Eski ou ankor kapab aprann avek bann lansennyman de baz ki dan Labib?

1. Ki mannyer bann lansennyman ki dan Labib ti fer ou santi ler ou ti fek aprann laverite?

BANN keksoz ki nou’n aprann ler nou ti fek konmans etidye Labib in sanz nou lavi. Par egzanp, ler nou ti aprann ki Bondye i apel Zeova, sa ti fer nou konmans devlop en lanmitye avek li. (Iza. 42:8) Ler nou ti aprann sa ki vreman arive avek bann dimoun ki’n mor, nou ti nepli enkyet konsernan si bann dimoun ki nou kontan ki’n mor pe soufer. (Ekle. 9:10) Ler nou ti aprann ki Bondye in promet ki later pou vin en Paradi, nou ti nepli enkyet konsernan nou lavenir. Nou ti asire ki nou kapab viv pour touzour e pa zis pour en ptigin letan, setadir 70 oubyen 80 an.—Ps. 37:29; 90:10.

2. Ki mannyer 2 Pyer 1:12, 13 i montre ki menm bann Kretyen matir i bezwen kontinyen reflesir lo bann lansennyman de baz ki dan Labib?

² Nou pa devret zanmen oubliye ki bann lansennyman de baz ki dan Labib i enportan. Zapot Pyer ti ekri son dezyenm let pour bann Kretyen ki ti’n ‘byen etabli dan laverite.’ (Lir 2 Pyer 1:12, 13.) Me sa letan, sa bann Kretyen ti pe fer fas avek en danze dan kongregasyon. I ti annan bann fo ansenyan ek bann move dimoun ki ti pe esey fer zot kit laverite. (2 Pyer 2:1-3) Pyer ti anvi ankouraz son bann frer ek ser pour zot pa ganny anbete par bann mansonz ki sa bann dimoun ti pe ansennyen. Alor, i ti fer zot rapel serten lansennyman ki zot ti’n deza aprann. Sa bann lansennyman ti pou ed zot pour reste fidel avek Zeova ziska lafen.

3. Akoz tou Kretyen i devret kontinyen medit lo bann lansennyman de baz ki dan Labib? Donn en legzanp.

³ Anmezir ki nou vin bann Kretyen matir, nou kapab aprann bann nouvo keksoz avek bann lansennyman de baz ki dan Labib. Annou vwar en legzanp ki pou ed nou konpran sa. En kwizinyen eksperyanse ek en dimoun ki fek aprann kwi manze i kapab servi bann menm zengredyen de baz pour prepar en repa. Me avek letan, sa kwizinyen eksperyanse in aprann pour servi sa bann menm zengredyen dan diferan fason pour prepar bann nouvo repa ki vreman goute. Pareyman, bann serviter Zeova ki’n servi li pour en kantite letan ek bann etidyan Labib i kapab vwar bann menm laverite de baz dan diferan fason. Akoz? Parski i kapab ki nou sirkonstans oubyen bann responsabilite ki nou annan dan servis Zeova in sanze depi ki nou’n batize. Ler nou medit lo bann lansennyman ki nou’n aprann depi lontan, nou pou aprann bann nouvo keksoz ki nou kapab aplike dan nou lavi ozordi. Aprezan annou vwar sa ki bann Kretyen matir i kapab aprann avek trwa lansennyman de baz ki dan Labib.

ZEOVA I KREATER

4. Ler nou ti aprann ki Zeova i Kreater, ki lefe sa in annan lo nou?

⁴ Labib i dir ki “sa enn ki’n konstri tou keksoz i Bondye.” (Ebr. 3:4) Nou konnen ki en Kreater ki vreman saz e ki tou pwisan ki’n kree nou plannet ek tou sa ki lo la. I’n kree nou alor i konn tou keksoz lo nou. An plis ki sa, i enterese avek nou e i anvi sa ki pli bon pour nou. Ler nou konnen ki Zeova i Kreater, sa i annan en gran lefe lo lafason ki nou viv nou lavi e lo bann lobzektif ki nou mete.

