Zenn frer, swiv legzanp Mark ek Timote

1-2. Kwa ki ti’n kapab anpes Mark ek Timote fer plis dan servis Zeova?

ZENN frer, eski ou anvi fer plis dan servis Zeova e ed bann frer ek ser dan kongregasyon plis? Nou asire ki sanmenm sa ki ou anvi fer. Nou vreman kontan pour vwar sa kantite zenn frer ki pare pour ed lezot. (Ps. 110:3) Me i annan serten keksoz ki kapab fer li difisil pour ou fer plis. Par egzanp, eski ou ezite pour fer plis dan predikasyon parski ou pa konnen ki mannyer ou lavi pou ete oubyen kote Zeova i anvi ou ale? Oubyen eski ou pa ti aksepte en responsabilite dan servis Zeova parski ou pa ti asire si ou pou kapab desarz sa responsabilite byen? Si ou’n deza santi koumsa, ou pa tousel.

² Mark ek Timote ti annan sa bann menm santiman. Me zot pa ti les lefet ki zot pa konnen ki mannyer zot lavi ti pou ete oubyen lefet ki zot napa leksperyans, anpes zot ed lezot. Ler zapot Pol ek Barnabas ti envit Mark pour vwayaz avek zot konman en misyonner, i kapab ki Mark ti ankor pe reste avek son manman dan en lakour konfortab. (Akt 12:12, 13, 25) Mark ti pare pour kit son lakour pour li kapab fer plis pour Zeova. Premyerman, i ti al reste Antyos. Apre i ti vwayaz avek Pol ek Barnabas dan bann landrwa ki ti lwen avek son lakour. (Akt 13:1-5) Parey Mark, i kapab ki Timote ti pe reste avek son paran ler Pol ti envit li pour zwenn ansanm avek li dan predikasyon. Timote ti zenn e i ti napa leksperyans. Alor, i kapab ki i ti santi ki i pa ti ase kalifye pour al avek Pol. (Konpar 1 Korentyen 16:10, 11 ek 1 Timote 4:12.) Me i ti aksepte lenvitasyon Pol e sa ti fer ki i ti ganny en kantite benediksyon.—Akt 16:3-5.

3. (a) Ki mannyer nou konnen ki Pol ti apresye Mark ek Timote? (2 Timote 4:6, 9, 11) (Vwar portre.) (b) Ki kestyon nou pou vwar dan sa lartik?

³ Menm si Mark ek Timote ti ankor zenn, zot ti aprann ki mannyer pour desarz plizyer responsabilite dan kongregasyon. Pol ti sitan apresye sa bann zenn frer ki pli tar ler i ti realize ki i ti pe al mor, i ti anvi ki zot la avek li. (Lir 2 Timote 4:6, 9, 11.) Ki bon kalite ki Mark ek Timote ti annan ki ti fer Pol kontan zot e annan konfyans dan zot? Ki mannyer bann zenn frer i kapab swiv legzanp sa de frer? Ki mannyer konsey ki Pol ti donnen i kapab ed bann zenn frer ozordi?

SWIV LEGZANP MARK E PARE POUR SERVI

4-5. Ki mannyer Mark ti montre ki i ti pare pour servi lezot?

⁴ Dapre en liv referans, servi lezot i kapab vedir ki nou travay dir pour ed lezot e nou kontinyen ed zot menm ler i difisil pour fer li. I sanmenm sa ki Mark ti fer. Ler Pol pa ti oule anmenn Mark lo son dezyenm vwayaz misyonner, i tre probab ki sa ti bles santiman Mark e i ti dezapwente. (Akt 15:37, 38) Me sa pa ti anpes Mark servi son bann frer ek ser.

⁵ Mark ti al avek son kouzen Barnabas pour al servi dan en lot landrwa. Apepre 11 an pli tar ler Pol ti dan prizon pour premye fwa an Ronm, Mark ti parmi bann ki ti la pour ankouraz li. (Filem. 23, 24) Anfet Pol ti sitan apresye sipor Mark ki i ti dir ki Mark i “en gran sours rekonfor.”—Kol. 4:10, 11.

