Nou pa zanmen tousel

1-2. (a) Akoz nou kapab dir ki nou pa zanmen tousel ler nou fer fas avek problenm? (b) Ki nou pou vwar dan sa lartik?

LER nou fer fas avek bann problenm grav, i kapab ki nou santi konmsi nou dan en tanpet lo lanmer e nou tousel dan en pti bato. Me nou pa tousel. Nou Papa ki dan lesyel i kontan nou e i pa zis vwar sa ki nou pe pas ladan me i osi promet ki i pou ed nou pandan sa bann moman. Zeova i promet son bann serviter ki fidel: “Mon pou ed ou.”—Iza. 41:10.

² Dan sa lartik, nou pou vwar ki mannyer Zeova i ed nou (1) par gid nou, (2) par donn nou sa ki nou bezwen, (3) par protez nou e (4) par rekonfort nou. Zeova i asir nou ki nenport problenm ki nou fer fas avek, i pa pou zanmen oubliy nou e i pa pou zanmen abandonn nou. Alor nou pa zanmen tousel.

ZEOVA I GID NOU

3-4. Ki mannyer Zeova i gid nou? (Psonm 48:14)

³ Lir Psonm 48:14. Zeova pa ekspekte ki nou gid nou prop lekor. Ki mannyer Zeova i gid son bann serviter fidel ozordi? En fason ki i fer sa i atraver Labib. (Ps. 119:105) Atraver son Parol, Zeova i ed nou pour fer bann desizyon e pour devlop bann kalite ki pou ed nou pli zwaye la konmela e pour ganny lavi eternel dan lavenir.a Par egzanp, i ansenny nou pour pa gard rankin, pour onnet dan tou sa ki nou fer e pour kontan lezot en kantite avek tou nou leker. (Ps. 37:8; Ebr. 13:18; 1 Pyer 1:22) Ler nou demontre sa bann zoli kalite, nou vin bann pli bon paran, bann pli bon konzwen e bann pli bon zanmi.

⁴ Dan Labib, Zeova in enkli leksperyans bann dimoun ki’n annan bann problenm ek santiman ki en pe parey avek sa ki pour nou. (1 Kor. 10:13; Zak 5:17) Ler nou lir konsernan lavi sa bann dimoun e nou aplik sa ki nou aprann, nou ganny byenfe dan omwen de fason. Premyerman, nou realize ki nou pa tousel, ki i annan lezot ki’n fer fas avek bann sityasyon en pe parey sa ki pour nou e zot in andire avek led Zeova. (1 Pyer 5:9) Dezyenmman, nou aprann ki mannyer pour fer fas avek nou problenm.—Rom. 15:4.

5. Lekel ki Zeova i servi pour gid nou?

⁵ Zeova in osi fer laranzman pour nou bann frer ek ser dan kongregasyon gid nou.b Par egzanp, sirveyan rezyonal i vizit nou kongregasyon regilyerman pour ankouraz nou. Son diskour i ed nou pour fer nou lafwa vin pli for e pour reste ini avek kanmarad. (Akt 15:40–16:5) Bann ansyen osi i travay dir pour ed sakenn parmi nou pour reste pros avek Zeova. (1 Pyer 5:2, 3) Bann paran i ansenny zot zanfan pour kontan Zeova, ansenny zot ki mannyer pour fer bann desizyon saz e pour devlop bann bon labitid. (Prov. 22:6) Bann ser matir i ed bann ser ki pli zenn par vin en bon legzanp, par donn bann konsey pratik e par ankouraz zot.—Tit 2:3-5.

6. Ki nou bezwen fer pour benefisye avek gidans Zeova?

⁶ Zeova i fer son par e i donn nou sa gidans ki nou bezwen. Me ki mannyer nou kapab montre ki nou apresye sa ki i’n fer pour nou? Proverb 3:5, 6 i dir: “Annan konfyans dan Zeova avek tou ou leker e pa bezwen depan lo ou prop lentelizans.” Ler nou fer sa, Zeova “pou fer [nou] bann santye drwat,” setadir i pou ed nou evit en kantite problenm e nou pou pli zwaye. Pa nou vreman rekonesan ki Zeova i konn nou vreman byen! I sitan kontan nou ki i donn sakenn parmi nou bann konsey ki nou bezwen.—Ps. 32:8.

