Eski ou’n “aprann sekre” pour kontant ou?

1. Ki i vedir ler nou kontant nou avek sa ki nou annan e ki sa i pa vedir?

ESKI ou en dimoun ki kontant ou avek sa ki ou annan? En dimoun koumsa i zwaye e i anpe parski i apresye bann bon keksoz ki Zeova in donn li. I pa ankoler parski i napa serten keksoz. Menm si i satisfe avek sa ki i annan, sa pa vedir ki napa nanryen ki enportan pour li. Par egzanp, i pa mal pour en Kretyen fer zefor pour fer plis dan servis Zeova. (Rom. 12:1; 1 Tim. 3:1) Kantmenm sa, i pa perdi son lazwa si i pa ganny serten privilez vitman parey i ti pe ekspekte.

2. Ki i kapab arive si en dimoun pa kontant li avek sa ki i annan?

² En dimoun ki pa satisfe i kapab fer bann desizyon ki anmenn bann move konsekans. En dimoun koumsa i kapab travay en kantite erdtan pour ganny bann keksoz materyel ki i pa vreman bezwen. Malerezman detrwa Kretyen in menm vol larzan ek lezot keksoz ki zot ti anvi. Petet zot in dir zot lekor, ‘Mon merit sa keksoz,’ ‘Mon’n esper ase’ oubyen ‘Mon pou rann sa larzan apre.’ Me nenport fason ki en dimoun i vole, sa pa fer Zeova plezir e en dimoun ki fer sa i mank respe pour Zeova. (Prov. 30:9) I annan lezot ki’n sitan dezapwente ki zot pa’n ganny en responsabilite dan servis Zeova, ki zot in aret servi Zeova. (Gal. 6:9) Ki mannyer en serviter Zeova ki’n dedye son lavi avek li, i kapab fer en keksoz koumsa? I kapab ki ptitapti sa dimoun in aret kontant li avek sa ki i annan.

3. Ki laverite ankourazan nou aprann dan Filipyen 4:11, 12?

³ Nou tou nou kapab kontant nou avek sa ki nou annan. Zapot Pol ti dir: “Dan nenport ki sirkonstans, mon’n aprann pour kontant mwan avek sa ki mon annan.” (Lir Filipyen 4:11, 12.) Pol ti dir sa bann parol ler i ti dan prizon. Kantmenm sa, i pa ti’n perdi son lazwa. I ti’n “aprann sekre” pour kontant li avek sa ki i annan. Si nou vwar li difisil pour kontant nou avek sa ki nou annan, sa ki Pol ti dir ek son leksperyans i asir nou ki nou kapab devlop sa kalite. Nou pa devret ekspekte ki i pou fasil pour kontant nou avek nou sirkonstans. O kontrer nou bezwen aprann pour fer sa. Ki mannyer? Annou vwar bann kalite ki pou ed nou aprann sekre pour kontant nou avek sa ki nou annan.

FER ZEFOR POUR VIN PLI REKONESAN

4. Ki mannyer ler nou rekonesan sa pou ed nou pour kontant nou avek sa ki nou annan? (1 Tesalonisyen 5:18)

⁴ En dimoun ki rekonesan i pli pare pour kontant li avek sa ki i annan. (Lir 1 Tesalonisyen 5:18.) Par egzanp, ler nou rekonesan pour lefet ki nou annan sa ki nou bezwen, nou pa pou tro fatig nou avek bann keksoz ki nou anvi me ki nou napa. Ler nou rekonesan pour bann fason ki nou pe servi Zeova la konmela, nou pou konsantre lo donn nou meyer dan nou servis, dan plas kontinyen mazin en servis ki nou ti ava kontan. I pour sa rezon ki Labib i ankouraz nou pour remersye Zeova dan nou lapriyer. Ler nou rekonesan sa pou ed nou ganny “lape Bondye ki depas tou sa ki nou kapab konpran.”—Fili. 4:6, 7.