6. Ki byenfe Mark ti gannyen ler i ti pas letan avek bann Kretyen matir? (Vwar not.)

⁶ Sa letan ki Mark ti pase avek bann frer ek ser matir ti fer ki i ti ganny en kantite byenfe. Apre ki i ti’n pas en pe letan avek Pol an Ronm, Mark ti al Babilonn pour travay ansanm avek zapot Pyer. Zot ti vin sitan pros ki Pyer ti refer avek Mark konman “Mark mon garson.” (1 Pyer 5:13) Anmezir zot ti travay ansanm, i tre probab ki Pyer ti rakont Mark bann detay enteresan konsernan lavi Zezi ek bann keksoz ki Zezi ti fer dan predikasyon. I sanmenm sa bann detay ki Mark ti ekrir dan sa Levanzil ki annan son non.a

7. Ki mannyer en frer ki apel Seung-Woo ti swiv legzanp Mark? (Vwar portre.)

⁷ Mark ti reste bizi dan son servis pour Zeova e i ti reste pros avek bann frer matir. Ki mannyer ou kapab swiv legzanp Mark? Si ou pa’n ganny en responsabilite ki ou ti ava kontan dan servis Zeova, pa bezwen dekouraze. O kontrer, kontinyen rod lezot fason ki ou kapab servi Zeova e ed lezot dan kongregasyon. Sanmenm ki ti arive avek Seung-Woo ki aprezan i en ansyen. Ler Seung-Woo ti ankor zenn, i ti abitye konpar son lekor avek lezot zenn frer. Serten sa bann frer ti’n ganny serten privilez dan kongregasyon avan Seung-Woo. Sa ti fer li santi ki personn pa ti remark bann bon keksoz ki i ti pe fer. Pli tar, i ti dir bann frer matir konsernan lafason ki i ti pe santi. En ansyen ti sizere ki i fer sa ki i kapab pour ed lezot menm si parfwa lezot pa vwar sa ki i pe fer. Seung-Woo ti aplik sa konsey e i ti konmans ed bann frer ek ser aze ek lezot ki ti bezwen transpor pour vin renyon. Ler Seung-Woo i mazin sa ki’n pase, i dir: “Mon’n konpran pli byen ki i vedir pour servi lezot. Mon ti vreman zwaye parski mon ti pe ed lezot dan bann fason pratik.”

SWIV LEGZANP TIMOTE E DEMONTRE LENTERE DAN LEZOT

8. Akoz Pol ti swazir Timote pour vwayaz avek li? (Filipyen 2:19-22)

⁸ Pol ti bezwen bann frer ki ti annan kouraz pour vwayaz avek li ler i ti retourn dan bann lavil kot i ti’n ganny persekite. Premyerman, i ti swazir en Kretyen eksperyanse ki ti apel Silas pour vwayaz avek li. (Akt 15:22, 40) Pli tar, i ti osi swazir Timote pour zwenn ansanm avek li. Akoz Pol ti swazir Timote? Enn bann rezon i akoz Timote ti annan en bon repitasyon. (Akt 16:1, 2) I ti osi vreman enterese avek lezot.—Lir Filipyen 2:19-22.

9. Ki mannyer Timote ti montre ki i ti vreman enterese avek bann frer ek ser?

⁹ Depi ki Timote ti konmans travay avek Pol, Timote ti montre ki i ti met lentere lezot avan sa ki pour li. I pour sa rezon ki Pol ti annan konfyans dan Timote e i ti kit Timote dan lavil Bere pour ankouraz bann nouvo disip laba. (Akt 17:13, 14) San dout pandan sa letan, Timote ti aprann en kantite keksoz avek Silas, ki li osi i ti’n reste dan lavil Bere. Me pli tar Pol ti anvoy Timote li tousel dan lavil Tesalonik pour li ankouraz bann Kretyen laba. (1 Tesa. 3:2) Pandan sa prosen 15 an, Timote ti aprann pour “plere avek bann ki plere” setadir i ti konpran santiman bann ki ti pe soufer. (Rom. 12:15; 2 Tim. 1:4) Ki mannyer bann zenn frer i kapab swiv legzanp Timote?

10. Ki mannyer en frer ki apel Woo Jae ti aprann pour demontre plis lentere dan lezot?

¹⁰ En frer ki apel Woo Jae ti aprann pour demontre plis lentere dan lezot. Ler Woo Jae ti pli zenn, i ti vwar li difisil pour koz avek bann frer ek ser ki pli aze. Alor ler i ti vwar zot kot Lasal Rwayonm, i ti zis dir zot alo e apre vire e ale. En ansyen ti sizere ki Woo Jae i konmans bann konversasyon avek bann frer ek ser par dir zot sa ki i apresye avek zot. Sa ansyen ti osi ankouraz li pour reflesir lo kwa ki kapab enteres sa dimoun. Woo Jae ti fer sa ki sa ansyen ti’n dir li. Ozordi, Woo Jae i en ansyen e i dir: “Aprezan, mon vwar li pli fasil pour koz avek bann dimoun ki annan diferan laz. Mon kontan parski aprezan mon kapab konpran pli byen bann problenm ki lezot i pas ladan. Sa in ed mwan pour konnen ki mon bann frer ek ser i bezwen e ki mon kapab fer pour ed zot.”