5. Ki laverite ki kapab ed nou devlop limilite? (Izai 45:9-12)

⁵ Sa laverite konsernan lefet ki Zeova i Kreater, i kapab ansenny nou en leson konsernan limilite. Annou vwar legzanp Zob. Pour en serten letan, Zob ti konsantre tro bokou lo son lekor e lo lezot imen. Me Zeova ti fer li rapel ki i ti Kreater tou pwisan. (Zob 38:1-4) Sa ti ed Zob vwar ki fason fer Bondye i pli siperyer ki fason fer bann imen. Anliny avek sa, pli tar profet Izai ti dir: “Eski larzil i devret dir Potye: ‘Ki ou pe fer?’”—Lir Izai 45:9-12.

6. Kan ki i sirtou enportan ki nou reflesir lo ki degre saz e pwisan nou Kreater i ete? (Vwar portre.)

⁶ Anmezir en Kretyen i ganny plis leksperyans, sa i kapab fer li konmans depan tro bokou lo son prop lopinyon dan plas depan lo Zeova e lo Son Parol pour gid li. (Zob 37:23, 24) Me ki pou arive si en dimoun i reflesir lo lefet ki i napa personn ki pli saz e ki pli pwisan ki Son Kreater? (Iza. 40:22; 55:8, 9) Sa laverite fondamantal pou ed li pour kontinyen demontre limilite e pou ed li konpran ki fason panse Zeova i pli siperyer ki sa ki pour li.

7. Ki Rahela ti fer pour li kapab aksepte en nouvo lenstriksyon?

⁷ En ser ki apel Rahela ki reste Lasloveni in vwar ki ler i reflesir lo son Kreater, sa in ed li pour aksepte bann sanzman ki i’n annan dan lorganizasyon. I dir: “Parfwa i pa’n fasil pour mwan aksepte bann desizyon ki’n ganny fer par bann ki pe dirize dan lorganizasyon. Par egzanp, menm apre ki mon ti’n get Update #8 2023 Konsey Direkter, mon ti soke sa premye fwa ki mon ti vwar en frer avek labarb pe fer en diskour. Alor mon ti priy Zeova e demann li pour ed mwan pour adapte avek sa sanzman.” Rahela ti rekonnet ki konman Kreater lesyel ek later, Zeova i konn sa pli bon fason pour gid Son lorganizasyon. Si ou vwar li difisil pour aksepte en nouvo konprenezon oubyen en nouvo lenstriksyon, petet ou kapab pran letan pour reflesir lo ki kantite saz e pwisan ou Kreater i ete.—Rom. 11:33-36.

AKOZ BONDYE I PERMET SOUFRANS?

8. Ki byenfe nou’n gannyen ler nou’n aprann akoz Zeova i permet soufrans?

⁸ Akoz Bondye i permet soufrans? Serten dimoun ki pa’n trouv larepons pour sa kestyon in ankoler avek Bondye oubyen zot krwar ki Bondye pa egziste. (Prov. 19:3) De lot kote, ou’n aprann ki dimoun i soufer akoz pese ki nou’n erite ek lenperfeksyon e pa akoz Zeova in fer en keksoz mal. Ou’n osi aprann ki pasyans ki Zeova i demontre anver bann imen in fer li posib pour plizyer milyon dimoun aprann konn li e aprann pour zot menm ki Zeova pou fer pour ki i nepli annan soufrans. (2 Pyer 3:9, 15) Sa bann laverite in rekonfort ou e i’n fer ou vin pli pros avek Zeova.

9. Kan ki nou kapab sirtou bezwen reflesir lo akoz Zeova i permet soufrans?

⁹ Nou konnen ki nou bezwen annan pasyans anmezir ki nou esper Zeova met en lafen avek soufrans. Me ler en dimoun ki nou kontan i mor oubyen nou ouswa nou fanmir i pas dan problenm oubyen nou ganny trete dan en fason enzis, i kapab ki nou demande akoz Zeova pa pe azir pli vitman. (Aba. 1:2, 3) Dan bann moman koumsa, i ti pou saz ki nou reflesir lo bann rezon akoz Zeova i permet ki bann bon dimoun i soufer.a (Ps. 34:19) Nou kapab osi reflesir lo lefet ki i pou met en lafen avek soufrans, enn fwa pour tou.

10. Kwa ki’n ed Anne pour fer fas avek lanmor son manman?

¹⁰ Ler nou konnen akoz Bondye i permet soufrans, sa i kapab ed nou pour andire. En ser ki apel Anne ki reste lo zil Mayot dan Losean Endyen, i dir: “Ler mon manman ti mor detrwa lannen pase, mon ti vreman sagren. Me tanzantan mon bezwen fer mon lekor rapel ki pa Zeova ki fer nou soufer. O kontrer, Zeova i vreman anvi met en lafen avek tou soufrans e i anvi resisit bann dimoun ki nou kontan ki’n mor. Ler mon medit lo sa bann laverite, sa i donn mwan en lape lespri ki souvandfwa mon pa pe ekspekte.”

