa ti pou pardonn li?
17. (a) Ki sa psalmis ti fer menm ler i ti vreman dekouraze? (b) Ki nou kapab aprann avek son leksperyans? (Vwar portre.)
17 Si sa psalmis ti santi ki Zeova ti’n abandonn li, i bezwen ki i ti santi koumsa pour zis en ptigin letan. I paret ki ler i ti santi li vreman dekouraze, i ti realize ki i bezwen vin pli pros avek Bondye. I ti dir: “Me aprezan mon toultan avek ou [Zeova], ou’n tyonbo mon lanmen drwat. Ou konsey mwan e gid mwan e apre, ou pou fer mwan ganny laglwar.” (Ps. 73:23, 24) Nou osi nou devret demann Zeova pour donn nou lafors ler nou santi ki nou lafwa in afebli oubyen ler nou dekouraze akoz bann fot ki nou’n fer. (Ps. 73:26; 94:18) Menm si nou fer bann fot grav, nou kapab retourn kot Zeova e asire ki i “pare pour pardonnen.” (Ps. 86:5) Ler nou vreman dekouraze, i vreman enportan ki nou vin pli pros avek Bondye.—Ps. 103:13, 14.
Ler nou santi ki nou lafwa in afebli, nou devret fer zefor pour vin pli pros avek Zeova par pran plis letan pour priye e par asiste renyon (Vwar paragraf 17)
KONTINYEN “VIN PLI PROS AVEK BONDYE” POUR TOUZOUR
18. Akoz nou kapab kontinyen vin pli pros avek Zeova pour touzour?
18 Nou pa pou zanmen aret aprann konsernan Zeova. Alor nou pou kapab kontinyen vin pli pros avek li pour touzour. Labib i dir ki nou pa kapab “vreman konpran” fason fer Zeova, son lasazes ek son konnesans.—Rom. 11:33.
19. Ki liv Psonm i dir nou konsernan lavenir?
19 Dan Psonm 79:13 nou lir: “Nou, ou pep e ou bann mouton ki ou pran swen avek, nou pou remersye ou pour touzour e nou pou loue ou, zenerasyon apre zenerasyon.” Anmezir ki ou vin pli pros avek Zeova, ou kapab asire ki Zeova pou beni ou pour touzour. Parey sa psalmis ou kapab dir: “Bondye i redonn mwan lafors e i mon par pour touzour.”—Ps. 73:26.
KANTIK 32 Pran kote avek Zeova!
a Bann dimoun ki kontinyen santi zot enkyet oubyen sagren pour en kantite letan i kapab bezwen led en dokter. Pour plis lenformasyon vwar Latour Veyer No. 1 2023.