ZEOVA I DONN NOU SA KI NOU BEZWEN

7. Ki serten fason Zeova i donn nou sa ki nou bezwen? (Filipyen 4:19)

⁷ Lir Filipyen 4:19. Parey nou’n vwar, Zeova i gid nou me i osi beni zefor ki nou fer pour ganny manze ek lenz ki nou bezwen e pour ganny en landrwa reste. (Mat. 6:33; 2 Tesa. 3:12) Menm si i normal pour enkyet konsernan ki mannyer nou pou ganny bann keksoz ki nou bezwen, Zeova i ankouraz nou pour pa tro enkyet konsernan sa bann keksoz. (Vwar not letid dan Matye 6:25.) Akoz? Zeova nou Papa, pa pou zanmen abandonn son bann serviter fidel dan bann moman ki zot bezwen led. (Mat. 6:8; Ebr. 13:5) Nou kapab annan konfyans dan li, ler i dir ki i pou pran swen avek nou.

8. Ki Zeova ti fer pour David?

⁸ Reflesir lo lafason ki Zeova ti ed David. Pandan bann lannen difisil ki David ti pe kasyet akoz Sail ti anvi touy li, Zeova ti donn David ek son bann zonm sa ki zot ti bezwen pour viv. Ler David ti reflesir lo lafason ki Zeova ti pran swen avek li pandan sa bann lannen, David ti dir: “Mon ti zenn e aprezan mon’n vin vye, me mon pa’n zanmen vwar okenn dimoun ki fer sa ki byen ganny abandonnen, ni son zanfan pe rod dipen.” (Ps. 37:25) Parey David, i tre probab ki ou osi ou’n vwar lafason ki Zeova in donn son bann serviter fidel sa ki zot bezwen.

9. Dan nou letan, ki mannyer Zeova i donn son pep sa ki zot bezwen ler i annan en dezas? (Vwar portre.)

⁹ Zeova i osi donn son bann serviter sa ki zot bezwen ler i annan en dezas. Par egzanp, ler i ti annan en lafamin dan premye syek, bann Kretyen sorti dan diferan landrwa ti anvoy bann keksoz pour bann lezot Kretyen ki ti dan bezwen. (Akt 11:27-30; Rom. 15:25, 26) Dan nou letan, pep Zeova i demontre sa menm kalite zenerozite anver zot bann frer ek ser ki dan bezwen. Ler i annan en dezas, Zeova i motiv son pep pour donn bann keksoz parey manze, delo, lenz ek latizann pour bann ki pe viv dan bann landrwa kot sa dezas in arive. Bann lekip konstriksyon i fer reparasyon lo bann lakour ek Lasal Rwayonm ki’n ganny andomaze. Bann serviter Zeova pa tarde pour donn rekonfor ek lankourazman sorti dan Labib avek bann ki’n perdi zot lakour oubyen ki’n perdi en dimoun ki zot kontan.c

10-11. Ki ou aprann avek leksperyans Borys?

¹⁰ Zeova i osi demontre zenerozite anver bann dimoun ki pa ankor vin enn son serviter par donn zot sa ki zot bezwen. Dan menm fason, nou rod loportinite pour demontre labonte anver bann ki pa servi Zeova. (Gal. 6:10) Ler nou fer sa, sa i kapab donn en bon temwannyaz. Annou vwar leksperyans Borys ki reste Likrenn e ki direkter dan en lekol. Menm si Borys pa en Temwen Zeova, in toultan demontre labonte ek respe anver bann etidyan dan son lekol ki Temwen Zeova. Ler i ti annan lager dan sa vilaz kot Borys ti reste, Borys ti deside pour kit sa landrwa e al reste dan en lot landrwa dan sa pei ki pli an sekirite. Bann frer ti ed li pour fer sa. Pli tar, Borys ti asiste Memoryal. Ler Borys i mazin tou sa ki bann frer in fer pour li, i dir: “Bann Temwen Zeova ti tret mwan byen e pran swen avek mwan. Mon rekonesan anver zot.”