11. Ki mannyer bann zenn frer i kapab aprann pour demontre lentere dan bann frer ek ser dan zot kongregasyon? (Vwar portre.)

¹¹ Zenn frer, ou osi ou kapab aprann pour demontre lentere dan lezot. Ler ou kot Lasal Rwayonm, koz avek tou sort kalite dimoun, enkli bann ki pli aze e bann ki pli zenn. Demann zot konman zot sava e apre ekout zot. Sa pou ed ou konnen ki mannyer ou kapab ed zot. I kapab ki pandan sa bann konversasyon, ou aprann ki en koup aze i bezwen led pour servi JW Library^®. Oubyen ou kapab aprann ki zot pa’n fer laranzman pour travay avek en dimoun dan predikasyon. Petet ou kapab montre zot ki mannyer pour servi zot lekipman elektronik oubyen ou kapab fer laranzman pour al avek zot dan predikasyon. Ler ou pran linisyativ pour ed lezot, ou pou vin en bon legzanp dan predikasyon.

KI MANNYER KONSEY POL I KAPAB ED OU?

12. Ki byenfe en zenn frer i kapab gannyen avek konsey ki Pol ti donn Timote?

¹² Pol ti donn Timote konsey pour ed li annan en lavi ki pli zwaye e pour servi Zeova pli byen. (1 Tim. 1:18; 2 Tim. 4:5) Si ou en zenn frer, konsey Pol i kapab ed ou osi. Ki mannyer? Lir sa de let ki Pol ti ekrir pour Timote konmsi Pol ti’n ekrir sa de let pour ou e vwar ki mannyer ou kapab aplik sa bann konsey ki Pol ti donnen. Annou vwar serten sa bann konsey.

13. Kwa ki pou ed ou pour pli fidel avek Zeova?

¹³ “Antrenn ou lekor e fer li ou lobzektif pour devlop devosyon pour Bondye.” (1 Tim. 4:7b, not.) Kisisa devosyon pour Bondye? En dimoun ki annan devosyon pour Bondye i annan en bon lanmitye avek Bondye, i fidel e i vreman anvi fer Bondye plezir. Ler nou’n ne, nou napa devosyon pour Bondye. Alor, nou bezwen devlop sa kalite. Nou kapab konpran sa avek sa ki Pol ti dir. Sa mo Grek ki’n ganny tradwi “antrenn ou lekor” i souvan ganny servi pour dekrir sa lantrennman entans ki en atlet i fer pour prepar li pour en konpetisyon. Sa bann atlet i bezwen disiplin zot lekor. Nou osi nou bezwen disiplin nou lekor pour nou kapab devlop bann labitid ki pour fer nou vin pli pros avek Zeova.

14. Ler nou pe lir Labib, kwa ki devret nou lobzektif? Donn en legzanp.

¹⁴ Anmezir ki ou devlop sa labitid pour lir Labib, gard antet ki ou lobzektif i pour vin pli pros avek Zeova. Par egzanp, ki ou kapab aprann avek sa resi konsernan ler Zezi ti koz avek en zenn dirizan ki ti ris? (Mark 10:17-22) Sa zenn dirizan ti krwar ki Zezi i Mesi me i ti napa ase lafwa. Alor i pa ti vin en disip. Kantmenm sa, Zezi “ti kontan li.” Pa i vreman tousan lafason ki Zezi ti koz avek sa zenn dirizan. I kler ki Zezi ti anvi i fer en desizyon saz. Lafason ki Zezi ti santi anver sa zenn garson i egzakteman lafason ki Zeova ti santi anver sa garson. (Zan 14:9) Anmezir ki ou reflesir lo sa resi e lo ou sirkonstans, demann ou lekor: ‘Ki mon bezwen fer pour vin pli pros avek Zeova e pour ed lezot plis?’