5. Akoz bann Izraelit ti’n devret rekonesan anver Zeova? (Vwar portre.)

⁵ Mazin sa ki ti arive avek bann Izraelit. Plizyer fwa, zot ti konplent avek Zeova parski zot ti anvi bann manze ki zot ti abitye manze Lezip. (Nom. 11:4-6) I vre ki lavi pa ti fasil ler zot ti dan dezer. Me kwa ki ti pou’n ed zot pour kontant zot avek sa ki zot annan? Zot ti’n devret reflesir e rekonesan pour tou sa ki Zeova ti’n fer pour zot. Ler zot ti Lezip, zot ti bann lesklav ki ti ganny trete dan en fason kriyel me Zeova ti anmenn dis fleo lo bann Ezipsyen. Apre ki zot ti’n ganny libere, zot ti “depouy bann Ezipsyen” e zot ti pran bann lobze annor, annarzan ek bann lenz. (Egz. 12:35, 36) Ler bann Ezipsyen ti tay avek bann Izraelit ziska kot Lanmer Rouz, Zeova ti fer en mirak e i ti ouver Lanmer Rouz. Pandan ki zot ti pe marse dan dezer, Zeova ti donn zot lamann toulezour. Me ki ti zot problenm? Bann Izraelit pa ti satisfe. I pa akoz zot ti napa manze me akoz zot pa ti rekonesan pour sa ki zot ti annan.

6. Kwa ki kapab ed nou pour vin pli rekonesan?

⁶ Kwa ki kapab ed ou pour pli rekonesan? Premyerman, fer letan toulezour pour reflesir lo bann bon keksoz ki ou annan. Petet ou kapab ekri de oubyen trwa keksoz ki ou rekonesan pour annan. (Lam. 3:22, 23) Dezyenmman, eksprim ou rekonesans. Pran linisyativ e remersye lezot pour bann keksoz ki zot fer pour ou. Pli enportan ki tou, remersye Zeova toulezour. (Ps. 75:1) Trwazyenmman, vin bon zanmi avek bann dimoun ki rekonesan. Si nou frekant dimoun ki rekonesan, zot pou annan en lenfliyans lo nou e nou kapab vin rekonesan. Me si nou frekant dimoun ki pa rekonesan, nou osi nou kapab vin parey zot. (Det. 1:26-28; 2 Tim. 3:1, 2, 5) Ler nou rod loportinite pour demontre nou rekonesans, nou pa pou tro konsantre lo nou bann problenm e lo bann keksoz ki nou napa.

7. Kwa ki ti ed Aci pour vin pli rekonesan e ki ti rezilta?

⁷ Annou vwar sa ki ti arive avek en ser ki apel Aci ki reste Lendonezi. Aci i dir: “Pandan pandemi COVID-19, mon ti konmans konpar mon sirkonstans avek sa ki pour lezot Kretyen. Sa ti fer ki mon pa ti zwaye.” (Gal. 6:4) Kwa ki ti ed li sanz son fason panse? I dir: “Mon ti konmans port latansyon lo bann bon keksoz ki mon ti gannyen sak zour e mon ti osi reflesir lo sa kantite bon keksoz ki mon ti gannyen akoz mon form parti lorganizasyon Bondye. Apre, mon ti remersye Zeova pour tou sa bann keksoz. Sa ti ed mwan pour vreman satisfe avek sa ki mon annan.” Si ou pa zwaye akoz ou sirkonstans, petet ou kapab fer en keksoz en pe parey pour ou kapab vin pli rekonesan.

RESTE KONSANTRE LO FER LAVOLONTE ZEOVA E DEMONTRE LIMILITE

8. Ki latrap Barouk ti tonm ladan?

⁸ Pour en pe letan, Barouk ki ti sekreter profet Zeremi, ti tonm dan en latrap. Barouk ti annan en responsabilite difisil. I ti bezwen siport Zeremi pandan ki Zeremi ti dir bann Izraelit ki pa ti rekonesan sa ki pou arive avek zot akoz zot ti’n dezobeir Zeova. Me i ti ariv en moman kot Barouk pa ti reste konsantre lo sa ki Zeova i anvi i fer. I paret ki i ti konmans mazin tro bokou lo son lekor e sa ki i ti anvi fer. Atraver profet Zeremi, Zeova ti dir Barouk: “Ou pe rod bann gran keksoz pour ou menm. Aret rod sa bann keksoz.” (Zer. 45:3-5) Andotmo, Zeova ti pe dir Barouk: “Kontant ou avek bann keksoz ki ou pe fer la konmela.” Barouk ti aksepte konsey e i ti kontinyen annan laprouvasyon Zeova.

9. Dapre 1 Korentyen 4:6, 7, ler nou annan limilite, ki sa pou ed nou konpran? (Vwar portre.)

⁹ Parfwa, en Kretyen i kapab santi ki i merite ganny en serten responsabilite. Petet i annan bokou abilite, i travay dir ouswa i eksperyanse. Oubyen i menm annan tou sa bann keksoz. Me kantmenm sa, lezot ki ganny sa responsabilite ki li i ti ava kontan. Kwa ki kapab ed li si sa i fer li ankoler? I kapab reflesir lo sa ki zapot Pol ti ekri dan 1 Korentyen 4:6, 7. (Lir.) Tou responsabilite ki nou gannyen e tou talan ki nou annan i sorti kot Zeova. Nou pa ganny sa bann kado akoz nou merite oubyen nou spesyal. Tou sa bann keksoz i en fason ki Zeova i demontre son labonte ekstraordiner anver nou.—Rom. 12:3, 6; Efe. 2:8, 9.