¹¹ Nou osi nou kapab swiv legzanp nou Papa ki dan lesyel ki demontre konpasyon par demontre lanmour anver bann ki dan bezwen, ki swa zot servi Zeova oubyen non. (Lik 6:31, 36) Nou swete ki sa lanmour ki nou demontre anver lezot pou ed zot pour anvi vin bann disip Kris. (1 Pyer 2:12) Ki swa sa bann dimoun i swazir pour servi Zeova oubyen non, nou pou zwaye parski i annan plis lazwa pour donnen.—Akt 20:35.

ZEOVA I PROTEZ NOU

12. Ki mannyer Zeova pou protez son pep konman en group? (Psonm 91:1, 2, 14)

¹² Lir Psonm 91:1, 2, 14. Ozordi Zeova i promet pour protez son pep kont okenn keksoz ki kapab gat zot lanmitye avek li. I pa pou zanmen les Satan anpes son pep ador li dan sa fason ki li, i aprouve. (Zan 17:15) Pandan “gran ladetres,” nou kapab asire ki Zeova pou gard son promes e i pou protez son pep spirityelman e osi fizikman.—Rev. 7:9, 14.

13. Ki lezot fason Zeova i protez nou endividyelman?

¹³ Ki mannyer Zeova i protez nou endividyelman? Atraver Labib, Zeova i ed nou pour konnen kwa ki byen e kwa ki mal. (Ebr. 5:14) Ler nou aplik sa ki nou aprann dan Labib, nou protez nou lanmitye avek Zeova e nou osi fer bann bon desizyon ki ed nou pour pli zwaye e pli an bonn sante. (Ps. 91:4) Osi, Zeova i protez nou atraver kongregasyon. (Iza. 32:1, 2) Nou bann frer ek ser dan kongregasyon i kontan Zeova e zot obeir li. Alor ler nou pas letan avek zot kot Lasal Rwayonm, dan predikasyon e dan moman detant, sa i ankouraz nou e i donn nou sa lafors pour reziste bann move lenfliyans.—Prov. 13:20.

14. (a) Akoz Zeova i permet ki nou pas dan problenm? (b) Ki Psonm 9:10 i fer nou asire? (Vwar not.)

¹⁴ Dan lepase, Zeova ti parfwa protez son serviter e anpes zot ganny dimal oubyen ganny touye. Me i pa ti toultan fer sa. Parfwa nou soufer akoz bann levennman ki nou pa pe ekspekte. (Ekle. 9:11) Osi, tou dilon listwar, Zeova in permet son bann serviter ganny persekite oubyen menm ganny touye pour montre ki Satan i en manter. (Zob 2:4-6; Mat. 23:34) Zis parey sa bann keksoz ti arive avek bann serviter Zeova dan lepase, sa bann keksoz i osi kapab arive avek nou. Menm si Zeova pa rezourd nou bann problenm, nou kapab asire ki Zeova pa pou zanmen abandonn bann ki kontan li.d—Ps. 9:10.

ZEOVA I REKONFORT NOU

15. Ki mannyer lapriyer, Parol Bondye ek nou bann frer ek ser i rekonfort nou? (2 Korentyen 1:3, 4)

¹⁵ Lir 2 Korentyen 1:3, 4. Parfwa nou fer fas avek bann sityasyon ki fer nou soufer, enkyet oubyen vreman sagren. Petet ou pe pas dan en sityasyon vreman difisil ki fer ou santi ou tousel. Eski i annan en dimoun ki konpran ki mannyer ou pe santi? Zeova i konpran ou. I pa zis santi nou douler me i osi “rekonfort nou dan tou nou bann difikilte.” Ki mannyer i fer sa? Ler nou sipliy Bondye dan lapriyer, Bondye i donn nou “lape Bondye ki depas tou sa ki nou kapab konpran.” (Fili. 4:6, 7) Ler nou lir parol Zeova ki dan Labib, sa i rekonfort nou. Dan Labib, Zeova i dir nou ki kantite i kontan nou, i ansenny nou ki mannyer pour vin saz e i donn nou lespwar. Ler nou al renyon, nou ganny rekonforte parski nou aprann bann keksoz ankourazan sorti dan Labib e nou pas letan avek nou bann frer ek ser ki kontan nou.