11. Ki mannyer ler nou konnen akoz Zeova i permet soufrans, sa i kapab ed nou pour kontinyen fer predikasyon?

¹¹ Ler nou konn laverite lo akoz Bondye i permet soufrans, sa i kapab motiv nou pour kontinyen fer predikasyon. Apre ki Pyer ti’n eksplike ki Zeova i demontre pasyans parski i anvi dimoun i repantir e ganny sove, Pyer ti dir: “Gete ki kalite dimoun zot devret ete an sa ki konsern annan en kondwit sen ek bann aksyon ki demontre ki zot annan devosyon pour Bondye.” (2 Pyer 3:11) Enn ‘bann aksyon ki montre ki nou annan devosyon pour Bondye’ i ler nou partisip dan predikasyon. Parey nou Papa, nou kontan dimoun. Nou anvi ki zot viv dan nouvo lemonn Bondye kot dimoun pou fer sa ki byen. Zeova pe demontre pasyans e i pe donn bann dimoun dan ou teritwar en loportinite pour ador li. Pa i en privilez pour ou travay ansanm avek Bondye e pour ed maksimonm dimoun pour aprann konsernan Bondye avan lafen i arive!—1 Kor. 3:9.

NOU PE VIV DAN “BANN DERNYEN ZOUR”

12. Ki byenfe nou’n gannyen ler nou’n aprann ki nou pe viv dan “bann dernyen zour”?

¹² Sa ki Labib in dir konsernan lafason ki bann dimoun ti pou ete dan “bann dernyen zour” i vre. (2 Tim. 3:1-5) Nou zis bezwen get otour nou pour vwar ki mannyer sa profesi pe ganny akonplir. Nou vwar latitid ek konportman bann dimoun pe vin deplizanpli pir. Sa i fer nou pli asire ki Parol Bondye i diny konfyans.—2 Tim. 3:13-15.

13. An armoni avek sa legzanp ki Zezi ti donnen dan Lik 12:15-21, ki nou kapab demann nou lekor?

¹³ Ler nou konnen ki nou pe viv dan bann dernyen zour, sa i ed nou pour konsantre lo sa ki vreman irzan. Remark sa ki nou aprann konsernan sa, dan sa legzanp ki Zezi ti donnen dan Lik 12:15-21. (Lir.) Akoz sa zonm ris ti ganny dir ki i “enbesil”? I pa akoz i ti ris me akoz i ti napa sa bon priyorite. Sa zonm ti pe anmas “en trezor pour li menm, me [i] pa [ti] ris devan Bondye.” Kwa ki ti fer sa sityasyon sitan irzan? Bondye ti dir sa zonm: “Ozordi swar ou pou mor.” Ki mannyer sa legzanp i kapab ed nou? I napa bokou letan ki reste avan ki lafen i arive. Alor i ti pou byen ki nou demann nou lekor: “Eski bann lobzektif ki mon annan i montre ki mon pe konsantre lo sa ki vreman irzan? Ki kalite lobzektif mon pe ed mon zanfan pour mete? Eski mon pe servi mon lafors, letan ek keksoz materyel prensipalman pour anmas trezor pour mwan menm oubyen pour anmas trezor dan lesyel?”

14. Parey nou vwar atraver leksperyans Miki, akoz i saz pour nou medit lo bann levidans ki montre ki nou pe viv dan bann dernyen zour?

¹⁴ Ler nou reflesir lo lefet ki nou pe vreman viv dan bann dernyen zour, sa i kapab ed nou pour konnen ki sa pli bon fason pour viv nou lavi. Sanmenm ki ti arive avek en ser ki apel Miki. I dir: “Ler mon ti fini lekol, mon ti vreman anvi en karyer ki ti pou permet mwan pour etidye bann zannimo. Me mon ti osi anvi servi konman pionye ordiner e osi al servi dan en landrwa kot i annan bezwen pour plis proklanmater. Serten frer ek ser matir ti ankouraz mwan pour reflesir lo si i ti pou posib annan sa karyer ki mon anvi e an menm tan atenn mon bann lobzektif spirityel. Zot ti fer mwan rapel ki lafen sa lemonn i pros. Zot ti osi fer mwan rapel ki dan nouvo lemonn, mon ti pou kapab etidye tou bann zannimo ki mon anvi pour touzour. Alor mon ti deside pour al en lekol ki pa ti pou pran bokou letan e ki ti pou ansenny mwan bann keksoz pratik. Sa ti ed mwan pour trouv en louvraz ki ti permet mwan pour siport mon lekor pandan ki mon ti pe fer pionye ordiner e pli tar ler mon ti al reste Ekwador kot i ti annan bezwen pour plis proklanmater.” Aprezan Miki pe servi ansanm avek son msye ki en sirveyan rezyonal Ekwador.