10. Ki mannyer nou kapab devlop limilite?

¹⁰ Nou kapab devlop limilite par reflesir lo legzanp ki Zezi in kite pour nou. Mazin sa ki ti arive sa zour swar ler Zezi ti lav lipye son bann zapot. Zapot Zan ti ekri: “Vi ki Zezi ti konnen [1] ki son Papa ti’n met tou keksoz dan son lanmen, [2] ki i ti sorti kot Bondye e [3] i ti pe retourn kot Bondye, i ti . . . konmans lav lipye son bann disip.” (Zan 13:3-5) Zezi ti’n kapab santi ki son bann disip ki ti merit lav son lipye. Zezi pa ti zanmen santi ki i merite annan en lavi pli konfortab oubyen annan plis larzan. (Lik 9:58) O kontrer i ti annan limilite e i ti kontant li avek sa ki i ti annan. I’n kit en legzanp parfe pour nou swiv.—Zan 13:15.

11. Ki mannyer limilite in ed Dennis pour kontant li avek sa ki i annan?

¹¹ En frer ki apel Dennis ki reste Pei Ba in esey demontre limilite parey Zezi me i pa’n fasil pour li. I dir: “Ler mon vwar en dimoun pe ganny en responsabilite ki mon ti ava kontan, parfwa mon ankoler parski mon krwar ki mwan ki merit ganny sa responsabilite. Ler sa i arive, mon etidye sa topik limilite. Dan JW Library^® app, mon annan en tag kot mon’n met serten verse Labib konsernan limilite pour mwan kapab vwar zot vitman e relir zot. Mon’n osi download serten diskour konsernan limilite lo mon telefonn e mon ekout zot souvan.a Mon’n aprann ki tou sa ki nou fer i devret pour glorifye Zeova e pa nou prop lekor. Nou tou nou kapab zwe en pti rol dan sa ki Zeova i akonpli.” Si ou konmans santi ki ou nepli zwaye parski ou napa sa responsabilite ki ou ti ava kontan, fer zefor pour devlop limilite. Sa pou fer ou vin pli pros avek Zeova e pou ed ou kontant ou avek sa ki ou annan.—Zak 4:6, 8.

MEDIT LO NOU LESPWAR POUR LAVENIR

12. Ki lespwar nou annan ki ed nou pour kontant nou avek sa ki nou annan? (Izai 65:21-25)

¹² Ler nou medit lo sa zoli lespwar ki nou annan, sa pou ed nou pour kontant nou avek sa ki nou annan. Dan liv Izai, Zeova i dir ki i konpran ki bann problenm lavi i kapab fer nou fristre e i asir nou ki i pou tir tou sa bann problenm. (Lir Izai 65:21-25.) Nou pou reste dan bann zoli lakaz e nou pou an sekirite. Nou pou fer bann travay ki satisfezan e nou pou manz bann manze ki goute e ki bon pour nou lasante. Nou pa pou zanmen bezwen enkyet ki en keksoz mal pou arive avek nou oubyen avek nou zanfan. (Iza. 32:17, 18; Ezek. 34:25) Nou lavenir pou merveye e nou kapab asire ki tou sa bann promes pou vin vre.

13. Dan ki sityasyon ki nou sirtou bezwen konsantre lo nou lespwar?

¹³ Ozordi, plis ki zanmen oparavan, nou bezwen konsantre lo nou lespwar. Akoz? Parski nou pe viv dan “bann dernyen zour” e nou tou nou pe fer fas avek bann problenm ki “vreman difisil.” (2 Tim. 3:1) Toulezour Zeova i ed nou pour andire par donn nou konsey, lafors ek led ki nou bezwen. (Ps. 145:14) Osi, sa lespwar ki nou annan i kapab ed nou andire ler nou pe pas dan bann moman difisil. Petet ou travay vreman dir me kantmenm sa ou vwar li difisil pour donn ou fanmir sa ki zot bezwen. Eski sa i vedir ki ou pou toultan trimouse? Non! Zeova in promet ki dan Paradi, i pou donn ou tou sa ki ou bezwen e plis ankor. (Ps. 9:18; 72:12-14) Petet ou annan en maladi kronik, ou ganny depresyon oubyen ou annan en lot maladi grav. Eski sa i vedir ki ou pou toultan soufer e ki ou pa pou zanmen ganny en soulazman? Non! Dan nouvo lemonn Bondye, personn pa pou malad oubyen mor. (Rev. 21:3, 4) Sa lespwar i ed nou pour pa ankoler oubyen dekouraze konsernan sa ki pe arive avek nou la konmela. Nou kapab reste zwaye e annan lape lespri menm si nou pa ganny trete byen, en dimoun ki nou kontan i mor, nou malad oubyen nou fer fas avek en lot kalite problenm. Akoz? Parski nenport problenm ki nou pe pas ladan la konmela, nou konnen ki nou “bann difikilte i tanporer” e ki dan nouvo lemonn nou pa pou zanmen soufer ankor.—2 Kor. 4:17, 18.