15. Akoz i enportan pour en zenn frer kit en bon legzanp pour lezot? Eksplike. (1 Timote 4:12, 13)

¹⁵ “Vin en legzanp pour sa bann ki fidel.” (Lir 1 Timote 4:12, 13.) Pol ti ankouraz Timote pour devlop bann abilite parey abilite pour lir e ansennyen me i ti osi ankouraz li pour devlop bann kalite parey lanmour, lafwa ek lapirte. Akoz? Parski sa ki en dimoun i fer i pli enportan ki sa ki i dir. Par egzanp, meton, ou ganny demande pour fer en diskour konsernan ki mannyer pour pli devoue dan predikasyon. I pou pli fasil pour ou fer sa diskour si ou menm, ou pe deza donn ou meyer dan predikasyon. Ou lodyans pou pli pare pour aplik sa ki ou pe dir si zot vwar ki ou deza en legzanp dan predikasyon.—1 Tim. 3:13.

16. (a) Ki senk domenn en zenn frer i kapab vin en legzanp? (b) Ki mannyer en zenn frer i kapab vin en legzanp dan son “fason koze”?

¹⁶ Dan 1 Timote 4:12, Pol i koz lo senk domenn ki en zenn frer i kapab vin en bon legzanp. Petet ou kapab etidye sak sa bann domenn dan ou letid personnel. Par egzanp, meton ou anvi vin en bon legzanp dan ou “fason koze,” reflesir lo bann fason ki ou kapab ankouraz lezot par sa ki ou dir. Si ou ankor pe reste avek ou paran, petet ou kapab remersye zot pli souvan pour sa ki zot fer pour ou. Apre renyon, petet ou kapab dir en frer oubyen en ser ki’n annan en prezantasyon sa ki ou’n apresye dan son size. Ou kapab osi fer zefor pour donn en larepons dan ou prop mo. Bann zefor ki ou fer pour vin en legzanp dan ou fason koze pou montre ki ou pe progrese spirityelman.—1 Tim. 4:15.

17. Kwa ki pou ed en zenn frer pour atenn son bann lobzektif spirityel? (2 Timote 2:22)

¹⁷ “Sov lwen avek dezir bann zenn, me fer zefor pour devlop ladrwatir.” (Lir 2 Timote 2:22.) Pol ti ankouraz Timote pour lalit avek okenn dezir ki kapab anpes li atenn son lobzektif e gat son lanmitye avek Zeova. Petet ou realize ki ou pe pas tro bokou letan dan serten aktivite ki pa mal me ki fer ki ou napa ase letan pour fer bann aktivite spirityel. Par egzanp, reflesir lo lakantite letan ki ou pase pe fer sport, pe get keksoz lo Enternet oubyen pe zwe bann zwe video. Eski ou kapab servi serten sa letan pour fer plis pour Zeova e pour lezot? Petet ou kapab servi sa letan pour ede fer bann travay mentenans lo Lasal Rwayonm oubyen pour fer prezantwar. Si ou fer sa bann aktivite, i tre probab ki ou pou fer bann nouvo zanmi ki pou ed ou met e atenn bann lobzektif spirityel.

LER OU ED LEZOT, OU POU GANNY BANN BENEDIKSYON

18. Akoz nou kapab dir ki Mark ek Timote ti annan en lavi ki ti gou e satisfezan?

¹⁸ Mark ek Timote ti fer bann sakrifis pour zot kapab ed lezot plis e sa ti fer ki zot ti ganny bann zoli leksperyans. (Akt 20:35) Mark ti vwayaz dan diferan landrwa dan lemonn pour li kapab ed son bann frer ek ser. I ti osi ekrir en liv eksitan konsernan lafason ki Zezi ti viv son lavi e fer predikasyon. Timote ti ed Pol pour form bann nouvo kongregasyon e pour ankouraz bann frer ek ser. I kler ki Zeova ti vwar tou sa bann sakrifis ki Mark ek Timote ti fer pour fer plis pour li e sa ti fer Zeova plezir.

19. Akoz bann zenn frer i devret aplik konsey ki Pol ti donn Timote e ki pou arive si zot fer sa?

¹⁹ Atraver sa bann let ki Pol ti ekrir pour Timote, nou kapab vwar ki Pol ti kontan Timote. Zenn frer, atraver sa bann let, ou kapab vwar ki Zeova i kontan ou en kantite. I anvi ki ou zwaye dan son servis. Alor fer ou mye pour aplik konsey Pol e ed lezot plis. Si ou fer sa, ou pou annan en lavi ki gou la konmela e ou pou kapab “ganny sa vre lavi” dan lavenir.—1 Tim. 6:18, 19.