15. Ki mannyer dimoun i kapab reazir anver sa bon nouvel? Donn en legzanp. (Vwar portre.)

¹⁵ Nou pa devret dekouraze ler dimoun pa aksepte sa bon nouvel. Parski dimoun i kapab sanze. Annou vwar legzanp Zak, ki ti demi frer Zezi. Zak ti vwar Zezi ler i ti pe grandi e i ti vwar ler Zezi ti pe akonplir bann profesi ki ti montre ki i ti Mesi. I ti osi vwar Zezi kot pe ansennyen e ki son fason ansennyen pa ti parey personn ki zot i’n deza tande. Malgre sa, pour plizyer lannen, Zak pa ti vin en disip Zezi. I ti vin en disip Zezi apre ki Zezi ti’n resisite. Anfet i ti vin en disip ki ti vreman devoue.b (Zan 7:5; Gal. 2:9) I vreman enportan ki nou pa aret koz lo sa bon nouvel avek bann manm nou fanmir ki pa ankor demontre lentere dan sa mesaz e ki nou pa aret pas kot bann dimoun ki oparavan pa’n aksepte sa mesaz Rwayonm. Rapel ki nou pe viv dan bann dernyen zour, alor sa travay predikasyon i irzan. Sa ki ou dir bann dimoun ozordi i kapab annan en lefe lo zot pli tar, petet menm apre ki gran ladetres in konmanse.c

KONTINYEN REKONESAN POUR BANN RAPEL KI ZEOVA I DONN NOU

16. Ki byenfe ou’n gannyen avek bann rapel ki Zeova i donn nou? (Vwar bwat “Servi bann laverite dan Labib pour ed lezot.”)

¹⁶ Serten manze spirityel ki nou gannyen i ganny prepare pour bann dimoun ki pa’n zanmen tann bann lansennyman de baz ki dan Labib. Par egzanp, sa diskour piblik ki ganny fer tou le semenn, serten lartik ek video lo jw.org ek bann magazin piblik, i ganny prepare prensipalman pour bann dimoun ki pa Temwen Zeova. Kantmenm sa, nou kapab ganny bann byenfe avek sa bann rapel. Zot ed nou pour devlop plis lanmour pour Zeova, pour annan plis konfyans dan Son Parol e pour vin pli efikas ler nou pe ansenny lezot bann laverite de baz ki dan Labib.—Ps. 19:7.

17. Dan ki sityasyon ki nou kapab reflesir lo bann lansennyman de baz ki dan Labib?

¹⁷ Konman en Temwen Zeova, nou vreman kontan ler i annan en azisteman dan lafason ki nou konpran en laverite ki dan Labib. Me kantmenm sa, nou osi vreman rekonesan pour bann lansennyman de baz ki nou’n aprann depi lontan, ki’n fer nou vin pli pros avek Zeova. Parey nou’n aprann, sa bann laverite i ankor kapab ed nou. Si i arive ki nou konmans krwar ki nou lopinyon ek nou fason fer i pli meyer ki swiv lenstriksyon sorti kot lorganizasyon Zeova, nou kapab demontre limilite e rapel ki Zeova, nou Kreater ki saz e pwisan, ki pe diriz sa lorganizasyon. Ler nou oubyen en dimoun ki nou kontan pe pas dan difikilte, nou kapab demontre pasyans e medit lo akoz Zeova i permet soufrans. Osi, ler nou pe deside ki mannyer nou pou servi nou letan ek nou bann resours, nou kapab rapel ki nou pe viv dan bann dernyen zour e ki i pa reste bokou letan avan lafen i arive. Alor, ki bann rapel ki Zeova i donn nou i kontinyen ankouraz nou, motiv nou e fer nou vin saz.