14. Ki mannyer nou kapab ranforsi nou lespwar?

¹⁴ Vi ki nou lespwar i ed nou pour reste zwaye, kwa ki kapab ed nou pour ranforsi nou lespwar? Zis parey en dimoun i kapab bezwen met linet pour li vwar byen bann keksoz ki lwen avek li, i kapab ki nou bezwen fer serten keksoz pour ranforsi nou lespwar, pour nou kapab imazin nou dan Paradi. Ler nou enkyet konsernan si nou annan ase larzan pour viv, nou kapab imazinen ki mannyer lavi pou ete ler nou pou nepli bezwen larzan, nou pou napa det e ler personn pa pou pov. Si ou dezapwente akoz ou pa’n ganny en serten responsabilite ki ou ti ava kontan, reflesir lo lefet ki bann keksoz koumsa pa pou enportan apre ki nou’n vin parfe e nou’n servi Zeova pour plizyer milye lannen. (1 Tim. 6:19) Petet o konmansman, nou pou vwar li difisil pour medit lo lavenir dan plas enkyet konsernan sa ki pe arive la konmela me pli nou imazin sa lavenir merveye ki Zeova in promet, pli i pou vin pli fasil pour nou fer li.

15. Ki ou aprann avek sa ki Christa in dir?

¹⁵ Annou vwar ki mannyer lespwar ti ed Christa, madanm Dennis, ki’n ganny mansyonnen pli boner. Christa i dir: “Mon annan en maladi ki fer mon bann misk fay. Mon pa kapab marse alor mon bezwen servi en wiltyer e mon bezwen reste lo lili laplipar ditan. Mon dan douler toulezour. Resaman, mon dokter in dir mwan ki mon lasante pa pou amelyore. Me deswit mon ti mazinen: ‘I pa vwar lavenir parey mwan mon vwar.’ Mon pe konsantre lo mon lespwar e sa i donn mwan lape lespri. Ozordi, mon bezwen andire dan sa lemonn me dan nouvo lemonn mon pou annan en lavi ki gou!”

“BANN KI ANNAN EN GRAN RESPE POUR LI PA MANK NANRYEN”

16. Akoz Lerwa David ti kapab dir ki bann ki annan gran respe pour Zeova “pa mank nanryen”?

¹⁶ Menm si en serviter Zeova i kontant li avek sa ki i annan, i pou fer fas avek problenm. Mazin Lerwa David. Omwen trwa son bann zanfan ti mor. I ti ganny akize konmkwa in fer en keksoz ki i pa’n fer, i ti ganny trai e en lerwa ti esey touy li e fer li mars an tayan pour plizyer lannen. Me pandan ki David ti pe fer fas avek en problenm grav, i ti dir konsernan Zeova: “Bann ki annan en gran respe pour li pa mank nanryen.” (Ps. 34:9, 10) Akoz i ti kapab dir sa? Parski David ti konnen ki menm si Zeova pa anpes problenm arive dan son lavi, Zeova pou toultan donn David sa ki i bezwen. (Ps. 145:16) Parey David, nou kapab asire ki Zeova pou ed nou andire dan tou problenm ki nou pas ladan. Alor nou kapab annan lape ek lazwa nenport keksoz ki nou pas ladan.

17. Akoz ou anvi kontant ou avek sa ki ou annan?

¹⁷ Zeova i anvi ki ou kontant ou avek sa ki ou annan. (Ps. 131:1, 2) Alor fer tou sa ki ou kapab pour aprann sekre pour kontant ou. Si ou fer zefor pour vin pli rekonesan, pour reste konsantre lo fer lavolonte Zeova e demontre limilite e si ou medit lo ou lespwar, ou pou kapab dir “Wi, mon satisfe.”—Ps. 16:5, 6.