16. Ki ou aprann avek leksperyans Nathan ek Priscilla?

¹⁶ Annou vwar lafason ki Zeova i rekonfort nou e ankouraz nou atraver son Parol Labib. Nou pou vwar sa atraver leksperyans Nathan ek Priscilla ki reste Leta-z-ini Lanmerik. Detrwa lannen pase, Nathan ek Priscilla ti deside pour al reste dan en pei kot i ti annan bezwen pour plis proklanmater. Nathan i dir: “Nou ti annan konfyans ki Zeova ti pou beni nou zefor.” Me apre ki zot ti’n konmans zot nouvo servis, zot ti ganny bann problenm lasante ki zot pa ti pe ekspekte e zot ti vwar li difisil pour trouv en louvraz ki ti pou ed zot ganny sa ki zot bezwen. Pli tar sa koup ti bezwen retourn kot zot e laba zot ti kontinyen annan problenm larzan. Nathan i dir: “Mon ti mazinen akoz Bondye pa ti’n beni nou parey mon ti krwar i ti pou’n fer. Mon ti menm konmans demande si mon ti’n fer en keksoz mal.” Avek letan, Nathan ek Priscilla ti realize ki Bondye pa ti’n abandonn zot. Nathan i dir: “Pandan sa bann letan difisil, Labib ti parey en zanmi saz ki ti pe ankouraz nou e gid nou. Ler nou ti konsantre lo lafason ki Zeova ti ed nou pour andire, olye konsantre lo nou problenm, sa ti ed nou pour asire ki Zeova ti pou kontinyen ed nou dan lavenir.”

17. Ki mannyer en ser ki apel Helga ti ganny rekonforte? (Vwar portre.)

¹⁷ Nou bann frer ek ser i kapab rekonfort nou dan lezot fason. Ki mannyer sa? Annou vwar leksperyans Helga, ki reste Laongri. Pour plizyer dizenn lannen, Helga ti fer fas avek bann problenm vreman grav ki ti fer li enkyet e santi ki i pa vo nanryen. Me ler i mazin sa bann moman, i realize ki Zeova ti pe servi bann frer ek ser dan kongregasyon pour rekonfort li. Helga i dir: “Zeova in toultan ed mwan ler i ti vwar ki mon anba presyon akoz mon travay, akoz mon pe pran swen avek mon zanfan ki malad e akoz lezot problenm. Pandan sa dernyen 30 an, mon’n vwar ki toulezour, Zeova in gard son promes e in rekonfort mwan. Souvandfwa in ankouraz mwan atraver bann parol ankourazan ki lezot in dir mwan. Mon ti souvan ganny en mesaz, en kart oubyen bann frer ek ser ti felisit mwan zis ler mon ti bezwen.”

18. Ki mannyer nou kapab rekonfort lezot?

¹⁸ Nou annan sa privilez pour swiv legzanp nou Bondye e rekonfort lezot. Ki mannyer nou kapab fer sa? Nou kapab pran letan pour ekout zot, konsol zot e ed zot dan bann fason pratik. (Prov. 3:27) Nou fer zefor pour rekonfort tou bann ki pe soufer, enkli bann ki pa ankor konmans servi Zeova. Ler nou vwar en dimoun ki vreman sagren, ki malad oubyen ki enkyet, nou vizit zot, nou ekout zot e nou partaz avek zot en verse Labib ki ankourazan. Ler nou swiv legzanp Zeova, sa Bondye “ki donn rekonfor dan tou sityasyon,” nou pou kapab ed nou bann frer ek ser pour fer fas avek zot problenm e nou pou osi motiv bann ki pa pe servi Bondye pour anvi aprann konsernan li.—Mat. 5:16.

ZEOVA I TOULTAN LA POUR NOU

19. Ki Zeova i fer pour nou e ki mannyer nou kapab swiv son legzanp?

¹⁹ Zeova i vreman enterese avek tou bann ki kontan li. I pa abandonn nou ler nou annan problenm. Zis parey en paran i pran swen avek son zanfan, Zeova i pran swen avek son bann serviter fidel. I gid nou, donn nou sa ki nou bezwen, protez nou e rekonfort nou. Nou swiv legzanp nou Papa ki dan lesyel ki kontan nou, ler nou ed e ankouraz lezot ler zot dan problenm. Menm si nou pas dan bann difikilte oubyen nou dan lapenn, nou kapab asire ki Zeova i avek nou. Apre tou, Zeova in promet nou: “Pa bezwen per, parski mon avek ou.” (Iza. 41:10) Alor nou kapab asire ki nou pa zanmen tousel!